ឥណ្ឌាកំពុងរង់ចាំព័ស្តុតាងពីអង្គការសុខភាពពិភពលោក (WHO) ជុំវិញការលើកឡើងថា ថ្នាំក្អកប្រភេទទឹកផលិតដោយក្រុមហ៊ុនឱសថឥណ្ឌាចំនួន៤ប្រភេទ មានទំនាក់ទំនងជាមួយការស្លាប់របស់កុមារជាង៦០នាក់នៅហ្គំប៊ី។ នេះបើតាមការបញ្ជាក់របស់មន្ត្រីសុខាភិបាលឥណ្ឌានៅថ្ងៃទី៦ ខែតុលា។ ទីភ្នាក់ងារអង្គការសហប្រជាជាតិ (UN) អះអាងថាថ្នាំប្រភេទនេះបណ្តាលឱ្យខូចក្រលៀន។
អង្គការសុខភាពពិភពលោក (WHO) នៅថ្ងៃទី៥ ខែតុលា បានចេញការប្រកាសអាសន្នថា ថ្នាំក្អកប្រភេទទឹកដែលផលិតដោយក្រុមហ៊ុនឥណ្ឌា Maiden Pharmaceuticals ទំនងជាជាប់ទាក់ទងនឹងការស្លាប់របស់កុមារនៅហ្គំប៊ីយ៉ាងហោចណាស់៦៦នាក់។ បច្ចុប្បន្ននេះ ឥណ្ឌាកំពុងរង់ចាំព័ស្តុតាងពី WHO ដើម្បីបញ្ជាក់។
លោក Tedros Adhanom Ghebreyesus អគ្គនាយក WHO បានប្រាប់ទីភ្នាក់ងារព័ត៌មាន Reuter ថា ទីភ្នាក់ងារ UN និងនិយតករឱសថរបស់ឥណ្ឌា រួមជាមួយក្រុមហ៊ុនផលិតថ្នាំ Maiden Pharmaceuticals កំពុងស៊ើបអង្កេតការស្លាប់កុមារអាហ្វ្រិក ដោយសារពួកគេសុទ្ធតែមានបញ្ហាក្រលៀនធ្ងន់ធ្ងរ។
«ការស៊ើបអង្កេតបន្ទាន់ត្រូវបានរៀបចំហើយភ្លាមៗបន្ទាប់ពីទទួលបានដំណឹងពីការពិភាក្សារបស់ WHO ផ្អែកលើព័ត៌មានដែលមាន»។ មន្ត្រីសុខាភិបាលឥណ្ឌាមួយរូបបានអះអាងបែបនេះ មុនបន្ថែមថា ឥណ្ឌាកំពុងរង់ចាំរបាយការណ៍បញ្ជាក់ពីទំនាក់ទំនងរវាងឱសថ និងការស្លាប់របស់កុមារចេញពី WHO។
ផលិតផលថ្នាំក្អកប្រភេទទឹកចំនួន៤ របស់ក្រុមហ៊ុនឱសថឥណ្ឌា Maiden ដែលកំពុងជាប់សង្ស័យបង្កគ្រោះថ្នាក់រួមមាន Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup។
បើតាមការលើកឡើងរបស់ WHO ការវិភាគរបស់មន្ទីរពិសោធនៃក្រុមហ៊ុនឱសថព្យាបាលក្អក Maiden ផ្ទាល់ក៏ព្រមទទួលស្គាល់ថា បរិមាណសារធាតុគីមី diethylene glycol និង ethylene glycol មានកម្រិតខ្ពស់នៅក្នុងថ្នាំក្អកនោះដែលអាចធ្វើឱ្យអ្នកប្រើពុល និងបំផ្លាញក្រលៀនធ្ងន់ធ្ងរ។
ទាក់ទិននឹងភាគីហ្គំប៊ីដែលជាប្រទេសរងគ្រោះ លោក Mustapha Bittaye ប្រធាននាយកដ្ឋានផ្ដល់សេវាសុខភាព បានប្រាប់ទីភ្នាក់ងារព័ត៌មាន Reuters ថាចំនួនអ្នកស្លាប់បានធ្លាក់ចុះក្នុងរយៈពេលប៉ុន្មានសប្តាហ៍ចុងក្រោយនេះ ហើយប្រទេសនេះក៏បានហាមឃាត់ការលក់ថ្នាំទឹកបំបាត់ក្អករបស់ក្រុមហ៊ុន Maiden ហើយដែរ។
យ៉ាងណាមិញ ក្រុមហ៊ុននេះទើបតែបានផលិត និងនាំចេញឱសថប្រភេទទឹកព្យាបាលក្អកជាផ្លូវការទៅហ្គំប៊ីតែមួយប្រទេសប៉ុណ្ណោះ ខណៈប្រទេសផ្សេងបានលក់ចែកចាយតាមទីផ្សារមិនផ្លូវការក្នុងបរិមាណតិចតួច។
គួរបញ្ជាក់ថា ការស្លាប់របស់កុមារយ៉ាងហោចណាស់ ៦៦នាក់នៅអាហ្រ្វិកខាងលិច ជាការបំផ្លាញមុខមាត់របស់ឥណ្ឌាយ៉ាងខ្លាំងខណៈកន្លងមក ប្រទេសអាស៊ីខាងត្បូងមួយនេះជាឱសថស្ថានពិភពលោក ដែលផ្គត់ផ្គង់ថ្នាំដល់គ្រប់ទ្វីប ជាពិសេសទៅឱ្យអាហ្វ្រិក៕