ជាតិ
កសិករ៤០គ្រួសារ ទទួលបានប្រាក់បន្ថែម២០០រៀលក្នុង១គីឡូស្រូវ ពីគម្រោងស្រូវមិត្តភាពសត្វព្រៃ រូបភាពដោយ អង្គការជីវិតធម្មជាតិនៅកម្ពុជា
× ភ្នំពេញ៖ កសិករចាស់ថ្មីចំនួន៤០គ្រួសារនៅភូមិស្រែជ្រៃ នៃដែនជម្រកសត្វព្រៃលំផាត់ ដែលអនុវត្តត្រូវតាមលក្ខន្តិកៈនឹងត្រូវបានជ្រើសរើសជាកសិករក្នុងគម្រោងស្រូវមិត្តភាពសត្វព្រៃឆ្នាំនេះ។ បើតាមអង្គការជីវិតធម្មជាតិនៅកម្ពុជា កសិករទាំង៤០គ្រួសារនឹងទទួលបាន២រយរៀលបន្ថែមពីលើថ្លៃលក់ស្រូវទៅឱ្យឈ្មួញកណ្ដាល។ គិតត្រឹមសប្ដាហ៍ទី១ ខែធ្នូនេះ កសិករប្រមូលផលបានជាង ៨០ភាគរយ។
គម្រោងស្រូវមិត្តភាពសត្វព្រៃចាប់ផ្តើមដំបូងកាលពីឆ្នាំ ២០០៨ ក្នុងខេត្ដព្រះវិហារ ដោយបានពង្រីកដល់ខេត្ដចំនួន ៣ ទៀត គឺស្ទឹងត្រែង រតនគិរី និងមណ្ឌលគិរី និងមានការចូលរួមពីពលរដ្ឋជាង១៥០០គ្រួសារ។ លោក ប៊ូ វរសក្ស ប្រធានអង្គការជីវិតធម្មជាតិនៅកម្ពុជា បានលើកឡើងថា ២០២២ ជាឆ្នាំទី២ សម្រាប់ការអនុវត្តគម្រោងស្រូវមិត្តភាពសត្វព្រៃ នៅក្នុងដែនជម្រកសត្វព្រៃលំផាត់ ក្នុងខេត្តរតនគិរី។
រូបភាពដោយ អង្គការជិវិតធម្មជាតិនៅកម្ពុជា
ទន្ទឹមនេះ ក្រុមការងារបានបញ្ចូល កសិករនៅភូមិស្រែជ្រៃចំនួន៤០គ្រួសារ ទៅក្នុងគម្រោងស្រូវមិត្តភាពសត្វព្រៃផងដែរ។ លោក វរសក្ស ពន្យល់បែបនេះ៖ « នៅក្នុងខេត្តរតនគិរីគម្រោងស្រូវនេះបានអនុវត្តទៅលើ២ភូមិ។ ប៉ុន្ដែចំនួន៤០គ្រួសារនោះគឺសំដៅទៅលើតែភូមិស្រែជ្រៃប៉ុណ្ណោះ ដោយសារពលរដ្ឋនៅទីនោះបានធ្វើត្រូវតាមលក្ខន្តិកៈរបស់គម្រោង»។
ប្រធានអង្គការរូបនេះ បានលើកឡើងថា នៅរដូវប្រមូលផលឆ្នាំនេះកសិករអាចទទួលបានតម្លៃ២រយរៀល បន្ថែមក្នុងមួយគីឡូក្រាម ទៅលើថ្លៃដើម ដែលពួកគាត់លក់ទៅឱ្យឈ្មួញកណ្ដាល។ មួយវិញទៀត នៅជិតពាក់កណ្ដាលខែធ្នូ ឆ្នាំនេះ កសិករនៅដែនជម្រកសត្វព្រៃលំផាត់ អាចប្រមូលផលស្រូវមិត្តភាពសត្វព្រៃបានជាង៨០ភាគរយ។ ចំណែកឯទិន្នផលដែលទទួលបាន នឹងត្រូវបញ្ជាក់នៅពេលស្រូវប្រមូលផលបានមួយរយភាគរយ។
សូមបញ្ជាក់ថា កន្លងមកក្រសួងបរិស្ថានបានវាយតម្លៃចំពោះការអនុវត្ដគម្រោងស្រូវមិត្តភាពសត្វព្រៃ ជាសកម្មភាពមួយបង្ហាញពីនិរន្តរភាពក្នុងការគាំទ្រលើការអភិរក្ស ការពារសត្វព្រៃ ព្រៃឈើ ជាពិសេសអាចកាត់បន្ថយភាពក្រីក្រផងដែរ៕
Tag:
កសិករ
ស្រូវមិត្តភាពសត្វព្រៃ
ខេត្តរតនគិរី
© រក្សាសិទ្ធិដោយ thmeythmey.com