កូរ៉េខាងជើង នៅថ្ងៃទី២ ខែវិច្ឆិកា បានបាញ់មីស៊ីលប្រមាណ១៧គ្រាប់។ ជាការឆ្លើយតប កូរ៉េខាងត្បូងបានបាញ់មីស៊ីល ៣គ្រាប់វិញ។ 

 

ប៉ុន្មានម៉ោងក្រោយ នាយសេនាធិការយោធាចម្រុះកូរ៉េខាងត្បូង (JCS) បានអះអាងថា ក្រុងព្យុងយ៉ាង បានបាញ់កាំភ្លើងធំជាង១០០គ្រាប់ចេញពីតំបន់ Kosong ខេត្ត Kangwon ទៅក្នុងតំបន់ទ្រនាប់ ក្នុងសមុទ្រខាងកើត នាម៉ោងប្រមាណ​១ និង២៧នាទី (ម៉ោងនៅកូរ៉េខាងត្បូង)។ 

 

តំបន់ទ្រនាប់នេះ ត្រូវបានយោធាកូរ៉េទាំងពីរ កំណត់នៅក្នុងកិច្ចព្រមព្រៀងមួយធ្វើឡើងនៅក្នុងខែកញ្ញា ឆ្នាំ២០១៨ ដើម្បីកាត់បន្ថយភាពតានតឹងតាមតំបន់ព្រំដែន។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap។ 

 

ជុំវិញបញ្ហាខាងលើ​ កូរ៉េខាងត្បូងបានផ្ញើលិខិតមួយ ជំរុញឱ្យក្រុងព្យុងយ៉ាង បញ្ឈប់សកម្មភាពបង្ករឿងតទៅទៀត។ 

 

ក្នុងថ្ងៃដដែលនេះ ប្រធានាធិបតីកូរ៉េខាងត្បូង លោក យូន សុកយ៉ល បានអំពាវនាវឱ្យចាត់វិធានការយ៉ាងរហ័សលើកូរ៉េខាងជើង ដែលបានបាញ់មីស៊ីលជាច្រើនគ្រាប់។ បន្ថែមពីនេះ មេដឹកនាំកូរ៉េខាងត្បូងក៏ទទូចឱ្យយោធាខ្លួនត្រៀមខ្លួនរួចរាល់ ដើម្បីប្រឆាំងនឹងសកម្មភាពបង្ករឿងបន្ថែមពីសំណាក់កូរ៉េខាងជើងផង។ 

 

ស្របគ្នានេះ ប្រធានាធិបតីកូរ៉េខាងត្បូង នៅក្នុងកិច្ចប្រជុំប្រឹក្សាសន្តិសុខជាតិបន្ទាន់ នាថ្ងៃទី២ ខែវិច្ឆិកា បានចាត់ទុកការបាញ់មីស៊ីលមួយគ្រាប់ឆ្លងកាត់បន្ទាត់ក្រិតខាងត្បូង (NLL) ជាការបំពានដែនដីរបស់ខ្លួន។ ការបាញ់មីស៊ីលឆ្លងកាត់នោះ គឺជាលើកដំបូង បើគិតចាប់ពីកូរ៉េត្រូវបានបែងចែកជាពីរមក៕