«ខ្ញុំ ជាមួយឯកឧត្តម ប្រាយុទ្ធ ច័ន្ទអូចា នាយករដ្ឋមន្រ្តីថៃ បានឯកភាពគ្នា ដោះមីននៅកន្លែងណា ដែលមានមីន ដោយមិនគិតពីបញ្ហាព្រំដែនទេ»។ នេះជាប្រសាសន៍របស់សម្ដេច ហ៊ុន សែន ដោយបានបញ្ជាឱ្យសម្ដេច ទៀ បាញ់ រដ្ឋមន្រ្តីការពារជាតិ និងលោក វ៉ា គឹមហុង ប្រធានគណៈកម្មាធិការចម្រុះកិច្ចការព្រំដែនកម្ពុជា ទៅប្រជុំជាមួយភាគីថៃ។
 

បើតាមសម្ដេច ហ៊ុន សែន មីននៅតាមព្រំដែនកម្ពុជា-ថៃ មានផ្ទៃដីប្រវែងជាង៤០គីឡូម៉ែត្រការ៉េទៀត។ សម្ដេច ទទួលបានរបាយការណ៍នេះ ពីលោកនាយករដ្ឋមន្រ្តីថៃ ប្រាយុទ្ធ ច័ន្ទអូចា នាជំនួបទ្វេភាគី ក្រោយកិច្ចប្រជុំកំពូលអាស៊ាន កាលពីពេលថ្មីៗនេះ។
 

«យើងអត់ចាំបាច់កំណត់ថា ត្រូវតែកំណត់ព្រំដែនសិន ចាំដោះមីនទេ ដោះមីនឱ្យហើយទៅ អារឿងព្រំដែនទុកក្រោយ។ បើកច្រក(ព្រំដែន) ក៏ដូចគ្នាដែរ មិនចាំបាច់ថា ទាល់តែកំណត់ព្រំដែនហើយ បានបើកច្រកទេ បើកសិនទៅ ព្រោះបើកច្រកហ្នឹង វាអត់ទាក់ទិននឹងការកំណត់ព្រំដែននៅកន្លែងណាទេ»។ នេះជាការបញ្ជាក់របស់ប្រមុខរដ្ឋាភិបាល ដែលបានបន្ថែមថា បញ្ហាមីននៅតាមព្រំដែនកម្ពុជា-វៀតណាម និងកម្ពុជា-ឡាវ លែងជាកង្វល់ហើយ ក្រោយមន្ត្រីជំនាញបោសសម្អាតដោយជោគជ័យ។
 

សម្ដេច ហ៊ុន សែន ជំរុញឱ្យភាគីទាំងពីរពិភាក្សាគ្នា ហើយជួយដោះមីនគ្នាទៅវិញទៅមក ដោយមិនចាំបាច់គិតថា គ្រាប់មីននៅក្នុងទឹកដីកម្ពុជា ឬថៃ នោះទេ ពោលគឺភាគីទាំងពីរត្រូវរួមគ្នា បោសសម្អាតមីនតាមព្រំដែនឱ្យអស់ ដើម្បីសេចក្តីសុខប្រជាពលរដ្ឋតាមព្រំដែន។
 

ក្រៅពីនេះ អភិបាលខេត្តតាមព្រំដែនកម្ពុជា-ថៃ , កងទ័ព, អគ្គបញ្ជាការកងទ័ព, អគ្គស្នងការនគរបាលជាតិ ,ក្រសួងការពារជាតិ និងក្រសួងមហាផ្ទៃ ក៏ត្រូវយកចិត្តទុកដាក់លើចំណុចនេះដែរ។ សម្ដេច ជូនដំណឹងបែបនេះ។