អន្តរជាតិ
រោងចក្រថាមពលនុយក្លេអ៊ែរ Zaporizhzhia ត្រូវផ្អាកប្រតិបត្តិការទាំងស្រុង
× ទីភ្នាក់ងាររដ្ឋអ៊ុយក្រែនទទួលបន្ទុករោងចក្រនុយក្លេអ៊ែរ Zaporizhzhia នៅថ្ងៃទី១១ ខែកញ្ញា ប្រកាសថា ប្រតិបត្តិការនៅរោងចក្រនុយក្លេអ៊ែរដែលគ្រប់គ្រងដោយកងម្លាំងរុស្ស៊ី ត្រូវ ផ្អាកដំណើរការទាំងស្រុងដើម្បីរក្សាសុវត្ថិភាព ខណៈដែលការបាញ់បោះគ្នារវាងរុស្ស៊ី និងអ៊ុយក្រែននៅតែបន្តក្បែររោងចក្រមួយនេះ។
ក្នុងសេចក្ដីថ្លែងការណ៍មួយ ទីភ្នាក់ងារថាមពលនុយក្លេអ៊ែរអ៊ុយក្រែន Energoatom បានលើកឡើងអំពីការផ្អាកដំណើរការរោងចក្រ Zaporizhzhia ទាំងស្រុងបន្ទាប់ពីទីភ្នាក់ងារបានផ្តាច់ខ្សែថាមពលលេខ៦ ពីបណ្តាញរោងចក្រអគ្គិសនី។
«(ពួកយើងកំពុង) ត្រៀមរៀបចំកំពុងដំណើរការសម្រាប់ភាពត្រជាក់របស់សារធាតុនុយក្លេអ៊ែរ និងការផ្ទេរទៅស្ថានភាពត្រជាក់»។ ទីភ្នាក់ងារខាងលើបានបន្ថែមបែបនេះដោយចង់សំដៅលើ ការផ្អាកប្រតិបត្តិការរោងចក្រ តែត្រូវបន្តរក្សាភាពត្រជាក់របស់ថាមពលនុយក្លេអ៊ែរដើម្បីរក្សាសុវត្ថិភាព។
កាលពីថ្ងៃទី១០ ខែសីហា ទីភ្នាក់ងារ Energoatom បានអះអាងថា ពួកគេបានស្ដារសមត្ថភាព ប្រតិបត្តិការ និងខ្សែភ្ជាប់កាន់ប្រព័ន្ធថាមពលឡើងវិញដែលត្រូវបានខូចខាតដោយសារការបាញ់ផ្លោងរបស់រុស្ស៊ី។ ទោះបីជាយ៉ាងណាក៏ដោយទីភ្នាក់ងារមួយនេះបានសម្រេចចិត្តបិទខ្សែថាមពលលេខ៦ ពីបណ្តាញរោងចក្រ ខណៈហានិភ័យការប៉ះពាល់និងខូចខាតអាចកើតមានឡើងនៅពេលខាងមុខ។
គួរបញ្ជាក់ថា ក្រុងកៀវកាលពីថ្ងៃទី៧ ខែកញ្ញា បានជំរុញឱ្យប្រជាជនដែលរស់នៅក្បែររោងចក្រនោះ ភៀសខ្លួនចេញដើម្បីការពារសុវត្ថិភាពផ្ទាល់ខ្លួន។ ក្រុងកៀវ និងក្រុងមូស្គូនៅតែចោទគ្នាទៅវិញទៅមកពីការបាញ់ផ្លោងក្បែររោងចក្រនុយក្លេអ៊ែរដែលអាចនឹងបង្កជាគ្រោះថ្នាក់នុយក្លេអ៊ែរដ៏អាក្រក់មួយ៕
© រក្សាសិទ្ធិដោយ thmeythmey.com