អន្តរជាតិ
លោក លី សៀនឡុង៖ សិង្ហបុរីនិងអូស្ត្រាលីសម្លឹងមើលយុទ្ធសាស្ត្រថ្មីដើម្បីពង្រឹងកិច្ចសហប្រតិបត្តិការ នាយករដ្ឋមន្ត្រីសិង្ហបុរី លី សៀនឡុង ចាប់ដៃសមភាគីអូស្ត្រាលី អាន់តូនី អាល់បានីស។ រូបថត AFP
× នាយករដ្ឋមន្ត្រីសិង្ហបុរី លី សៀនឡុង បានលើកឡើងនៅថ្ងៃទី១៨ ខែតុលាថា សិង្ហបុរី និងអូស្ត្រាលីនឹងស្វែងរកយុទ្ធសាស្ត្រកិច្ចសហប្រតិបត្តិការថ្មីដូចជាការធ្វើការលើខ្សែច្រវាក់ផ្គត់ផ្គង់ និងការតភ្ជាប់ជាមួយប្រទេសផ្សេងៗលើពិភពលោកផ្សេងទៀត។ ប្រទេសទាំងពីរ ក៏បានគាំទ្រការច្នៃប្រឌិតថាមពលស្អាតផងដែរ។
ថ្លែងនៅក្នុងសន្និសីទសារព័ត៌មានរួមគ្នាមួយនៅទីក្រុងកង់បេរ៉ាបន្ទាប់ពីកិច្ចប្រជុំប្រចាំឆ្នាំរបស់មេដឹកនាំអូស្ត្រាលី-សិង្ហបុរីលើកទីប្រាំពីរជាមួយសមភាគីអូស្ត្រាលីលោកអាន់តូនី អាល់បានីស លោក លី សៀនឡុង អះអាងថា ប្រទេសទាំងពីរបានចុះហត្ថលេខាលើកិច្ចព្រមព្រៀងសេដ្ឋកិច្ចបៃតងសិង្ហបុរី-អូស្ត្រាលី និងជជែកពីវិស័យថ្មីក្នុងកិច្ចសហប្រតិបត្តិការទ្វេភាគី។
«ពួកយើងក៏បានធ្វើការលើផ្នែកផ្សេងទៀតដើម្បីទទួលយកកិច្ចសហប្រតិបត្តិការទ្វេភាគីរបស់យើងបន្ថែមដូចជាការចុះកិច្ចព្រមព្រៀងសេដ្ឋកិច្ចបៃតងសិង្ហបុរី-អូស្ត្រាលីដែលនឹងគាំទ្រដល់ការផ្លាស់ប្តូរនៃប្រទេសទាំងពីរក្នុងការគ្មានការបំភាយឧស្ម័នហើយក្នុងពេលជាមួយគ្នានេះជំរុញកំណើនសេដ្ឋកិច្ច និងបង្កើតការងារនៅក្នុងវិស័យបៃតង»។ លោក លី លើកឡើងបែបនេះរួចបន្តថា លោកក៏សង្ឃឹមឱ្យប្រទេសផ្សេងៗធ្វើសកម្មភាពស្រដៀងគ្នានេះក្នុងការសហការគ្នាដោះស្រាយបញ្ហាពិភពលោក។
ទន្ទឹមនេះ លោក អាល់បានីស និយាយថា កិច្ចព្រមព្រៀងសេដ្ឋកិច្ចបៃតងផ្តល់សញ្ញាបង្ហាញការដោះស្រាយរួមគ្នាមួយចំពោះបញ្ហាប្រឈមនានារវាងអូស្ត្រាលី និងសិង្ហបុរី។
«វានឹងគាំទ្រដល់ការច្នៃប្រឌិតថាមពលស្អាត ឱកាសអាជីវកម្ម និងបង្កើតឱកាសការងារ និងជួយផ្តល់គោលដៅនៃការបំភាយឧស្ម័នរបស់យើងខណៈពេលដែលដាក់ប្រទេសអូស្ត្រាលីជាមហាអំណាចថាមពលកកើតឡើងវិញ»។ មេដឹកនាំអូស្ត្រាលីបានបញ្ជាក់បែបនេះ។
ជាមួយគ្នានេះ មេដឹកនាំទាំងពីរក៏មើលឃើញថា ប្រទេសទាំងពីរជា ដៃគូពីធម្មជាតិដែលចែករំលែកទស្សនៈស្រដៀងគ្នាលើបញ្ហាជាច្រើន។ ដូច្នេះប្រទេសទាំងពីរកំពុងស្វែងរកមើលយុទ្ធសាស្ត្រសហការគ្នាក្នុងផ្នែកថ្មីៗ និងពង្រឹងសុវត្ថិភាព និងភាពធន់នៃខ្សែច្រវាក់ផ្គត់ផ្គង់ និងស្បៀងអាហារ ក៏ដូចជាថាមពល និងការតភ្ជាប់ទៅកាន់ពិភពលោកផ្សេងទៀត។ ប្រទេសទាំងពីរក៏បានសន្យាគ្នាក្នុងការជួយគ្នាទៅវិញទៅមកក្នុងវិបត្តិផ្សេងៗតាមរយៈការសម្រួលលំហូរទំនិញសំខាន់ៗ៕
Tag:
សិង្ហបុរី
អូស្ត្រាលី
© រក្សាសិទ្ធិដោយ thmeythmey.com