លោក Chia Min Chong ចាប់អារម្មណ៍វិស័យកីឡាបាល់ទះនៅកម្ពុជា តាំងពីឆ្នាំ២០១៩ មកម្លេះដោយលោកមើលឃើញភាពរីកចម្រើននៃក្រុមកីឡាបាល់ទះជម្រើសជាតិកម្ពុជា ពីមួយឆ្នាំទៅមួយឆ្នាំមានការវិវឌ្ឍន៍ទៅមុខជាលំដាប់។ ជាមួយនឹងការប្រជែងបានមេដាយសំរឹទ្ធ ពីព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាម សហព័ន្ធកីឡាបាល់ទះសិង្ហបុរី បានជួបពិភាក្សាជាមួយសហព័ន្ធកីឡាបាល់ទះកម្ពុជា អំពីការរៀបប្រកួតមិត្តភាពអន្តរជាតិសាកល្បងសមត្ថភាពមុនស៊ីហ្គេម២០២៣។

 

«ខ្ញុំគិតថា កម្ពុជាពិតជាបានអភិវឌ្ឍវិស័យកីឡាបាល់ទះ គឺបានល្អប្រសើរខ្លាំងមែនទែន។ នេះហើយបានជាយើងចង់សាកថ្វីដៃជាមួយប្រទេសដែលខ្លាំង(កម្ពុជា)»។ នេះបើតាមការបញ្ជាក់ពីលោក Chia Min Chong អគ្គលេខាធិការសហព័ន្ធកីឡាបាល់ទះសិង្ហបុរី នាព្រលានយន្តហោះអន្តរជាតិភ្នំពេញ ជាមួយនឹងការទទួលស្វាគមន៍យ៉ាងកក់ក្តៅពីសំណាក់មន្រ្តីសហព័ន្ធកីឡាបាល់ទះកម្ពុជា លោក អាំង សិរីពិសិដ្ឋ អគ្គលេខាធិការសហព័ន្ធកីឡាបាល់ទះកម្ពុជា។

 

គួរបញ្ជាក់ថា ព្រឹត្តិការណ៍នៃការប្រកួតកីឡាបាល់ទះលក្ខណៈមិត្តភាពអន្តរជាតិ នេះដែរគឺជាលើកដំបូងរបស់កម្ពុជា ដែលកន្លងមកគឺពុំធ្លាប់មាននោះទេ នេះបើតាមការបញ្ជាក់ពីលោក អាំង សិរីពិសិដ្ឋ សហព័ន្ធកីឡាបាល់ទះកម្ពុជា ប្រាប់សារព័ត៌មានថ្មីៗ។ ការប្រកួតនឹងប្រព្រឹត្តទៅនៅថ្ងៃទី១៥ ខែតុលា នាទីលានបាល់ទះក្នុងសាល កីឡដ្ឋានព្រីនស៍៕