សារសូមទោសទៅកាន់អ្នកគាំទ្របាល់ទាត់នៅកម្ពុជា របស់កីឡាករកូនកាត់ខ្មែរ-អាម៉េរិក ថេឡរ នីកូឡាស់ឌឿង(Nick Taylor) រៀបរាប់ទាំងភាពសោកស្តាយចំពោះលទ្ធផលដែលបានបរាជ័យនាជំនួបមិត្តភាពក្រៅដី និងជាការបង្ហាញខ្លួនលើកទីពីរឱ្យក្រុមជម្រើសជាតិកម្ពុជារបស់ខ្សែបម្រើរូបនេះមិនអាចជួយឱ្យក្រុមគោព្រៃរក្សាបានលទ្ធផលល្អ។ ការរៀបរាប់នៅលើហទំព័រហ្វេសប៊ុករបស់ ថេឡរ បានបញ្ជាក់ពីការសោកស្តាយ និងសូមទោស ហើយរូបគេនឹងខិតខំធ្វើឱ្យបានល្អនៅក្នុងព្រឹត្តិការណ៍ពានរង្វាន់ AFF Cup។

 

 

ថេឡរ សរសេរថា៖«ខ្ញុំមិនល្អគ្រប់គ្រាន់ទេ, យើងមិនល្អគ្រ់គ្រាន់ទេ។ វាជាឱកាសមួយសម្រាប់ពួកយើងក្នុងការរៀនសូត្រ នឹងធ្វើឱ្យបានល្អសម្រាប់ការប្រកួតបន្ទាប់ទៀត»។ ថេឡរ នីកូឡាស់ឌឿង បានបន្ថែមថា ការបានពាក់អាវតំណាងជាតិពិតជាមានមោទកភាព ហើយរូបគេនឹងប្រឹងប្រែងបន្តទៀតសម្រាប់ការរៀបចំខ្លួនត្រៀមការប្រកួត Mitsubishi Cup នាពេលខាងមុខ។ យ៉ាងណា នៅចុងសំណេររបស់ខ្សែបម្រើកូនកាត់រូបនេះបានសម្តែងការអរគុណ!ទៅកាន់អ្នកគាំទ្រ និងភ្ជាប់ជាមួយនឹង Emoji រូបបេះដូង និងទង់ជាតិកម្ពុជា ដែលមានន័យថា«ស្រលាញ់កម្ពុជា»។

 

ថេឡរ សរសេរថា៖«សូមអរគុណ!ចំពោះការគាំទ្រ ខ្ញុំស្រលាញ់កម្ពុជា»។ សម្រាប់ប្រកួតបន្ទាប់ ខ្សែបម្រើ ថេឡរ នីកូឡាស់ឌឿង នៅតែមានឈ្មោះក្នុងក្រុមជម្រើសជាតិកម្ពុជា ក្នុងពានរង្វាន់ Mitsubishi Cup ដែលកម្ពុជាស្ថិតនៅក្នុងពូល A រួមមាន កម្ពុជា,ថៃ,ព្រុយណេ,ឥណ្ឌូណេស៊ី និងហ្វីលីពីន៕