ក្រោយរុស្ស៊ីបានដាក់តំបន់ចំនួន៤ ដូចជា តំបន់ Donetsk, តំបន់ Luhansk, តំបន់ Zaporizhzhia និងតំបន់ Kherson កម្លាំងអ៊ុយក្រែនបានដណ្តើមដែនដីខ្លះៗជាបន្តបន្ទាប់។ ទំនងពាក់ព័ន្ធនឹងការវាយបករបស់កម្លាំងយោធាអ៊ុយក្រែន ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសប្រើច្បាប់អាជ្ញាសឹកលើតំបន់ទាំងនោះ។ 

 

«ខ្ញុំចុះហត្ថលេខាលើក្រឹត្យ ដើម្បីប្រើប្រាស់ច្បាប់អាជ្ញាសឹកនៅក្នុងតំបន់ទាំង ៤ ដែលជាដែនដីរបស់សហព័ន្ធរុស្ស៊ី»។ លោកពូទីន បានសង្កត់ធ្ងន់បែបនេះ នៅក្នុងកិច្ចប្រជុំជាមួយក្រុមប្រឹក្សាសន្តិសុខរុស្ស៊ី ដែលត្រូវបានចាក់ផ្សាយតាមទូរទស្សន៍ ដោយបន្តថា រដ្ឋាភិបាលទីក្រុងកៀវ បានបដិសេធមិនទទួលស្គាល់ឆន្ទៈ និងជម្រើសរបស់ប្រជាជន ហើយបានបដិសេធសំណើទាំងឡាយ ក្នុងការចរចា។ 

 

ការលើកឡើងរបស់លោកពូទីនខាងលើ គឺសំដៅដល់ការធ្វើប្រជាមតិនៅក្នុងតំបន់ទាំងបួននាពេលកន្លងមក។ មិនតែប៉ុណ្ណោះ ដោយមានការវាយប្រហារពីអ៊ុយក្រែន ក្នុងកិច្ចប្រជុំដដែលនោះ លោកពូទីន បានចោទថា ក្រុងកៀវបានប្រើប្រាស់វិធីសាស្រ្តភេរវករ។ ត្រង់ចំណុចនេះ មេដឹកនាំរុស្ស៊ីរូបនេះ បានបញ្ជាក់ថា អ៊ុយក្រែនបានបញ្ជូនក្រុមបំផ្លិចបំផ្លាញមកក្នុងដីខ្លួន ប៉ុន្តែត្រូវបានរុស្ស៊ីបង្អាក់មួយ បន្ទាប់ពីមានការវាយប្រហារលើស្ពានភ្ជាប់តំបន់គ្រីមេ។ នេះបើតាមការចុះផ្សាយរបស់សារព័ត៌មាន Moscow Times។ 

 

តាមការបង្ហោះក្រឹត្យលើវេបសាយវិមានក្រេមឡាំង ច្បាប់អាជ្ញាសឹកនេះ នឹងចាប់ផ្តើមអនុវត្តពីថ្ងៃទី២០ ខែតុលាទៅ។ ក្រោមច្បាប់រុស្ស៊ីមួយនេះ អាជ្ញាធរមានអំណាចខ្លាំង ក្នុងការដាក់ចេញបម្រាមគោចរ រឹតត្បិតការធ្វើដំណើរនៅក្នុងប្រទេស រួមទាំងការត្រួតពិនិត្យដោយកម្លាំងយោធាជាដើម។ យ៉ាងណាមិញ ច្បាប់អាជ្ញាសឹកនេះ តម្រូវឱ្យមានការឯកភាពពីព្រឹទ្ធសភារុស្ស៊ី (The Federation Council) មុនវាត្រូវបានប្រើប្រាស់ជាផ្លូវការ៕