កម្ពុជា-អេមីរ៉ាតអារ៉ាប់រួម ចាប់ផ្តើមចរចាជាផ្លូវការលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ ដើម្បីជំរុញការធ្វើពាណិជ្ជកម្ម វិនិយោគ និងកំណើនសេដ្ឋកិច្ចរវាងប្រទេសទាំងពីរ។ កិច្ចចរចានេះ ត្រូវបានប្រកាសជាផ្លូវការនៅរដ្ឋធានីអាប៊ុយដាប៊ី ប្រទេសអេមីរ៉ាតអារ៉ាប់រួម នាថ្ងៃទី២៤តុលា ឆ្នាំ២០២២។
កិច្ចព្រមព្រៀងសេដ្ឋកិច្ចគ្រប់ជ្រុងជ្រាយ(Comprehensive Economic Partnership Agreement/ CEPA) ជាកិច្ចព្រមព្រៀងថ្មីមួយទៀត ដែលកម្ពុជាសម្រេចបើកការចរចាជាមួយអេមីរ៉ាតអារ៉ាប់រួម ក្នុងគោលដៅធ្វើពិពិធកម្មទីផ្សារនាំចេញ។ ពិធីប្រកាសបើកការចរចាជាផ្លូវការនេះ គឺធ្វើឡើងក្រោមវត្តមាន លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និង លោក ថានី ប៊ីន អាម៉េត អាល់ ហ្សេយូឌី ( Thani bin Ahmed AI Zeyoudi) រដ្ឋមន្រ្តីទទួលបន្ទុកពាណិជ្ជកម្មអន្តរជាតិនៃក្រសួងសេដ្ឋកិច្ច អេមីរ៉ាតអារ៉ាប់រួម។
បើតាមការចុះផ្សាយរបស់សារព័ត៌មាន The National គោលបំណងនៃការចរចាលើកិច្ចព្រមព្រៀងសេដ្ឋកិច្ចគ្រប់ជ្រុងជ្រាយនេះ គឺជំរុញពាណិជ្ជកម្ម(មិនមែនប្រេង) ទ្វេភាគីឱ្យកើន ដល់១ពាន់លានដុល្លារអាម៉េរិក ក្នុងរយៈពេល៣ទៅ៥ឆ្នាំទៀត។ Thani Al Zeyoudi បាននិយាយថា ពាណិជ្ជកម្មរវាងកម្ពុជា-អេមីរ៉ាតអារ៉ាប់រួម បានកើនឡើង៤០ភាគរយ នារយៈពេល៨ខែមកនេះក្នុងទំហំទឹកប្រាក់ ២៧៩លានដុល្លារ បើធៀបនឹងរយៈពេលដូចគ្នា កាលឆ្នាំ២០២១។ លោក រំពឹង ទំហំពាណិជ្ជកម្មរវាងប្រទេសទាំងពីរ នឹងកើនដល់ ៣៥០លានដុល្លារ នៅត្រឹមដំណាច់ឆ្នាំ២០២២។
កាសែតដដែលរបស់ប្រទេសអេមីរ៉ាតអារ៉ាប់រួម បានស្រង់សម្តីវេជ្ជបណ្ឌិត Al Zeyoudi មកចុះផ្សាយក្នុងន័យដើមថា៖ «ថ្ងៃនេះ[ថ្ងៃទី២៤តុលា] និងសប្តាហ៍នេះ នឹងក្លាយជាជុំទីមួយនៃការចរចា ហើយផ្អែកលើនោះ យើងនឹងវាយតម្លៃថា តើយើងអាចបន្តទៅមុខបានលឿនប៉ុនណា» ។ លោក បានបញ្ជាក់យ៉ាងដូច្នេះ៖ «ចាប់តាំងពីការរៀបចំដំបូង ខ្ញុំគិតថាយើងអាចផ្លាស់ទីបានយ៉ាងឆាប់រហ័ស» ។
