ភ្នំពេញ៖ របាំរឿង “ព្រះបាទជយវរ្ម័នទី៧” ដែលទទួលបានការគាំទ្រយ៉ាងច្រើនកុះករពីមហាជន គ្រាសម្ដែងលក់សំបុត្រចំនួន៣លើករួចទៅហើយនោះ ក៏នឹងមានវត្តមាននៅក្នុងមហាព្រឹត្តិការណ៍“រាត្រីចងចាំ” ដែលប្រារព្ធឡើងនៅលើទឹកដីអង្គរ នៅថ្ងៃទី១៤ ខែធ្នូ ឆ្នាំ២០២២ខាងមុខដែរ។
“ព្រះបាទជយវរ្ម័នទី៧” ជារបាំរឿងដែលត្រូវបានសម្រិតសម្រាំង គ្រឿងអាភរណៈ និងសម្លៀកបំពាក់យ៉ាងល្អវិចិត្រ ក្បាច់រាំយ៉ាងទន់ភ្លន់ ហើយខ្លឹមសារសាច់រឿង ក៏ត្រូវបានស្រាវជ្រាវយ៉ាងហ្មត់ចត់ ពីឯកសារជាច្រើនដែរ។ ស្នាដៃដែលដំឡើងដោយលោកស្រី ឱម យុវណ្ឌី នេះនឹងត្រូវយកទៅសម្ដែង នៅក្នុងមហាព្រឹត្តិការណ៍ “រាត្រីចងចាំ” នាខេត្តសៀមរាប។
លោកស្រី ឱម យុវណ្ឌី ទីប្រឹក្សាក្រសួងវប្បធម៌ និងវិចិត្រសិល្ប (រូបកណ្ដាល)
បើទោះបីជាសាច់រឿងល្អយ៉ាងណាក្ដី ក៏ត្រូវកាត់ឈុតមួយចំនួនចេញខ្លះ ដើម្បីតម្រូវតាមពេលវេលា សម្រាប់ការសម្ដែងសិល្បៈផ្សេងៗទៀតដែរ។ របាំរឿងដែលធ្លាប់សម្ដែងរយៈពេលជិត២ម៉ោង ត្រូវការ នាដករ នាដកា សិល្បករ សិល្បការិនី និងអ្នកគុននិយម ប្រមាណជិត២០០នាក់នេះ ត្រូវកាត់បន្ថយមកត្រឹមប្រមាណ១០០នាក់ និងត្រូវសម្ដែងតែ៤០នាទីប៉ុណ្ណោះ។ បើទោះបីជាកាត់ឈុតខ្លះ និងចំនួនអ្នកសម្ដែងក្ដី ក៏មិនបណ្ដាលឱ្យប៉ះពាល់ខ្លឹមសារនៃសាច់រឿងនេះដែរ ព្រោះសាច់រឿងទាំងមូលត្រូវបានបែងចែកជាផែនយ៉ាងច្បាស់លាស់។
លោកស្រី ឱម យុវណ្ណឌី ទីប្រឹក្សាក្រសួងវប្បធម៌ និងវិចិត្រសិល្បៈ ដែលជាម្ចាស់ស្នាដៃរបាំរឿង “ព្រះបាទជយវរ្ម័នទី៧” បានប្រាប់សារព័ត៌មានថ្មីៗថា ឈុតដែលត្រូវកាត់ចេញ គឺឈុតចម្បាំង ឈុតសមិទ្ធិផលសម័យអង្គរ និងសៀក។ ហើយឈុតដែលនៅរក្សាសម្រាប់ការសម្ដែង មានឈុតស្នាព្រះហស្ថព្រះនាងឥន្ទ្រទេវី (ឈុតបង្រៀនក្រុមនារី ក្នុងសាលាធំជាងគេនៅសម័យអង្គរ) ឈុតសមយុទ្ធគុនល្បុកតោ គុនយុទ្ធក្រមខម និងឈុតស្នេហារបស់ព្រះបាទជយវរ្ម័នទី៧។
បើគិតតែទម្រង់របាំ ដែលត្រូវសម្ដែងនៅថ្ងៃមហាព្រឹត្តិការណ៍”រាត្រីចងចាំ” មាន៤ទម្រង់ធំៗ គឺទម្រង់របាំព្រះរាជទ្រព្យ(របាំក្បាច់បុរាណ) របាំបុរាណ របាំប្រពៃណី និងរបាំសហសម័យ។
