អន្តរជាតិ
នយោបាយអន្តរជាតិ
ទីភ្នាក់ងារ UN៖ មនុស្សជិត១លាននាក់កំពុងប្រឈមមុខនឹងបញ្ហាកង្វះអាហារ
× ទីភ្នាក់ងារអង្គការសហប្រជាជាតិ (UN) នៅថ្ងៃទី២១ ខែកញ្ញាបានព្រមានពីបញ្ហាដ៏អាក្រក់ដែលមនុស្សប្រមាណ១លាននាក់កំពុងតែជួបប្រទះនឹងវិបត្តិកង្វះស្បៀងអាហារក្នុងឆ្នាំនេះ ដោយសារតែអវត្តមាននៃជំនួយ និងបញ្ហាពិភពលោកផ្សេងៗរួមទាំងជម្លោះនៅអ៊ុយក្រែន។
ជម្លោះក្នុងតំបន់ ស្របជាមួយការប្រែប្រួលអាកាសធាតុយ៉ាងខ្លាំងក្លា ជាកត្តាចម្បងដែលនាំឱ្យមានវិបត្តិកង្វះស្បៀងអាហារដ៏អាក្រក់។ បន្ថែមពីនេះ អស្ថិរភាពសេដ្ឋកិច្ច ជំងឺកូវីដ-១៩ និងសង្គ្រាមនៅអ៊ុយក្រែន ក៏ជាកត្តាចម្បងផ្សេងៗដែលធ្វើឱ្យបញ្ហាមួយនេះរឹតតែធ្ងន់ធ្ងរទៅមួយកម្រិតទៀត។ អ៊ុយក្រែន ជាប្រទេសនាំចេញគ្រាប់ធញ្ញជាតិធំជាងគេលំដាប់ទីបួន ខណៈរុស្ស៊ីស្ថិតក្នុងលំដាប់៣ និងលំដាប់ទី១ ក្នុងការនាំចេញជីសម្រាប់កសិកម្ម ហេតុនេះសង្គ្រាមរវាងប្រទេសទាំងពីរធ្វើឱ្យប៉ះពាល់ដល់ការផ្គត់ផ្គង់ស្បៀងអាហារដ៏សំខាន់។
«គ្រោះរាំងស្ងួតដ៏អាក្រក់នៅតំបន់ឧបទ្វីបអាហ្វ្រិកខាងកើតបានជំរុញឱ្យប្រជាជន ប្រឈមនឹងកង្វះស្បៀងអាហារ។ អសន្តិសុខស្បៀងអាហារកំពុងតែកើនឡើងយ៉ាងឆាប់រហ័ស និងរីករាលដាលពេញពិភពលោក»។ ប្រធានអង្គការស្បៀងអាហារនិងកសិកម្ម (FAO) លោក Qu Dongyu បានលើកឡើងបែបនេះរួចបន្តថា ប្រសិនបើគ្មានការឆ្លើយតបផ្នែកមនុស្សធម៌ឱ្យបានទូលំទូលាយជាងមុននោះទេ ស្ថានភាពនឹងប្រែអាក្រក់ជាងនេះទៅទៀត។
ដើម្បីដោះស្រាយវិបត្តិមួយនេះ នៅចំពោះមុខមេដឹកនាំពិភពលោកដ៏ទៃទៀតក្នុងមហាសន្និបាត ប្រធានាធិបតីអាម៉េរិក ចូ បៃឌិន បានប្រកាសផ្ដល់ជំនួយ២,៩ពាន់លានដុល្លារដើម្បី ដោះស្រាយបញ្ហាអសន្តិសុខស្បៀងអាហារ។ ជំនួយនេះបន្ថែមពីលើជំនួយ៦,៩ពាន់លានដុល្លារដែលអាម៉េរិកបានផ្ដល់ឱ្យក្នុងឆ្នាំនេះ៕
© រក្សាសិទ្ធិដោយ thmeythmey.com