ថ្លែងប្រាប់សារព័ត៌មានថ្មីៗ ក្នុងសន្និសីទសារព័ត៌មាន មហោស្រពជាតិ ភាពយន្តខ្នាតខ្លី លើកទី៣ ឆ្នាំ២០២២ លោក ប៉ុក បូរក្ស នាយកដ្ឋានភាពយន្តខ្មែរ ពន្យល់ថា ការកម្សាន្តផ្សេងៗតាមបណ្តាញសង្គម មិនមែនជាទម្រង់ភាពយន្តខ្នាតខ្លីឡើយ។ រឿងកំប្លែងខ្លី រូបភាពសម្តែងមួយចំនួន និង ការផលិតមិនដូចគ្នាទាំងស្រុងនោះទេ ដោយសារតែពួកគេមិនមានខ្លឹមសារសាច់រឿងច្បាស់លាស់។ 

 

 

លោក បូរក្ស ឡើកឡើងដូច្នេះថា៖ « ពេលខ្លះគាត់ប្រើតែទូរសព្ទមួយ ថតហើយយកមកកាត់ យកទៅដាក់ផ្សាយបាន ហើយគ្មានមាតិការ គ្មានអ្នកដឹកនាំ ថត និពន្ធ ឬ បច្ចេកទេស អីទេ ដែលវាបង្ហាញពីផលប៉ះពាល់ជាច្រើន។ យើងផ្តល់សិទ្ធឱ្យអ្នកផលិតទាំងនោះ តែកុំឱ្យលើស ឬ បំពានច្បាប់នៃប្រទេស។ អ៊ីចឹងយើងធ្វើសិក្ខាសាលាបង្រៀនពួកគាត់ ក្នុងដំណើរការផលិតឱ្យយល់ថា ​អ្វីទៅជារូបភាពអាសអាភាស? អ្វីជាអំពើហិង្សា? អ្វីជាផលប៉ះពាល់ក្នុងការផលិតវីដែអូ ឬ ភាពយន្ត? បើសិនពួកគាត់យល់បានហើយ នឹងអាចទប់ស្កាត់ផលប៉ះពាល់បាន ព្រោះអីនៅក្នុងហ្វេសប៊ុកមិនបានកំណត់អាយុអ្នកមើលទេ។ អ្វីដែលសំខាន់គឺ អប់រំអ្នកផលិតហ្នឹង យន្តការអប់រំ ណែនាំ ករណីរឹងរួស យើងនឹងមានវិធានការតាមផ្លូវច្បាប់ ដែលសហការជាមួយស្ថាប័នមានសមត្ថកិច្ច ដើម្បីកសាងសំណុំរឿងតែម្តង»។

 

បន្ថែមពីលើនេះទៀត លោក ប៉ុក បូរក្ស  ប្រធាននាយកដ្ឋានភាពយន្តខ្មែរ បានអំពាវនាវដល់ឪពុកម្តាយគ្រប់រូបចូលរួមអប់រំកូនចៅ និងបង្រៀនពួកគេឱ្យប្រើទូរសព្ទក្នុងដៃប្រកបដោយការពិចារណា ដោយមិនគួរបណ្តែតបណ្តោយតាមតែចិត្តពួកគេពេកទេ។  ពិសេសការមើលវីដេអូបែបស្រើបស្រាល ឬ ប្រើសម្ដីមិនសមរម្យលើសពីអាយុពួកគេពេក។

 

ប្រធាននាយកដ្ឋានភាពយន្តខ្មែររូបនេះសង្កត់ធ្ងន់ថា៖ « បើសិនមានការគ្រប់គ្រងពីឪពុកម្តាយ នោះគុណវិបត្តិនឹងកាត់បន្ថយបានច្រើន។ យុគសម័យបច្ចេកវិទ្យា ៤.០ យើងឃើញហើយថាវាលឿនណាស់! យើងទទួលបានគ្រប់មធ្យោបាយទាំងអស់។ អ៊ីចឹងក៏មានការចូលរួមពីមន្រ្តីវប្បធម៌  ពីឪពុកម្តាយ និងគ្រប់ភាគីពាក់ព័ន្ធក្នុងការទប់ស្កាត់។ បើក្រសួងម្នាក់ឯងគ្រប់រឿង ខ្ញុំជឿថាមិនអាចចាប់ឆ្វេង ចាប់ស្តាំបានទាំងអស់នោះទេ៕