ទោះជាយ៉ាងណា ការហាត់សមត្រៀមសម្ដែងលើកនេះ មានរយៈពេលតែកន្លះខែតែប៉ុណ្ណោះ សម្រាប់សិល្បករសិល្បការិនីប្រមាណ១០០នាក់។ ពិសេសពេលវេលាដ៏ខ្លីនេះ លោកស្រីត្រូវបង្វឹកតួធំទាំង៣ គឺតួព្រះបាទជយវរ្ម័នទី៧ ព្រះនាងឥន្ទ្រទេវី និងព្រះនាងជយរាជទេវី ដែលសុទ្ធសឹងតែជាតួថ្មីទាំងអស់។
ឈុតមួយក្នុងរបាំរឿង ព្រះបាទជ័យវរ្ម័នទី៧ គ្រាសម្ដែងលើកទី៣ នៅសាលចតុមុខ
លោកស្រី ឱម យុវណ្ឌី បញ្ជាក់បន្ថែម៖«លើកនេះខ្ញុំរើសតួអង្គធំៗ ពីរៗគូតែម្ដង។ ក្នុងមួយតួខ្ញុំរើសពីរនាក់យកមកបង្ហាត់ ដើម្បីបង្ការខ្វះតួទៅថ្ងៃក្រោយ។ តួចាស់ៗអ្នកខ្លះគាត់ជាប់ទៅរៀននៅក្រៅប្រទេស ខ្លះជាប់សម្ដែងនៅកន្លែងផ្សេង ដូច្នេះតួធំៗខ្ញុំត្រូវរើសថ្មីទាំងអស់។ តែតួលើកនេះខ្ញុំបង្ហាត់លឿន ព្រោះគាត់ធ្លាប់មានពិសោធសម្ដែងច្រើនហើយ គ្រាន់តែគាត់មិនធ្លាប់សម្ដែងរឿងនេះ»។
ដ្បិតតែការសម្ដែង៣ដងមកហើយ ទទួលបានការគាំទ្រច្រើនពីមហាជនក្ដី ប៉ុន្តែក្នុងការសម្ដែងលើកទី៤នេះ លោកស្រី យុវណ្ឌី អតីតនាដការបាំក្នុងព្រះបរមរាជវាំង មិនទាន់ហ៊ានដាក់ក្ដីទំពឹងខ្ពស់ សម្រាប់ការគាំទ្រឡើង។ យ៉ាងណាក៏ដោយ លោកស្រីនៅតែសង្ឃឹមថានឹងមានអ្នកគាំទ្រច្រើន ដូចកាលសម្ដែងលើកទី១ ទី២ និងទី៣ដែរ ព្រោះនេះជារបាំដែលបង្ហាញពីតម្លៃរបស់ជាតិ។
«ខ្ញុំពិតជាអរគុណដល់ទស្សនិកជនណាស់ ដែលតែងតែគាំទ្រស្នាដៃសិល្បៈជាតិយើង។ ហើយខ្ញុំសូមឱ្យ ទស្សនិកជន នៅតែបន្តគាំទ្រឱ្យកាន់តែខ្លាំងឡើងថែមទៀត»។ នេះជាការថ្លែងអំណរគុណរបស់លោកស្រី យុវណ្ឌី ចំពោះអ្នកគាំទ្រសិល្បៈវប្បធម៌ជាតិគ្រប់រូប។
បារគូទាំង៤រូប ក្នុងរបាំរឿង ព្រះបាទជយវរ្ម័នទី៧ ថតរូបអនុស្សាវរីយ៍ជាមួយអ្នកគាំទ្រ
របាំរឿង “ព្រះបាទជយវរ្ម័នទី៧” កើតឡើងដោយសារក្ដីគោរពស្រឡាញ់ ក្ដីស្ញប់ស្ញែងនូវស្នាព្រះហស្ថ និងកិត្តិនាមរបស់អតីតព្រះមហាក្សត្រ ព្រះបាទជយវរ្ម័យទី៧ ពីសំណាក់លោកស្រី ឱម យុវណ្ឌី។ ក្រោយពីដំឡើយនិងសម្ដែងរបាំរឿង “ព្រះនាងឥន្ទ្រទេវី និងព្រះនាងជ័យរាជទេវី” ភាគ១រួច លោកស្រីក៏បានដំឡើងរឿង “ព្រះបាទជយវរ្ម័នទី៧”នេះបន្តទៀត។
