ការប្រកួតគុនខ្មែរជ្រើសជើងឯកអាស៊ីអាគ្នេយ៍ បានបញ្ចប់ដោយភាពជោគជ័យ លើការកាត់សេចក្តីរបស់អាជ្ញាកណ្តាល និងការផ្តល់ពិន្ទុពីចៅក្រម ដែលជាក្តីសង្ឃឹមសម្រាប់ស៊ីហ្គេម ២០២៣ តាមរយៈការរៀបចំរបស់កម្ពុជាលើកដំបូងក្នុងប្រវត្តិសាស្ត្រ។

 

សកម្មភាពកីឡា ដើម្បីអបអរសាទរពិធីបុណ្យសមុទ្រលើកទី៩ ជុំទី៣ នៅខេត្តព្រះសីហនុមានដូចជា ការប្រកួតកីឡារួមមាន រត់កម្សាន្ត, ប្រណាំងកង់, កីឡាទូកក្តោង និងប្រដាល់គុនខ្មែរជ្រើសរើសជើងឯកអាស៊ីអាគ្នេយ៍។ ការរៀបចំនេះ សុទ្ធតែទទួលបានការគាំទ្រ និងជោគជ័យដ៏ធំធេង ពិសេសការប្រកួតកីឡាប្រដាល់គុនខ្មែរជើងឯកអាស៊ីអាគ្នេយ៍ ដែលជាការប្រកួត Pre-SEA Games សម្រាប់ត្រៀមរៀបចំធ្វើម្ចាស់ផ្ទះកីឡាស៊ីហ្គេមលើកទី៣២ ឆ្នាំ២០២៣។

 

លោក វ៉ាត់ ចំរើន អគ្គលេខាធិការគណៈកម្មាធិការជាតិ CAMSOC សង្កេតឃើញថា ការរៀបចំការប្រកួតកីឡានីមួយៗ គឺពិតជាមានលក្ខណៈល្អប្រសើរ ពិសេសកីឡាប្រដាល់គុនខ្មែរជ្រើសរើសជើងឯកអាស៊ីអាគ្នេយ៍ មានការគាំទ្រច្រើនពីទស្សនិកជនចូលរួមទស្សនាដោយផ្ទាល់ នៅឆ្នេរអូរត្រេះ ខេត្តព្រះសីហនុ ដែលបានប្រព្រឹត្តទៅអស់រយៈពេល៣ថ្ងៃ ចាប់ពីថ្ងៃទី៩-១១ ខែធ្នូ។

 

លោក វ៉ាត់ ចំរើន និយាយថា៖«ក្នុងការរៀបចំការប្រកួតកីឡាប្រដាល់គុនខ្មែរជើងឯកអាស៊ីអាគ្នេយ៍ ៣ថ្ងៃ ក្នុងពិធីបុណ្យសមុទ្រនេះ គឺយើងសង្កេតឃើញជាក់ស្តែង ពីការងាររបស់អាជ្ញាកណ្តាល-ចៅក្រមទាំងអស់ បានគោរពតាមគោលការណ៍រួមនៃបទបញ្ជានៃការប្រកួតគុនខ្មែរ ក៏ដូចជាគោលការណ៍ប្រកួត Muay ដែលមានចែងក្នុងធម្មនុញ្ញរបស់ស៊ីហ្គេម។ ការរៀបចំផ្តល់ពិន្ទុ កាត់សេចក្តី របស់អាជ្ញាកណ្តាល-ចៅក្រមទាំងអស់ មានភាពយុត្តិធម៌ ដែលជារឿងសំខាន់ ក្នុងការវិនិច្ឆ័យនៃជំនាញនីមួយៗ»៕