អន្តរជាតិ
ចិនសន្យាបន្តគាំទ្រពហុភាគីនិយម និងលើកកម្ពស់កិច្ចសហប្រតិបត្តិការសកល អ្នកនាំពាក្យក្រសួងការបរទេសចិន Wang Wenbin ។ រូបថតក្រសួងការបរទេសចិន
× អ្នកនាំពាក្យរដ្ឋមន្ត្រីការបរទេសចិន Wang Wenbin លើកឡើងនៅថ្ងៃទី១៩ ខែតុលាថា ទោះបីជាស្ថានភាពពិភពលោកផ្លាស់ប្តូរយ៉ាងណាក៏ដោយ ចិននឹងនៅតែប្តេជ្ញាចិត្តក្នុងការការពារពហុភាគីនិយម លើកកម្ពស់អភិបាលកិច្ចសកល និងជំរុញកិច្ចសហប្រតិបត្តិការជាសកលផងដែរ។ លោក Wang ក៏បង្ហាញពីការចូលរួមយ៉ាងសកម្មរបស់ចិនជាមួយស្ថាប័ន និងសមាគមអន្តរជាតិផងដែរ។
ថ្លែងក្នុងសន្និសីទកាសែតជាប្រចាំនៅថ្ងៃទី១៩ ខែតុលា អ្នកនាំពាក្យក្រសួងការបរទេសចិន Wang Wenbin បញ្ជាក់ថា ចិនតែងតែឈរនៅលើជំហរមួយនៃការឯកភាពគ្នានិងកិច្ចសហប្រតិបត្តិក្នុងការកែលម្អប្រព័ន្ធអភិបាលកិច្ចសកលតាមរយៈការធ្វើកំណែទម្រង់ និងបានខិតខំកសាងទំនាក់ទំនងអន្តរជាតិប្រភេទថ្មីដែលបង្ហាញពីការគោរពគ្នាទៅវិញទៅមក និងយុត្តិធម៌។
បើតាមអ្នកនាំពាក្យដដែល ចិនក៏ជាអ្នកដែលជួយរក្សាសណ្ដាប់ធ្នាប់អន្តរជាតិបច្ចុប្បន្ន និងប្រកាន់ខ្ជាប់យ៉ាងមុតមាំចំពោះប្រព័ន្ធអន្តរជាតិជាមួយអង្គការសហប្រជាជាតិ (UN) និងអង្គការពាណិជ្ជកម្មពិភពលោក (WTO ។ លោក Wang សង្កត់ធ្ងន់ទៀតថា ក្នុងរយៈពេលមួយទសវត្សរ៍កន្លងមកនេះ ចិនក្លាយជាអ្នករួមចំណែកធំទីពីរដល់ UN និងការរក្សាសន្តិភាព ហើយបំពេញការប្តេជ្ញាចិត្តក្នុងការចូលជាសមាជិក WTO ដោយបានកាត់បន្ថយកម្រិតពន្ធនាំចូលសរុបពី១៥,៣ភាគរយមក៧,៤ភាគរយ។
ទន្ទឹមនេះ មន្រ្តីដដែលលើកឡើងថា ចិនបានសម្រេចគោលដៅអភិវឌ្ឍន៍សហស្សវត្សរ៍របស់ UN និងបានរួមចំណែកជាមធ្យម៣៨,៦ភាគរយដល់កំណើនសេដ្ឋកិច្ចពិភពលោកសម្រាប់រយៈពេលមួយទសវត្សរ៍កន្លងមកនេះ។ ចិនក៏ជាអ្នករួមចំណែកធំបំផុតនៃកងទ័ពរក្សាសន្តិភាពក្នុងចំណោមសមាជិកអចិន្ត្រៃយ៍នៃក្រុមប្រឹក្សាសន្តិសុខ UN ហើយចូលរួមដោះស្រាយបញ្ហាជាច្រើន។
អ្នកនាំពាក្យក្រសួងការបរទេសចិនដដែលបញ្ជាក់តទៀតថា ក្នុងនាមជាអ្នកគាំទ្រការកែលម្អប្រព័ន្ធអភិបាលកិច្ចសកល ចិនបានជំរុញឱ្យមានគោលគំនិតនៃអភិបាលកិច្ចសកលដោយផ្អែកលើគោលការណ៍នៃការពិគ្រោះយោបល់ទូលំទូលាយ ការរួមចំណែករួម និងអត្ថប្រយោជន៍រួម៕
© រក្សាសិទ្ធិដោយ thmeythmey.com