អ៊ុយក្រែន នៅថ្ងៃទី២៤ ខែសីហា ប្រាព្ធទិវាឯករាជ្យពីសហភាពសូវៀតនៅក្នុងឆ្នាំ១៩៩១។ ពិធីដ៏សំខាន់នេះ ធ្វើឡើងស្របពេលរុស្ស៊ីបានឈ្លានពាននៅតំបន់ភាគខាងកើតរបស់អ៊ុយក្រែន បានរយៈ ៦ខែហើយ។ ស្របពេលទិវាមួយនេះ រដ្ឋមន្រ្តីការបរទេសអាម៉េរិក លោក អាន់តូនី ប្លីងខិន ដែលតំណាងឱ្យប្រជាជនអាម៉េរិក បានអបអរទិវាឯករាជ្យអ៊ុយក្រែន និងបានប្តេជ្ញាដាក់សម្ពាធលើរុស្ស៊ីជាថ្មី រហូតដល់មានការដកទ័ពចេញពីអ៊ុយក្រែន។ 

 

«យើងត្រូវតែបង្កើនការដាក់សម្ពាធជាអន្តរជាតិលើលោកប្រធានាធិបតីពូទីន និងបក្សពួក រហូតដល់សិទ្ធិរបស់ប្រជាជនអ៊ុយក្រែន និងអធិបតេយ្យរបស់ពួកគេ ត្រូវបានគោរព»។ លោក ប្លីងខិន បានសង្កត់ធ្ងន់បែបនេះ នៅក្នុងវីដេអូមួយបង្ហោះលើបណ្តាញសង្គម Twitter ទៅកាន់កិច្ចប្រជុំវេទិកាគ្រីមេ នៅថ្ងៃទី២៣ ខែសីហា។ 

 

ទន្ទឹមនេះ ប្រមុខការទូតអាម៉េរិក បានបន្តថា សហគមន៍អន្តរជាតិ ត្រូវតែបន្តផ្តល់ជំនួយមនុស្សធម៌ និងសន្តិសុខ រួមទាំងការគាំទ្រផ្នែកការទូតសម្រាប់ប្រជាជនអ៊ុយក្រែន ដែលមានភាពក្លាហានក្នុងការការពារសិទ្ធិរបស់ខ្លួន។ ក្នុងវីដេអូដដែល លោកប្លីងខិន បានពន្យល់ថា គ្មានប្រទេសណាមួយអាចកម្រិតព្រំដែនប្រទេសដទៃឡើងវិញ ដោយកម្លាំងយោធាឡើយ ដែលគោលការណ៍នេះ ត្រូវបានចែងយ៉ាងច្បាស់នៅក្នុងធម្មនុញ្ញអង្គការសហប្រជាជាតិ រួមទាំងសណ្តាប់ធ្នាប់អន្តរជាតិ។ 

 

មិនតែប៉ុណ្ណោះ លោកប្លីងខិន បានអះអាងថា អាម៉េរិកបានឃើញរុស្ស៊ីរៀបចំរដ្ឋបាលអាយ៉ងនៅក្នុងទីក្រុងរបស់អ៊ុយក្រែនជាច្រើន ដូចអ្វីដែលក្រុងមូស្គូ បានធ្វើនៅគ្រីមេ រួមទាំងការធ្វើប្រជាមតិនៅក្នុងទីក្រុងទាំងនោះផង។ 

 

គិតត្រឹមពេលនេះ រុស្ស៊ីបានឈ្លានពានអ៊ុយក្រែន ៦ខែហើយ ដោយរុស្ស៊ីបានគ្រប់គ្រងយ៉ាងពេញលេញតំបន់លូហាន និងបន្តផ្តោតប្រតិបត្តិការនៅតំបន់ដូណេត្ស។ សង្រ្គាមមួយនេះ បានធ្វើឱ្យប្រជាជនស៊ីវិលរបស់អ៊ុយក្រែនរាប់ពាន់នាក់របួស និងបាត់បង់ជីវិត៕