ជាតិ
៥ឆ្នាំមកនេះ ក្រសួងព័ត៌មាន ផ្ដល់បណ្ណព័ត៌មានដល់អ្នកសារព័ត៌មានជាង១ម៉ឺននាក់
× ភ្នំពេញ៖ រយៈពេល៥ឆ្នាំនេះ ក្រសួងព័ត៌មាន បានចេញអាជ្ញាបណ្ណសារព័ត៌មានចំនួនជាង២០០០អាជ្ញាបណ្ណ ហើយផ្ដល់បណ្ណសារព័ត៌មានដល់អ្នកសារព័ត៌មានជាតិ និងអន្តរជាតិជាង១ម៉ឺននាក់។
របាយការណ៍ដែលបង្ហាញដោយ លោក មាស សុភ័ណ្ឌ អនុរដ្ឋលេខាធិការក្រសួងព័ត៌មាន បានលំអិតថា រយៈពេល៥ឆ្នាំចុងក្រោយ ក្រសួងបានចេញអាជ្ញាបណ្ណ និងលិខិតអនុញ្ញាតបន្តអាជ្ញាបណ្ណព័ត៌មានគ្រប់ប្រភេទបានចំនួន២១៥៤អាជ្ញាបណ្ណ។ ជាមួយគ្នាដែរ ក្រសួង បានចេញបណ្ណអ្នកសារព័ត៌មាន និងបន្តសុពលភាពបណ្ណសារព័ត៌មានជាតិ និងអន្តរជាតិចំនួន១០០៣៣បណ្ណ។
របាយការណ៍ ដដែលបង្ហាញថា បច្ចុប្បន្ននេះ អង្គភាពសារព័ត៌មានជាតិ និងបរទេសដែលបានចុះបញ្ជីនៅក្រសួងព័ត៌មាន២១៥៤អង្គភាព ដែលផ្សាយបែបបុរាណ និងបែបទំនើប។ ចំនួន២១៥៤នេះ គឺមានការកើនឡើង៥៥៨អង្គភាព បើធៀបនឹងឆ្នាំ២០១៨។ ចំពោះចំនួនកើនឡើងនេះ លោក មាស សុភ័ណ្ឌ ដែលជាអ្នកនាំពាក្យក្រសួងផងដែរនោះ បានវាយតម្លៃថា កម្ពុជាមានសេរីភាពពេញលេញក្នុងការចេញផ្សាយព័ត៌មាន។
ក្នុងសន្និសីទសារព័ត៌មានស្ដីពីសមិទ្ធផល៥ឆ្នាំ របស់ក្រសួងព័ត៌មានដែលរៀបចំនៅទីស្តីការគណរដ្ឋមន្ត្រីនោះ នាព្រឹកថ្ងៃទី១ ខែកញ្ញានោះ លោក មាស សុភ័ណ្ឌ បានលើកឡើងថា នៅកម្ពុជាទោះស្ថិតក្នុងកាលៈទេសៈណា ក៏ដោយ ជាក់ស្ដែង នាអំឡុងពេលបិទខ្ទប់នៃការរីករាលដាលកូវីដ-១៩ ក្រសួងបានជួយសម្របសម្រួលដល់អ្នកសារព័ត៌មានជាង១ពាន់នាក់ ចុះយកព័ត៌មាននៅតំបន់បិទខ្ទប់។
យ៉ាងណាក៏ដោយ អ្នកនាំពាក្យរូបនេះ ក៏បានបញ្ជាក់ដែរថា ចាប់តាំងពីអំឡុងឆ្នាំ២០២០ ដល់បច្ចុប្បន្ន ក្រសួងរកឃើញព័ត៌មានក្លែងក្លាយ៤៦៥៧មាតិកា។ ចំពោះករណីព័ត៌មានក្លែងក្លាយទាំងនេះ ក្រសួងពុំបានបញ្ជូនសំណុំរឿងទៅតុលាការឡើយ។ ប៉ុន្តែ ក្នុងចំណោម៤៦៥៧មាតិកានេះ មាន១៧០មាតិកា ក្រសួងព័ត៌មានសម្រេចបញ្ជូនទៅឲ្យក្រសួងពាក់ព័ន្ធជាអ្នកដោះសា្រយ។
«ព័ត៌ក្លែងក្លាយបានជះឥទ្ធិពលខ្លាំងណាស់ដល់ប្រទេសជាតិ ជាក់ស្តែងការឃោសនាពីគ្រោះធម្មជាតិជាដើម។ ការផ្សាយព័ត៌មានក្លែងក្លាយនេះ មិនមែនមានតែពេលបច្ចុប្បន្ននេះទេ គឺមានយូរហើយ ប៉ុន្តែពេលបច្ចុប្បន្ននេះ គឺមានការ ផ្សព្វផ្សាយលឿនដែលយើងពិបាកគ្រប់គ្រង»។ នេះជាការបញ្ជាក់បន្ថែមរបស់លោក មាស សុភ័ណ្ឌ។
ទន្ទឹមនឹងនេះ លោកបានឲ្យដឹងថា ក្រសួងព័ត៌មានសហការជាមួយក្រសួងមហាផ្ទៃ និងក្រសួងប្រៃសណីយ៍ និងទូរគមនាគមន៍ ដើម្បីបន្តទប់ស្កាត់ការរីករាលដាលនៃព័ត៌មានក្លែងក្លាយ៕
© រក្សាសិទ្ធិដោយ thmeythmey.com