ហាក់បង្ហាញអារម្មណ៍តានតឹងចិត្ត សម្ដេចនាយករដ្ឋមន្ត្រី ហ៊ុន សែន បានជំរុញរដ្ឋមន្ត្រីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា ឱ្យត្រួតពិនិត្យមើលកម្មវិធី Miss Grand Cambodia ឡើងវិញ ក្រោយពីមានមហាជនរិះគន់ច្រើនពីកម្មវិធីនេះ។
ក្នុងពិធីបើកការដ្ឋានសាងសង់ស្ពានអាកាសក្នុងរាជធានីភ្នំពេញ ចំនួន២បន្ថែមទៀត នាព្រឹកថ្ងៃពុធ ទី៣១ ខែសីហា ប្រមុខរដ្ឋាភិបាល បានមានប្រសាសន៍ថា អ្នករៀបចំកម្មវិធី Miss Grand Cambodia គឺជាអ្នកទទួលខុសត្រូវ ចំពោះការរិះគន់របស់មហាជន ទៅនឹងការរៀបចំកម្មវិធីនេះ។
អ្វីដែលសម្ដេចនាយករដ្ឋមន្ត្រីផ្ដោតខ្លាំងនោះ គឺកម្មវិធី Miss Grand Cambodia បានច្រានចោលលិខិតរបស់រដ្ឋបាលខេត្តស្ទឹងត្រែង ដែលឱ្យកម្មវិធីនេះ សូមទោសចំពោះការបង្ហាញឈុតនីមួយៗ ដែលបេក្ខនារីតំណាងខេត្តស្ទឹងត្រែងបានស្លៀក ដោយបង្ហាញភាពស៊ិចស៊ី។
រូប_ពី_ហ្វេសប៊ុក_ផេក Miss Grand Cambodia
សម្ដេចបញ្ជាក់បន្ថែមដូច្នេះ៖«ខ្ញុំក៏សូមឱ្យពិនិត្យឡើងវិញ អាបវរកញ្ញាស្អីនៀក។ ឃើញគេបង្ហោះចុះបង្ហោះឡើង មើល! សុំហៅគ្នាមកធ្វើការមើល? រឿងវាយ៉ាងម៉េច បានជាវាទៅអ៊ីចឹង តំណាងបាវិត តំណាងប៉ោយប៉ែត សុទ្ធតែល្បែង ហ្នឹងគេក៏លុបចោលហើយ។ ប៉ុន្តែតំណាងស្ទឹងត្រែង គេទាត់ចោល»។
សូមបញ្ជាក់ថា នៅថ្ងៃទី៣១ ខែសីហា ឆ្នាំ២០២២នេះ ទំព័រហ្វេសប៊ុកផ្លូវការរបស់ Miss Grand Cambodia បានឆ្លើយតបទៅរដ្ឋបាលខេត្តស្ទឹងត្រែងវិញ ដោយត្រឹមតែសរសេរសំណេរខ្លី មានភ្ជាប់រូប សម្លៀកបំពាក់ឈុតតំណាងខេត្តស្ទឹងត្រែង ជាមួយលិខិតឆ្លើយតបរបស់រដ្ឋបាលខេត្តស្ទឹងត្រែង ថា“តើត្រូវសូមទោសយ៉ាងម៉េចទៅ បើឈុតនេះមិនមានអីខុសផង!។
លោក ម៉ែន គុង នាយករងរដ្ឋបាលសាលាខេត្ត និងជាអ្នកនាំពាក្យរដ្ឋបាលខេត្តស្ទឹងត្រែង បានប្រាប់សារព័ត៌មានថ្មីៗ តាមទូរសព្ទនៅថ្ងៃទី២៨ ខែសីហា ឆ្នាំ២០២២នេះថា រដ្ឋបាលខេត្តគាំទ្រ កម្មវីធី Miss Grand Cambodia 2022 ចំពោះការបង្ហាញឈុតតំណាងខេត្តស្ទឹងត្រែង ដែលមិនធ្វើឱ្យប៉ះពាល់ដល់ប្រពៃណី និងទំនៀមទម្លាប់របស់ខេត្តខ្លួន។
លោក ម៉ែន គុង នាយករងរដ្ឋបាលសាលាខេត្ត និងជាអ្នកនាំពាក្យរដ្ឋបាលខេត្តស្ទឹងត្រែង
ទោះជាយ៉ាងណាក៏ដោយ ក្នុងដំណាក់កាលនៃការបង្ហាញឈុតនីមួយៗ ដែលមានជាប់ពាក់ព័ន្ធនឹងខេត្តស្ទឹងត្រែង ឃើញមានឈុតស៊ិចស៊ី ដូច្នេះលោក ម៉ែន គុង សុំឱ្យអ្នករៀបចំកម្មវិធី Miss Grand Cambodia បកស្រាយឱ្យប្រជាជនខេត្តស្ទឹងត្រែងយល់ឱ្យបានច្បាស់។ ដ្បិតអី នាយករងរដ្ឋបាលសាលាខេត្តរូបនេះ យល់ឃើញថា វាបានធ្វើឱ្យប៉ះពាល់ដល់តម្លៃប្រពៃណី ទំនៀមទម្លាប់ដ៏ល្អរបស់ខេត្តស្ទឹងត្រែង។