សូមបញ្ជាក់ដែរថា កម្មវិធីសំខាន់ៗ ក្នុងព្រឹត្តិការណ៍ “រាត្រីចងចាំ" មានការស្មឹងស្មាតឧទ្ទិសដួងវិញ្ញណខក្ខ័ព្រលឹងបុព្វបុរសខ្មែរ ការសម្ដែងទស្សនីយភាព ល្ខោនទំនើបចំរុះ «អរិយភាពនៃរជ្ជកាលព្រះបាទជ័យវរន្ម័ទី៧» ការសំដែងចាប៉ីដងវែង ការឧទ្ទេសនាម សម្បត្តិបេតិកភណ្ឌកម្ពុជាទាំង១២ ដែលបានចុះក្នុងបញ្ជីបេតិកភណ្ឌពិភពលោក។ ការច្រៀងចម្រៀង «មហិទ្ធិឫទ្ធិក្បាច់គុណល្បុក្គតោ» (ឧទ្ទិសដល់ព្រលឹងព្រឹទ្ធចារ្យ ដែលបានថែរក្សាក្បាច់គុណនេះ) ការប្រគំតន្ត្រីសហសម័យ និងការប្រកាសសមាសភាពសិល្បករដែលចូលរួមជាដើម។
ផ្ទាំងទស្សនីយភាពនេះ នឹងមានការសម្ដែងនៅខាងក្រោយបរិវេណប្រាសាទអង្គរវត្ត វេលាម៉ោង១៧:០០ នារាត្រីថ្ងៃទី១៤ ខែធ្នូ ឆ្នាំ២០២២។ មហាព្រឹត្តិការណ៍”រាត្រីចងចាំ"នេះ ត្រូវបានប្រារព្ធឡើងចំនួន២ដងរួចមកហើយ គឺពីឆ្នាំ២០១៩ មានទស្សនិកជនចូលរួមចំនួនជិត២ម៉ឺននាក់ ដែលលើសការរំពឹងទុក ជិត១ម៉ឺន៧ពាន់នាក់។ ចំណែកនៅឆ្នាំ២០២០ មិនបានប្រារព្ធឡើយ ព្រោះផ្ទុះជំងឺកូវីដ-១៩យ៉ាងខ្លាំងក្លា។
តួអង្គព្រះនាងជយរាជទេវី និងព្រះនាងឥន្ទ្រទេវី ឈរមើលរូបតួអង្គ ព្រះបាទជយវរ្ម័នទី៧
នៅឆ្នាំ២០២១ ដោយសារតែការរីករាលដាលជំងឺកូវីដ-១៩ បានថយចុះខ្លះ ក្រសួងបានរៀបចំការសម្ដែងទស្សនីភាពតាមអនឡាញ ដោយមានការផ្សាយបន្តផ្ទាល់ពីផេកក្រសួងវប្បធម៌ ទៅស្ទើរគ្រប់មន្ទីរវប្បធម៌ខេត្ត ទូទាំងកម្ពុជា។ ការផ្សាយបន្តផ្ទាល់នេះ ត្រូវបានបង្ហាញនៅតាមសួនសាធារណៈ ឬទីសាធារណៈ ដើម្បីឱ្យសាធារណជន បានទស្សនាដោយសេរី។
គួរបញ្ជាក់ផងដែរថា ជារៀងរាល់ឆ្នាំ មហាព្រឹត្តិការណ៍ ”រាត្រីចងចាំ” តែងរៀបចំឡើងនៅក្នុងអំឡុងខែវិច្ឆិកា ។ ប៉ុន្តែដោយសារឆ្នាំនេះ ក្រសួងមានការមមាញឹកច្រើន ក្នងកិច្ចការនានា ក៏ដូចជាការប្រជុំអាស៊ានផង ទើបបានជាក្នុងឆ្នាំ២០២២នេះ មហាព្រឹត្តិការណ៍ដ៏អស្ចារ្យនេះ ត្រូវលើកយកមកធ្វើក្នុងខែធ្នូវិញ។ ទោះជាយ៉ាងណា ការលើកពេលនេះ ក៏ត្រូវបានគិតគូរយ៉ាងហ្មត់ចត់ផងដែរ ដោយក្រសួងមានចំណងធ្វើឡើង ដើម្បីឱ្យចំខួប៣០ឆ្នាំ នៃការដាក់បញ្ចូលរមណីយដ្ឋានអង្គរ ក្នុងបញ្ជីបេតិកភណ្ឌវប្បធម៌រូបី នៃពិភពលោករបស់អង្គការយូណេស្កូ ចំពេលនៃការប្រជុំ ICC អង្គរ និងចំពេលនៃការប្រារពទិវារំលឹងគុណអង្គរផងដែរ។
“កិច្ចការពារបេតិកភណ្ឌវប្បធម៌ ជាភារកិច្ចរបស់កូនខ្មែរគ្រប់ៗរូប”៕