ពីខែមករា-សីហា  អគ្គនាយកដ្ឋានពន្ធប្រមូលចំណូលចូលថវិកាជាតិ បានសរុប ២ ៤៣៩,២៩លានដុល្លារ។ ទំហំថវិកាដែលសម្រេចបាននេះ គឺស្មើនឹង ៨៦,៥១ភាគរយនៃផែនការប្រចាំ ២០២២។​ នេះបើយោងតាមសេចក្តីប្រកាសព័ត៌មានរបស់អគ្គនាយកពន្ធដារ កាលពីថ្ងៃទី១៥កញ្ញា ស្តីពីកិច្ចប្រជុំបូកសរុបលទ្ធផលការងារពន្ធដារខែសីហា និងសម្រាប់រយៈពេល ៨ខែ ឆ្នាំ២០២២។ 
 

ដោយឡែក ចំណូលប្រចាំខែសីហា អគ្គនាយកពន្ធដានប្រមូលបាន ២២៩,១២លានដុល្លារ ដោយកើនក្នុងអត្រា ៨,១៣ភាគរយ ធៀបខែដូចគ្នា កាលឆ្នាំ២០២១។ ​
  

បើតាមលោក គង់ វិបុល អគ្គនាយកនៃអគ្គនាយកដ្ឋានពន្ធដារ កំណើនចំណូលពន្ធនេះ គឺជាលទ្ធផលកំណែទម្រង់ពន្ធដារ ប្រព័ន្ធពន្ធដាររឹងមាំ​ និងការបង់ពន្ធមានតម្លាភាពជាងមុន។ ជាពិសេស ការផ្តល់់សេវាពិគ្រោះយោបល់ជូនអ្នកជាប់ពន្ធ និងសេវាគាំទ្រការប្រើប្រាស់ប្រព័ន្ធនិងកម្មវិធីនានា​(E-Tax service) ព្រមទាំងការអនុវត្តការបំពាក់ឧបករណ៍វាស់ចំណុះស្រាបៀរ និងភេសជ្ជៈគ្មានជាតិសុរាជាដើម។ 
 

កាលឆ្នាំ២០២១ អគ្គនាយកដ្ឋានពន្ធដារប្រមូលចូលជាតិ បាន ២ ២៤៣លានដុល្លារ ដែលលើសផែនការរហូតដល់ជាង២៤ភាគរយ។
 

សូមជម្រាបថា ច្បាប់ស្តីហិរញ្ញវត្ថុសម្រាប់ការគ្រប់គ្រងឆ្នាំ ២០២២ បានកំណត់ការប្រមូលចំណូលពី ពន្ធដារ វិភាគទាន អាករ ផលទុន និងចំណូលនានាឱ្យបានប្រមាណ ៧,៤ពាន់លានដុល្លារ( ៣០ ៥៤៤ ៣៦៦លានរៀល) ក្នុងនោះការប្រមូលចំណូលតាមរយៈអគ្គនាយកដ្ឋានពន្ធដារនឹងសម្រេចឱ្យបាន ២ ៨១៩លានដុល្លារ៕