ជាមួយសំឡេងគាំទ្រសរុប២៨៧នៃវត្តមានសមាជិកសភា៣៥២នាក់ សភាអ៊ុយក្រែននៅថ្ងៃទី១៨ ខែតុលា អនុម័តលើសេចក្តីសម្រេចមួយដែលគាំទ្រសាធារណរដ្ឋឆេឈិន ឬឆេឈ្នី ជាទឹកដីគ្រប់គ្រងបណ្តោះអាសន្នដោយរុស្ស៊ី។ 

 

សេចក្តីសម្រេចដែលសភាអ៊ុយក្រែនអនុម័តនោះ យោងតាមសេចក្តីប្រកាសរបស់សភាជាតិរបស់ប្រជាជនឆេឈ្នីនៅឆ្នាំ១៩៩០ស្តីពីការប្រកាសអធិបេតយ្យភាពរបស់រដ្ឋឆេឈ្នី ដោយផ្អែកលើគោលការណ៍សិទ្ធិស្វ័យសម្រេចរបស់ប្រជាជនឆេឈ្នី ដែលមានចែងក្នុងធម្មនុញ្ញអង្គការសហប្រជាជាតិ ក៏ដូចជាការប្រកាសឯករាជ្យរបស់រដ្ឋនេះក្រោយសហភាពសូវៀតដួលរលំ។

 

សេចក្តីសម្រេចនេះដែរក៏បានថ្កោលទោសរុស្ស៊ីដែលអ៊ុយក្រែនចាត់ទុកថាជាឧក្រិដ្ឋកម្មសង្រ្គាមប្រឆាំងប្រជាជនឆេឈ្នីដែរ។ រុស្ស៊ី និងសាធារណរដ្ឋឆេឈ្នី ធ្វើសង្រ្គាមពីរដងនៅឆ្នាំ ១៩៩៤-១៩៩៦ និង១៩៩៩-២០០៩ នៅពេលរដ្ឋមួយនេះប៉ុនប៉ងប្រកាសឯករាជ្យ។ បច្ចុប្បន្ន សាធារណរដ្ឋនេះ គ្រប់គ្រងដោយមេដឹកនាំលោក Ramzan Kadyrov ដែលចាត់តាំងដោយរុស្ស៊ី។ 

 

ពាក្យទឹកដីគ្រប់គ្រងបណ្តោះអាសន្នដោយរុស្ស៊ីដែលអ៊ុយក្រែនប្រើសំដៅលើសាធារណរដ្ឋឆេឈ្នី នេះដូចទៅនឹងអ៊ុយក្រែនហៅទឹកដីរបស់ខ្លួនដែលត្រូវបានរុស្ស៊ីលេបដែររួមមានតំបន់គ្រីមេ សាធារណរដ្ឋដូណេត្យ សាធារណរដ្ឋលូហាន តំបន់ Kherson និងតំបន់ Zaporizhzhia៕