កីឡាករ-កីឡាការិនី គុនល្បុក្កតោកម្ពុជា ២៨រូបនឹងចេញដំណើរទៅប្រទេសឥណ្ឌូណេស៊ី ដើម្បីចូលរួមហ្វឹកហាត់ក្បាច់គុន បញ្ចសិលា រយៈពេលវែងរហូតដល់ការប្រកួតកីឡាស៊ីហ្គេមឆ្នាំ២០២៣តែម្តង។ ក្រៅពីកីឡាករគុនល្បុក្កតោ ក៏មានគ្រូបង្វឹកកីឡាគុនល្បុក្កតោ២រូប ដែលត្រូវបានអញ្ជើញទៅកាន់ប្រទេសឥណ្ឌូណេស៊ីដើម្បីបង្វឹកគុនល្បុក្កតោដល់អត្តពលិកឥណ្ឌូណេស៊ីផងដែរ។

 

លោក អ៊ូ តារា អគ្គលេខាធិការសហព័ន្ធកីឡាគុនល្បុក្កតោកម្ពុជាថា ការចេញទៅហ្វឹកហាត់នៃអត្តពលិកកីឡាគុនល្បុក្កតោកម្ពុជា គឺមានរយៈពេលវែងដើម្បីពង្រឹងសមត្ថភាពត្រៀមប្រជែងមេដាយក្នុងព្រឹត្តិការណ៍ប្រវត្តិសាស្រ្តដំបូងនៅកម្ពុជា។

 

លោក  អ៊ូ តារា បន្ថែមថា៖«ការបញ្ជូនកីឡាករ-កីឡាការិនីទៅឥណ្ឌូណេស៊ី ទៅហ្វឹកហាត់ក្បាច់គុនបញ្ចសិលា(Penchak Silat) គឺវាដាច់ដោយឡែកពីប្រភេទវិញ្ញាសាល្បុក្កតោ។ ការចេញទៅគឺយកកីឡាករល្បុក្កតោទៅហាត់ បញ្ចសិលា (Penchak Silat) ហ្នឹងទេ ព្រោះដោយសារនៅស៊ីហ្គេម ឆ្នាំ២០២៣ ហ្នឹងយើងមានវិញ្ញាសា ល្បុក្កតោរបស់កម្ពុជា និងបច្ចសិលា(Penchak Silat) របស់ឥណ្ឌូណេស៊ីផង តាមការយល់ព្រមក្រោយពីជំនួបរវាងរដ្ឋមន្រ្តីការពារជាតិឥណ្ឌូណេស៊ី និងសម្តេចតេជោ»។ លោក អ៊ូ តារា ប្រាប់សារព័ត៌មានថ្មីៗដូច្នេះ តាមរយៈសារសម្លេង។

 

គួរបញ្ជាក់ថា អត្តពលិក និងគ្រូបង្វឹកកីឡាគុនល្បុក្កតោកម្ពុជា ចេញដំណើរទៅប្រទេសឥណ្ឌូណេស៊ី នៅថ្ងៃទី១២ ខែតុលា ឆ្នាំ២០២២ ហើយនឹងវិលមកវិញនៅខែមករា ឆ្នាំ២០២៣ ដើម្បីប្រកួតសាកល្បងសមត្ថភាព រួចបន្តទៅហ្វឹកហាត់នៅឥណ្ឌូណេស៊ី វិញរហូតដល់ស៊ីហ្គេម ឆ្នាំ២០២៣៕