លោក ឡុង ប៉ុណ្ណាសិរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈ បានប្រាប់ ThmeyThmey តាមទូរសព្ទកាលពីថ្ងៃទី២៧ ខែសីហា ថាក្រុមការងារជំនាញរបស់លោក បានកោះហៅអ្នករៀបចំកម្មវិធី Miss Grand Cambodia ទៅស្ដីបន្ទោសរួចរាល់ហើយ ចំពោះការបង្ហាញឈុតល្បែងស៊ីសង ដែលធ្វើឱ្យប៉ះពាល់ពាល់ដល់សង្គម។ យ៉ាងណាក៏ដោយ រឿងឈុតដំណាងខេត្តស្ទឹងត្រែង លោកមិនបានបញ្ជាក់ច្បាស់ឡើយ ដោយទុកឱ្យ កម្មវិធី Miss Grand Cambodia ជាអ្នកបកស្រាយ។ ប៉ុន្តែលោកសូមឱ្យសាធារណជន បែងចែកឱ្យច្បាស់ ថាឈុតមួយណាជាឈុតដំណាងខេត្ត ហើយឈុតមួយណា ដែលតំណាងឱ្យកម្មវិធី មុននឹងរិះគន់។
លោក ឡុង ប៉ុណ្ណាសិរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈ (រូប_ខាងមុខ)
កាលពីពេលថ្មីៗនេះ កម្មវិធី Miss Grand Cambodia ក៏ដូចជាផលិតកម្មមហាហង្ស ដែលជាអ្នករៀបចំកម្មវិធី បានចេញលិខិតបំភ្លឺ និងសម្ដែងការសោកស្ដាយ ចំពោះការបង្ហាញឈុតដំណាងខេត្តចំនួន២ គឺខេត្តស្វាយរៀង និងខេត្តបន្ទាយមានជ័យ ដែលបង្ហាញពីល្បែងស៊ីសង ក្រោយពីមានការរិះគន់ខ្លាំងពីមហាជន។
មិនត្រឹមតែមិនពេញចិត្តចំពោះការបង្ហាញឈុតល្បែងស៊ីសង និងការមិនឆ្លើយតបទៅរដ្ឋបាលខេត្តស្ទឹងត្រែង ពីសំណាក់កម្មវិធី Miss Grand Cambodia ប៉ុណ្ណោះទេ ប៉ុន្តែសម្ដេចក៏បង្ហាញការមិនពេញចិត្ត ចំពោះរបៀបរបបនៃការបង្ហាញក្នុងកម្មវិធីនោះដែរ។
«ហើយអ្វីដែលសំខាន់ គឺស្រែកអាឡេអាឡូពេញតែទឹកពេញតែដី ហ្នឹងគឺជាភារកិច្ចរបស់ក្រសួងវប្បធម៌ ធ្វើការភ្លាមៗ។ អត់ទេ! ថ្ងៃក្រោយសុំឱ្យមើលអាហ្នឹងឡើងវិញបន្តិច។ ខ្ញុំមិនថាខុសថាត្រូវយ៉ាងម៉េចទេ ក៏ប៉ុន្តែមតិមហាជន គឺសម្ដែងនូវការសោកស្ដាយ យើងត្រូវស្ដាប់សំឡេងនេះផង ហើយត្រូវកែតម្រូវ។ ក្មួយៗដែលជាអ្នកទៅសម្ដែង អត់មានកំហុសទេ ព្រោះគេឱ្យសម្ដែងយ៉ាងម៉េច ទៅតែសម្ដែងបែបនោះ គេឱ្យស្លៀកអី ត្រូវតែស្លៀកតាមគេអ៊ីចឹង។ បើមិនស្លៀកតាមគេ វាមិនត្រូវស្ដង់ដាប្រកួត។ ដូច្នេះមិនខុសអ្នកទៅប្រកួតទេ វាខុសអ្នកចាត់ការ វាខុសអ្នកដឹកនាំ»។ នេះជាការបន្ថែមរបស់សម្ដេច។
សាធារណជន តែងតែបង្ហាញការធុញទ្រាន់ នៅពេលដែលឃើញមានកម្មវិធីណាមួយ ឬអ្នកនៅក្នុងវិស័យសិល្បៈ ធ្វើទង្វើឆ្គាំឆ្គងដែលនាំឱ្យប៉ះពាល់ដល់តម្លៃសិល្បៈ វប្បធម៌ និងអត្តសញ្ញាណជាតិដដែលៗ។ រាល់ដង ពួកគេទាំងនោះគ្រាន់តែសូមទោស និងឆ្លើយថាមិនដឹងក៏រួចខ្លួន។
សាធារណជន និងអ្នកវិភាគ ធ្លាប់បានផ្ដល់យោបល់ថា ក្នុងករណីជនក្នុងវិស័យសិល្បៈ និងវប្បធម៌ ប្រព្រឹត្តខុសលើកទីមួយ មិនត្រូវត្រឹមតែហៅទៅអប់រំ និងណែនាំឡើយ ប៉ុន្តែត្រូវតែកំណត់ឱ្យពួកគេទៅធ្វើការងារ ជាប្រយោជន៍ណាមួយជួយសង្គម ក្នុងរយៈពេលកំណត់ណាមួយ ដើម្បីឱ្យពួកគេរៀងចាល។ អ្នកវិភាគថាវិធីបែបនេះ ចំណេញទាំងបុគ្គលនោះផ្ទាល់ខ្លួន ទាំងក្រសួង ទាំងសង្គមជាតិ ហើយនេះគឺជាវិធីបណ្ដុះសីលធម៌សង្គម យ៉ាងមានប្រសិទ្ធភាព ដ្បិតអីប្រទេសជឿនលឿនក្នុងពិភពលោក បានអនុវត្តន៍ជោគជ័យរួចមកហើយ។ ប៉ុន្តែបើពួកគេនៅតែមិនរៀងចាល គួរតែពិន័យឱ្យធ្ងន់ជាងនោះ៕