ក្នុងថ្ងៃទី១៦ ខែតុលា បក្សកុម្មុយនីស្តចិន បានបើកសមាជជាតិលើកទី២០ នៅវិមានប្រជាជនចិន នាក្រុងប៉េកាំង ដោយមានការចូលរួមពីតំណាងបក្សមកពីខេត្ត និងតំបន់ប្រមាណ ២៣០០នាក់។ នាពិធីបើកនេះ លោកស៊ី ជិនភីង អគ្គលេខាធិការបក្សកុម្មុយនីស្ត និងជាប្រធានាធិបតីចិនផងនោះ បានថ្លែងសុន្ទរកថាជាង ១ម៉ោង ដោយក្នុងនោះរួមទាំងការធ្វើទំនើបកម្មយោធាផង ខណៈពេលពិភពលោកកំពុងមានភាពស្មុគស្មាញជាច្រើន។ 

 

«យើងនឹងពន្លឿនការធ្វើទំនើបបកម្មយោធា ទាហាន និងអាវុធ»។ លោកស៊ី បានសង្កត់ធ្ងន់បែបនេះនៅចំពោះមុខតំណាងសមាជិកបក្សកុម្មុយនីស្ត មុនបន្តថា ចិននឹងពង្រឹងសមត្ថភាពយុទ្ធសាស្រ្តរបស់យោធាចិនផង។ 

 

បើតាមលោកស៊ី កងទ័ពរំដោះប្រជាជនចិន (PLA) មានតួនាទីការពារផលប្រយោជន៍ជាតិ និងសេចក្តីថ្លៃថ្នូរបស់ចិន។ ចិន ជាប្រទេសទីពីរ ដែលបានចំណាយថវិកាលើយោធាច្រើនបំផុត បន្ទាប់ពីអាម៉េរិក។ តាមការចុះផ្សាយរបស់ទីភ្នាក់ងារព័ត៌មាន Xinhua នាពេលកន្លងមក រដ្ឋាភិបាលចិនបានប្រកាសថវិកាចំណាយលើវិស័យការពារជាតិមានចំនួន ២២៩ពាន់លានដុល្លារ សម្រាប់ឆ្នាំ២០២២។ ទិន្នន័យនេះ គឺកើនឡើងប្រមាណ ៧,១ភាគរយ បើធៀបនឹងឆ្នាំ២០២១។ 

 

សូមបញ្ជាក់ថា ក្នុងសមាជជាតិលើកទី២០ នេះ លោកស៊ី ត្រូវបានរំពឹងថា នឹងបន្តកាន់តំណែងជាអគ្គលេខាធិការបក្សកុម្មុយនីស្តចិន ក្នុងអាណត្តិទីបី បន្ទាប់ពីកាន់តំណែងកំពូលមួយនេះ ចាប់តាំងពីឆ្នាំ២០១២ មក៕