ការចរចារពាណិជ្ជកម្មរវាងប្រទេសទាំងពីរ គឺផ្តោតលើហេដ្ឋារចនាសម្ព័ន្ធ និងភស្តុភារ, ទេសចរណ៍ និងបដិសណ្ឋារកិច្ច, សន្តិសុខស្បៀង ថាមពលដែលកកើតឡើងវិញ និងផ្តោតលើវិស័យបច្ចេកវិទ្យាហិរញ្ញវត្ថុ...ជាដើម។ លោក Al Zeyoudi រំពឹងការចរចាលើកិច្ចព្រមព្រៀងសេដ្ឋកិច្ចគ្រប់ជ្រុងជ្រាយរវាងកម្ពុជា-អេមីរ៉ាតអារ៉ាប់រួមនេះ នឹងត្រូវបញ្ចប់ ក្នុងរយៈ៣ទៅ៦ខែ យ៉ាងយូរ។
សម្រាប់ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានបង្ហាញនូវសុទិដ្ឋិនិយមខ្ពស់ចំពោះកំណើនពាណិជ្ជកម្មរវាងប្រទេសទាំងប្រទេសពីរ បន្ទាប់ពីកិច្ចព្រមព្រៀងសេដ្ឋកិច្ចគ្រប់ជ្រុងជ្រាយ បានបញ្ចប់ដោយជោគជ័យ។ លោក បានថ្លែងថា៖« ប្រទេសរបស់យើង មានធនធានធម្មជាតិ និងផលិតផលកសិកម្មជាច្រើន ដែលយើងអាចលក់ដោយផ្ទាល់ទៅកាន់មជ្ឈិមបូព៌ាប្រទេស ជាពិសេសប្រទេសអារ៉ាប់រួម»។
បើតាមលោក ប៉ាន សូរស័ក្តិ កិច្ចព្រមព្រៀងសេដ្ឋកិច្ចគ្រប់ជ្រុងជ្រាយនេះ គឺមានលក្ខណៈពិសេសសម្រាប់កម្ពុជា-អេមីរ៉ាតអារ៉ាប់រួម ព្រោះកិច្ចព្រមព្រៀងនេះនឹងបន្តពង្រឹងមិត្តភាពដែលមានស្រាប់ជាប្រពៃណីរវាងរបស់ទាំងពីរ និងលើកទំនងទំនាក់ទំនងដែលកំពុងរីកចម្រើនក្នុងពិភពអារ៉ាប់ និងអាស៊ាន។ បច្ចុប្បន្ន តំបន់ទាំងពីរនេះ គឺស្ថិតក្នុងចំណោមតំបន់ដែលមានថាមវ័ន្តសេដ្ឋកិច្ចខ្លាំងនៅលើពិភពលោក ដូចនេះ មានកាលានុវត្តភាពជាច្រើនដែលភាគីទាំងពីរអាចច្បាមយកសម្រាប់អភិវឌ្ឍន៍ខឿនសេដ្ឋកិច្ចប្រទេសរៀងៗខ្លួន។
រដ្ឋមន្ត្រីក្រសួងពាណិជ្ជកម្មកម្ពុជា សង្ឃឹមថា អេមីរ៉ាតអារ៉ាប់រួមអាចជួយកម្ពុជាក្នុងការពន្លឿនសេដ្ឋកិច្ចឌីជីថល ហើយថែមទាំងដើរតួជាវេទិកាសម្រាប់ប្រទេសអាស៊ីអាគ្នេយ៍ក្នុងការជំរុញទំនាក់ទំនងរបស់កម្ពុជាជាមួយប្រទេសក្នុងតំបន់មជ្ឈិមបូព៌ា និងអាហ្វ្រិកឱ្យបានកាន់តែទូលំទូលាយ។
យោងតាមសេចក្តីប្រកាសព័ត៌មានរបស់ក្រសួងពាណិជ្ជកម្ម ក្នុងដំណើរការចរចា Cambodia-UAE CEPA ជុំទីមួយ គឺប្រព្រឹត្តឡើងចាប់ពីថ្ងៃទី២៤ដល់២៦តុលា ដែលភាគីកម្ពុជា ដឹកនាំដោយលោកស្រី តឹករ៉េត កំរង រដ្ឋលេខាធិការក្រសួងពាណិជ្ជកម្ម ខណៈភាគីអេមីរ៉ាតអារ៉ាប់រួម ដឹកនាំដោយលោក ជូម៉ា ម៉ូហាមេដ អាល់ កាត (Juma Mohammed AI Kait) អនុរដ្ឋមន្ត្រីទទួលបន្ទុកពាណិជ្ជកម្មអន្តរជាតិ នៃក្រសួងសេដ្ឋកិច្ច អេមីរ៉ាតអារ៉ាប់រួម៕