ក្រសួងសេដ្ឋកិច្ច និងការអភិវឌ្ឍរបស់អាល្លឺម៉ង់ (BMZ) បានសិក្សាឃើញថា ក្នុងរយៈពេល ៥ឆ្នាំចុងក្រោយនេះ ប្រជាពលរដ្ឋកម្ពុជា ១៦៧ ០០០នាក់ ជំពាក់បំណុលដែលនាំឱ្យមានការលក់ដីដោយបង្ខំជាច្រើនករណី ដើម្បីបង់សងកម្ចីឥណទាន។ នេះបើតាមសេចក្តីថ្លែងការណ៍របស់អង្គការលីកាដូ ដែលចុះផ្សាយនៅថ្ងៃទី១៤កញ្ញា ឆ្នាំ២០២២។
ចាប់ពីពាក់កណ្ដាលឆ្នាំ២០១៩មក អង្គការសិទ្ធិមនុស្សកម្ពុជាមួយចំនួន បានចេញរបាយការណ៍បង្ហាញពីផលអវិជ្ជមានយ៉ាងធ្ងន់ធ្ងរ នៃវិបត្តិបំណុលមីក្រូហិរញ្ញវត្ថុច្រើនលើសលប់ ដែលកំពុងកើតមាននៅកម្ពុជា។
ការសិក្សាស្វែងរកភស្តុតាងជាតួលេខនេះ មានរួមបញ្ចូលការស្ទង់មតិក្នុងទំហំធំតាមគ្រួសារ, កិច្ចពិភាក្សាជាក្រុម ជាមួយអ្នកភូមិ និងបទសម្ភាសជាមួយអាជ្ញាធរមូលដ្ឋាន នៅក្នុងភូមិចំនួន ២៤នៅទូទាំងប្រទេសកម្ពុជា។ នេះបើតាមលីកាដូដដែល។
លីកាដូ បានបញ្ជាក់ថា បញ្ហាដែលបានរកឃើញទាំងនោះ រួមមាន កម្រិតខ្ពស់ងនៃទំហំកម្ចីគិតជាមធ្យម ៥១៨៣ដុល្លារ ក្នុងចំណោមគ្រួសារជាប់ជំពាក់បំណុល ដែលភាគច្រើន អ្នកទាំងនោះគឺជាគ្រួសារក្រខ្សត់ខ្លាំង ហើយពួកគេខ្ចីជាមួយនឹងអត្រាការប្រាក់ ១៨ភាគរយ បូកនឹងកម្រៃសេវាឥណទានខ្នាតតូច។
លីកាដូ បានឲ្យដឹងថា ជិតពាក់កណ្ដាលនៃគ្រួសារជំពាក់បំណុល ជួបការលំបាកក្នុងការបង់សងវិញ។ ក្នុងចំណោមគ្រួសារជួបការលំបាកក្នុងការបង់សងមាន ១៣ភាគរយ ដែលពួកគេបានលក់ដី ដើម្បីបង់សងបំណុលក្នុងរយៈពេល ៥ឆ្នាំចុងក្រោយ។
ដោយឡែក អ្នកខ្ចីប្រាក់បានរងគ្រោះពីការរំលោភសិទ្ធិ ហើយការបរិភោគអាហារ ត្រូវបានកាត់បន្ថយ ដើម្បីឆ្លើយតបនឹងបន្ទុកបំណុល។ ក្មេងៗត្រូវឈប់រៀន ដើម្បីធ្វើការរកប្រាក់សងបំណុលឱ្យគ្រួសារជាដើម។ នេះបើតាមលីកាដូ។
លីកាដូ បានលើកឡើងបែបនេះ៖ «ការវិភាគរបស់អ្នកស្រាវជ្រាវ វិស័យមីក្រូហិរញ្ញវត្ថុនៅកម្ពុជា ចង្អៀតពេក ដែលនាំឱ្យមានការប្រកួតប្រជែងជាខ្លាំងក្នុងចំណោមអ្នកផ្ដល់កម្ចីឥណទានខ្នាតតូចជាផ្លូវការ។ ហើយមានការផ្សព្វផ្សាយយ៉ាងសម្បើមតាមផ្ទះរបស់ពលរដ្ឋ ដែលប្រើវិធីសាស្រ្តជ្រុលនិយមនៃការយកដីធ្លីដាក់ជាទ្រព្យធានាសម្រាប់កម្ចីខ្នាតតូច ដើម្បីបង្កើន ឬរក្សាអតិថិជន»។
បើតាមប្រភពដដែល កាលពីឆ្នាំ២០១៧ មានការសិក្សាមួយដែលទាក់ទងពីភាពជំពាក់បំណុលច្រើន ដែលគាំទ្រថវិកាដោយម្ចាស់ជំនួយអ្នកស្រាវជ្រាវនៃ INEF បានសន្និដ្ឋានថា នៅចន្លោះពី ២៥ភាគរយ ទៅ ៥០ភាគរយ នៃ ២,៨លានគ្រួសារ ដែលជាប់ជំពាក់បំណុលនៅកម្ពុជា។
ជាមួយគ្នានេះ អង្គការមិនមែនរដ្ឋាភិបាលនៅកម្ពុជា បានអំពាវនាវឱ្យរដ្ឋាភិបាលអាល្លឺម៉ង់ និងម្ចាស់ជំនួយផ្សេងទៀតនៃវិស័យមីក្រូហិរញ្ញវត្ថុ ឱ្យគោរពការទទួលខុសត្រូវរបស់ពួកគេ និងចាត់វិធានការជាក់លាក់ និងជាបន្ទាន់ ដើម្បីដោះស្រាយស្ថានភាពនៃបញ្ហាមួយនេះផងដែរ។
