យោងតាមផែនការសកម្មភាពប្រចាំឆ្នាំ២០២២ របស់គណៈកម្មាធិការជាតិអូឡាំពិកកម្ពុជា សហព័ន្ធកីឡាលើកទម្ងន់កម្ពុជា បានបើកសិក្ខាសាលាស្តីពី«សាមគ្គីអូឡាំពិក បណ្តុះបណ្តាលបង្វឹកកីឡាលើកទម្ងន់» ដែលមានសិក្ខាកាម២៥នាក់ ស្រី៥នាក់ ដោយទទួលបានការបណ្តុះបណ្តាលពីគ្រូឧទ្ទេស លោក Aveenash Pandoo ជនជាតិឥណ្ឌា ដែលជាគ្រូលំដាប់អូឡាំពិក។ 

 

 

លោក សំ សុខយី អគ្គលេខាធិការសហព័ន្ធកីឡាលើកទម្ងន់កម្ពុជា បានបញ្ជាក់ថាវគ្គបណ្តុះបណ្តាលមានគោលបំណងចង់ឱ្យសិក្ខាកាមកែតម្រូវបច្ចេកទេសជំនាញនៃកីឡាលើកទម្ងន់ ដើម្បីពង្រឹងសមត្ថភាពផ្ទាល់ខ្លួនបន្ថែម ឈានទៅជាគ្រូបង្វឹកដែលមានលក្ខណៈសម្បត្តិគ្រប់គ្រាន់ និងមន្ត្រីកាត់ក្តីក្នុងព្រឹត្តិការណ៍ជាតិ និងអន្តរជាតិនានា ពិសេសព្រឹត្តិការណ៍កីឡាស៊ីហ្គេម ២០២៣ ដែលកម្ពុជាធ្វើជាម្ចាស់ផ្ទះ។

 

លើសពីនេះទៅទៀតលោក សុខយី សំណូមពរ និងទទូចដល់សិក្ខាកាមដែលបានចូលរួមសិក្សាវគ្គបណ្តុះបណ្តាល យកចិត្តទុកដាក់ស្តាប់ ក្រេបយកចំណេះដឹង ជំនាញ និងស្វែងយល់ឱ្យបានស៊ីជម្រៅទៅលើបច្ចេកទេសឱ្យបានត្រឹមត្រូវ ក្នុងនាមជាមន្រ្តីបច្ចេកទេសតំណាងប្រទេសជាតិ។

 

គួរបញ្ជាក់ថា សិក្ខាកាមដែលបានចូលរួមសិក្សាវគ្គបណ្តុះបណ្តាលកីឡាលើកទម្ងន់មានចំនួន២៥នាក់ ក្នុងនោះមានស្រីចំនួន៥នាក់ មកពីក្រសួង រាជធានី-ខេត្តចំនួន៧ រួមមាន ក្រសួងមហាផ្ទៃ ក្រសួងការពារជាតិ ខេត្តកំពត ខេត្តកំពង់ធំ ខេត្តកែប ខេត្តសៀមរាប  ៕