ជាតិ
វីដេអូ
លោក វ៉ី សំណាង រំពឹងថា កីឡដ្ឋានខេត្តកំពង់ស្ពឺនឹងផ្ដល់ភាពទាក់ទាញ និងកំណើនទេសចរខេត្តកំពង់ស្ពឺ
× កំពង់ស្ពឺ៖ ក្រោយការសាងសង់ជាង១ឆ្នាំ កីឡដ្ឋានខេត្តកំពង់ស្ពឺ ត្រូវបានសម្ពោធឱ្យប្រើប្រាស់នៅថ្ងៃទី៦ ខែកញ្ញា ឆ្នាំ២០២២ ក្រោមអធីបតីភាពលោក ឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងដែនដីនគររូបនីយកម្ម និងសំណង់ និងលោក ហ៊ុន ម៉ានី តំណាងរាស្រ្តមណ្ឌលកំពង់ស្ពឺ។ កីឡដ្ឋាននេះ នឹងកែប្រែសោភណ្ឌភាពខេត្តកំពង់ស្ពឺ ថែមទៀត។
លោក វ៉ី សំណាង អភិបាលខេត្តកំពង់ស្ពឺ អះអាងថា កីឡដ្ឋាននេះជាផ្នែកមួយជួយកែប្រែសោភណ្ឌភាព កិត្តិយសខេត្ត និងលើកកម្ពស់វិស័យកីឡាផងដែរ។ លើសពីនេះ លោកក៏រំពឹងថា កីឡដ្ឋានខេត្តកំពង់ស្ពឺ នឹងផ្ដល់ភាពទាក់ទាញ ក៏ដូចជាជំរុញកំណើនទេសចរក្នុងខេត្តកំពង់ស្ពឺបន្ថែមផងដែរ។
«កាលពីមិនទាន់មានកីឡដ្ឋានហ្នឹងក៏មានមនុស្សមកលេងយ៉ាងច្រើនដែរ ព្រោះយើងមានតំបន់ទេសចរណ៍ធម្មជាតិ កសិទេសចរណ៍ ទេសចរណ៍ប្រវត្តិសាស្រ្ត។ បើយើងមានកន្លែងនេះមួយទៀត ខ្ញុំរំពឹងថាទេសចរណ៍នឹងបង្កើនមកលេងនេះទៀត។ គាត់មកលេងកីឡាហ្នឹងក៏បម្រើឱ្យវិស័យទេសចរដែរ»។ នេះជាការលើកឡើងរបស់លោក វ៉ី សំណាង អភិបាលខេត្តកំពង់ស្ពឺ។
កីឡដ្ឋានខេត្តកំពង់ស្ពឺ មានចម្ងាយប្រមាណ៤គីឡូម៉ែត្រពីផ្លូវជាតិលេខ៤ ក្នុងភូមិតាម៉ុល សង្កាត់ច្បារមន ក្រុងច្បារមន។ «កីឡដ្ឋានខេត្តកំពង់ស្ពឺ» បានក្លាយជាកីឡដ្ឋានស្តង់ដារដំបូងបំផុតនៅក្នុងខេត្តមួយនេះ ជាពិសេសកីឡាបាល់ទាត់ ដែលពេញនិយមបំផុត។
កីឡដ្ឋាននេះ ត្រូវបានសាងសង់ឡើងក្រោមគំនិតផ្តួចផ្តើមរបស់លោក ហ៊ុន ម៉ានី ដែលជាអ្នកតំណាងរាស្ត្រមណ្ឌលកំពង់ស្ពឺ ដោយលោកសម្រេចឲ្យមានគម្រោងនេះ ដើម្បីរួមចំណែកអភិវឌ្ឍនវិស័យកីឡាក្នុងខេត្ត និងក្នុងក្របខណ្ឌកម្ពុជាទាំងមូល ដែលកំពុងត្រៀមធ្វើជាម្ចាស់ផ្ទះសម្រាប់ព្រឹត្តិការណ៍កីឡាស៊ីហ្គេមឆ្នាំ២០២៣។
កីឡដ្ឋានខេត្តកំពង់ស្ពឺ មានកន្លែងសម្រាប់អ្នកទស្សនាចំនួន៣០០០នាក់ ដោយក្រៅពីទីលានបាល់ទាត់ កីឡដ្ឋានខេត្តកំពង់ស្ពឺ ក៏មានទីលានរត់ប្រណាំង សួនកុមារ កន្លែងហាត់ប្រាណ សំណង់រូបសំណាកព្រះបាទជ័យវរ្ម័នទី៧ និងរូបសំណាកសម្តេចព្រះសង្ឃរាជ ជួន ណាត ផងដែរ៕
Tag:
កីឡដ្ឋានខេត្តកំពង់ស្ពឺ
វ៉ី សំណាង
© រក្សាសិទ្ធិដោយ thmeythmey.com