លោក កាំង តុងងី អ្នកនាំពាក្យសមាគមគ្រឹះស្ថានមីក្រូហិរញ្ញវត្ថុកម្ពុជា បានលើកឡើងថា អង្គកាលីកាដូ អង្គហ្វីអាន និងអង្គការសមធម៌កម្ពុជា ដែលបានធ្វើសេចក្ដីថ្លែងការណ៍ គឺផ្អែកទៅលើរបាយការណ៍របស់ Frank Bliss ដែលបានផ្ដល់មូលនិធិដល់រដ្ឋាភិបាល ដើម្បីសិក្សាស្រាវជ្រាវផ្នែកមីក្រូហិរិញ្ញវត្ថុនៅកម្ពុជា។
លោក បន្តថា របាយការណ៍បានការសិក្សាទៅលើអ្នកកម្ចីឥណទានជាង ១០០០គ្រួសារនៅកម្ពុជា ក្នុងនោះបានរកឃើញ ៦,២ភាគរយ នៃចំនួនប្រជាជនដែលបានលក់ដី។ ការលក់ដីនេះ មិនបានបញ្ជាក់ថាពាក់ព័ន្ធនឹងមីក្រូហិរញ្ញវត្ថុ ឬជាមួយឥណទានតាមហាងប្រចាំ ក៏ដូចជាឥណទានក្រៅផ្លូវការនោះទេ។ លោក បន្ថែមថា អ្វីដែលអង្គការទាំង ៣ បានសិក្សាឃើញតួលេខច្រើននេះ ព្រោះពួកគាត់យក ៦,២ភាគនោះ ទៅគុណពង្រីក ទើបមានចំនួនច្រើនបែបនេះ។
«អ្វីដែលខ្ញុំឃើញ ខ្ញុំបានពិនិត្យមើលរបាយការណ៍ដើម របស់ Frank Bliss ដែលជារដ្ឋាភិបាលអាម្លឺម៉ង់ គឺមានលក្ខណៈខុសដាច់ពីអ្វីដែលអង្គការលីកាដូ និងអង្គការពាក់ព័ន្ធបានយកមកផ្សព្វផ្សាយ ដោយសារអង្គការទាំង ៣បានច្បិចយកតែចំណុចអវិជ្ជមាន ហើយយកមកបំប៉ោង ដែលធ្វើឱ្យបាត់បង់រូបរាងដើមនៃរបាការណ៍ហ្នឹង»។ លោក តុងងី បានបញ្ជាក់បែបនេះ។
លោកថ្លែងថា នៅក្នុងរបាយការណ៍ដើម មានទាំងចំណុចអវិជ្ជមាន និងចំណុចវិជ្ជមាន មិនមែនមានតែចំណុចអវិជ្ជមាន ដូចអង្គការក្រៅរដ្ឋាភិបាល យកមកផ្សព្វផ្សាយនោះទេ។ បើយើងពិនិត្យតាមរបាយការណ៍នោះ គឺជាង ៨០ភាគរយនៃប្រជាជន ទទួលបានផលល្អពីវិស័យឥណទាន ហើយក្នុងចំណោមអ្នកដែលឆ្លើយ ៩៥ភាគរយ ពួកគេមានផ្ទះសម្បែង, ៤ភាគរយសម្រាប់ផ្ទះដែលគេឱ្យកម្ចី។ ទន្ទឹមនេះ ប្រមាណជិត ៦០ភាគរយ ដែលជាអ្នកឆ្លើយសំណួរ គឺមានដីចម្ការ ដីស្រែ ដូច្នេះបើមើលតែជ្រុងមួយនៃការបកស្រាយរបស់សង្គមស៊ីវិល គឺបាត់រូបភាពដើមច្រើន។
កាលពីឆ្នាំ២០២០ មានវិបត្តិកូវីដ-១៩ មីក្រូហិរិញវត្ថុ បានដាក់ចេញគោលការជាច្រើន ដែលគោលការណ៍មួយក្នុងចំណោមនោះ បានជួយសម្រួលការបង់សងត្រឡប់របស់អតិថិជន និងរៀបចំគោលនយោបាយឡើងវិញជូនដល់ប្រជាពលរដ្ឋប្រមាណជាង ៣០ម៉ឺននាក់ ក្នុងទំហំឥណទានសរុបជាង ១៧០០លានដុល្លារ។ លោក តុងងី រៀបរាប់បែបនេះ រួចបន្តថា យន្តការនេះ បានដំណើរការរយៈពេល ២ឆ្នាំហើយ ដែលជាផ្នែកមួយនៃយុទ្ធសាស្រ្តពង្រឹងគុណភាពវិស័យហិរិញវត្ថុនៅកម្ពុជា។
លោក កាំង តុងងី បានបន្ថែមថា អតិថិជនក្នុងវិស័យមូក្រូហិរិញវត្ថុ ត្រូវយល់ពីតម្រូវការខ្លួនឯងឱ្យបានច្បាស់ មុនពេលកម្ចីឥណទាន។ មួយទៀត ការខ្ចីឥណទាន មិនខុសពីការទិញដូរទំនិញនោះទេ ដូច្នេះត្រូវចេះសួរនាំព័ត៌មានលម្អិត និងសិក្សាឱ្យបានច្រើនកន្លែង ដើម្បីប្រៀបធៀបពីតម្លៃ និងលក្ខខណ្ឌផ្សេងៗរបស់សេវាឥណទាន មុនពេលកម្ចី។ បើជួបបញ្ហាអ្វី ត្រូវប្រាប់មន្រ្តីឥណទាន ដើម្បីរួមគ្នារកដំណោះស្រាយ៕