អន្តរជាតិ
នយោបាយអន្តរជាតិ
ឥណ្ឌា នឹងផ្ដល់ផ្ទះសម្បែងនិងការការពារសន្តិសុខដល់ក្រុមជនភៀសខ្លួនរ៉ូហ៊ីងយ៉ា ជនមូស្លីមរ៉ូហ៊ីងយ៉ា រស់នៅក្នុងជំរំមិនរៀបរយក្នុងទីក្រុងញូវដែលី។ រូបថត AFP
× ដោយ ឈួន ឈីវអ៊ីង នយោបាយ នយោបាយអន្តរជាតិ ()
ជនភៀសខ្លួនរ៉ូហ៊ីងយ៉ាដែលស្នាក់នៅទីក្រុងញូវដែលី នឹងទទួលបានផ្ទះល្វែង ហើយមានការការពារសុវត្ថិភាពដែលផ្ដល់ដោយរដ្ឋាភិបាលឥណ្ឌា។ នេះបើតាមការលើកឡើងរបស់រដ្ឋមន្ត្រីផ្ទះសម្បែងឥណ្ឌានៅថ្ងៃទី១៧ ខែសីហា។ ការផ្ដល់លំនៅដ្ឋានសមរម្យ និងមានការការពារសន្ដិសុខនេះ ជាសញ្ញានៃការផ្លាស់ប្តូរជំហររបស់ឥណ្ឌាចំពោះក្រុមជនជាតិភាគតិចមូស្លីម ខណៈពីមុនឥណ្ឌាហាក់ដូចជាមិនស្វាគមន៍ពួកគេឡើយ។
រដ្ឋមន្ត្រីក្រសួងផ្ទះសម្បែង និងកិច្ចការទីក្រុងឥណ្ឌា លោក Hardeep Singh Puri នៅថ្ងៃទី១៧ ខែសីហា អះអាងថា រដ្ឋាភិបាលឥណ្ឌាបានសម្រេចចិត្តប្រមូលជនភៀសខ្លួនរ៉ូហ៊ីងយ៉ាទាំងអស់ក្នុងទីក្រុងញូវដែលី ទៅរស់នៅក្នុងតំបន់ Bakkarwala ដោយផ្ដល់ផ្ទះល្វែងដែលមានសម្ភារប្រើប្រាស់ ផ្ដល់បណ្ណសម្គាល់ខ្លួនរបស់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) និងការការពារសន្តិសុខពេញ២៤ម៉ោងទៀតផង។
ការសម្រេចចិត្តនេះត្រូវបានធ្វើឡើងបន្ទាប់ពីកិច្ចប្រជុំកម្រិតខ្ពស់ជុំវិញបញ្ហាការស្នាក់នៅរបស់ជនភៀសខ្លួនរ៉ូហ៊ីងយ៉ាក្នុងក្រុងញូវដែលី។
«ឥណ្ឌាតែងតែស្វាគមន៍អ្នកស្វែងរកការជ្រកកោនក្នុងប្រទេស»។ លោក Hardeep Singh Puri រដ្ឋមន្ត្រីក្រសួងផ្ទះសម្បែង និងកិច្ចការទីក្រុងឥណ្ឌាបានសរសេរបែបនេះលើបណ្ដាញសង្គម Twitter។ លោកបានបន្ថែមទៀតថា ឥណ្ឌាគោរពនឹងធ្វើតាមអនុសញ្ញាស្ដីពីជនភៀសខ្លួនរបស់អង្គការសហប្រជាជាតិឆ្នាំ១៩៥១ ដោយផ្ដល់សិទ្ធជ្រកកោនទៅមនុស្សគ្រប់រូបមិនគិតពីពូជសាសន៍ សាសនា និងជំនឿឡើយ។
ទាក់ទិននឹងបញ្ហាសន្តិសុខ លោក Puri មិនបានលម្អិតបន្ថែមលើការការពារពីប៉ូលិសគ្រប់ពេលវេលា។ កន្លងមកប្រជាជនរ៉ូហ៊ីងយ៉ានៅឥណ្ឌាក៏ធ្លាប់រងអំពើហិង្សាដែរ។
បើតាមទីភ្នាក់ងារព័ត៌មាន Reuters ការជួយទំនុកបម្រុងក្រុមជនជាតិភាគតិចមូស្លីមបែបនេះ ជាសញ្ញានៃការផ្លាស់ប្តូរជំហររបស់ឥណ្ឌាចំពោះក្រុមជនជាតិភាគតិចមូស្លីម ខណៈពីមុនឥណ្ឌាហាក់ដូចជាមិនស្វាគមន៍ពួកគេឡើយ។
កន្លងមក រដ្ឋាភិបាលឥណ្ឌារបស់នាយករដ្ឋមន្ត្រី នារិន្ទ្រា ម៉ូឌី បានព្យាយាមបញ្ជូនក្រុមជនជាតិភាគតិចរ៉ូហ៊ីងយ៉ាឱ្យត្រលប់ទៅមីយ៉ាន់ម៉ាវិញ ខណៈពួកគេត្រូវភៀសខ្លួនពីការបៀតបៀនដោយប្រើអំពើហិង្សាអស់ជាច្រើនឆ្នាំនៅមីយ៉ាន់ម៉ា៕
© រក្សាសិទ្ធិដោយ thmeythmey.com