អន្តរជាតិ
WEF៖ កោះសីស្ហែល មានប្រព័ន្ធអប់រំល្អជាងគេនៅអាហ្វ្រិក
× វេទិកាអប់រំពិភពលោក(World Education Forum) ជារៀងរាល់ឆ្នាំ បានចេញតារាងចំណាត់ថ្នាក់ស្តីពីប្រព័ន្ធអប់រំ ដោយឈរលើមូលដ្ឋានជំនាញអភិវឌ្ឍន៍ និងកត្តាមួយចំនួនទៀត។ ក្នុងចំណោមប្រទេស១៤០ មាន៣៨ពីតំបន់អាហ្វ្រិក។
នារយៈពេលចុងក្រោយនេះ វិស័យអប់រំថ្នាក់មូលដ្ឋាននៅអាហ្វ្រិក ត្រូវបានវាយតម្លៃថា មានស្ថានភាពប្រសើរ ក្នុងជំហានលុបបំបាត់គ្រោះមិនចេះអក្សរ។ ប៉ុន្តែទោះបីជាយ៉ាងណាក៏ដោយ ប្រទេសអាហ្រ្វិកជាច្រើននៅតែជាប្រទេសក្រីក្រ ដែលទាមទារឲ្យមានគោលការណ៍អប់រំច្បាស់លាស់។
អតីតមេដឹកនាំអាហ្វ្រិកខាងត្បូង លោក Nelson Mandela បានលើកឡើងថា «អប់រំគឺជាអាវុធដ៏មានថាមពលបំផុតដែលអ្នកអាចប្រើប្រាស់ដើម្បីផ្លាស់ប្តូរពិភពលោល»។ សម្រាប់ចំណាត់ថ្នាក់ World Education Forum កាលពីឆ្នាំ២០២១ កន្លងមក កោះសីស្ហែល ជាប់ជាប្រទេសដែលមានប្រព័ន្ធអប់រំល្អជាងគេនៅអាហ្វ្រិក។
ស្ថិតនៅអាហ្វ្រិកខាងលិច ដែលមានប្រជាជនជិត១០ម៉ឺននាក់ កោះសីស្ហែល (Seychelles) ជាប្រជាជាតិតែមួយនៅអាហ្វ្រិកដែលសម្រាប់បានគោលនយោបាយ «អប់រំសម្រាប់ទាំងអស់គ្នា» របស់អង្គការយូណេស្កូ។ ដែនកោះមួយនេះ ជារដ្ឋអាហ្វ្រិកតែមួយគត់ដែលស្ថិតក្នុងចំណោម Top 50 នៃចំណាត់ថ្នាក់ប្រព័ន្ធអប់រំរបស់ WEF ពោលគឺលេខ៤៣ ដោយឈរលើអ៊ុយក្រែន ហុងគ្រី រុស្ស៊ី និងអេមីរ៉ាតអារ៉ាប់រួម។
ទុយនីស៊ី ស្ថិតនៅចំណាត់ថ្នាក់លេខ២ប្រចាំទ្វីប និងលេខ៧១លើពិភពលោក ដោយថវិកាជាតិ២០ភាគរយនៃប្រទេសនេះ ត្រូវប្រើប្រាស់លើវិស័យអប់រំ។ កោះម៉ូរីស, អាហ្វ្រិកខាងត្បូង និង អាល់ហ្សេរី ស្ថិតក្នុងចំណោម Top 5 ក្នុងតំបន់។
ប្រទេសអាហ្វ្រិក៥ទៀត ដែលមានប្រព័ន្ធអប់រំល្អផងដែរនោះ មានដូចជា បុតស្វាណា, កេនយ៉ា, កាប់វែរ, អេហ្ស៊ីប និងណាមីប៊ី។ នេះបើតាមតារាងចំណាត់ថ្នាក់ឆ្នាំ២០២១ របស់ WEF៕
© រក្សាសិទ្ធិដោយ thmeythmey.com