ជាតិ
ជំងឺពុកឆ្អឹងរបស់អ្នកគ្រូ ឌួង ម៉ារ៉ី កាន់តែធ្ងន់ធ្ងរ និស្សិតផ្នែកចម្រៀងមហោរីនៃសាកលវិទ្យាល័យភូមិន្ទវិចិត្រសិល្បៈ បានសួរសុខទុក្ខអ្នកគ្រូ ឌួង ម៉ារ៉ី នៅគេហដ្ឋាន កាលពីថ្ងៃទី១៨ វិច្ឆិកា ២០២២
× ភ្នំពេញ៖ អាការជំងឺពុកឆ្នឹងខ្នង និងត្រគាក របស់អ្នកគ្រូ ឌួង ម៉ារ៉ី ដែលជាគ្រូចម្រៀងមហោរី និងចម្រៀងបុរាណ កាន់តែធ្ងន់ធ្ងរ។ នេះបើតាមលោក ណុប ចំណាប់ ត្រូវជាកូនប្រុសទោលរបស់អ្នកគ្រូ ឌួង ម៉ារ៉ី។
បើតាមលោក ណុប ចំណាប់ ដដែលម្ដាយរបស់លោក មានជំងឺពុកឆ្អឹងនេះ អស់រយៈពេល២ឆ្នាំមកហើយ។ ហើយ១ឆ្នាំចុងក្រោយនេះ អ្នកគ្រូត្រូវសម្រាន្តលើកន្ទេលរហូត។ ដោយឡែក នៅមួយរយៈពេលចុងក្រោយនេះ ជំងឺនេះកាន់តែវិវឌ្ឍន៍អាក្រក់ឡើង។
លោក ណុប ចំណាប់ ដែលត្រូវជាកូនទោលរបស់អ្នកគ្រូ ឌួង ម៉ារ៉ី អះអាង៖«ពេលនេះឈឺធ្ងន់ សូម្បីតែរើខ្លួន ដូរខោទឹកមូត្រក៏ពិបាក។ គាត់នៅលើគ្រែក្រោកមិនរួចជាងមួយឆ្នាំហើយ។ ពេទ្យប្រាប់ថា មិនអាចវះកាត់បានទេ ព្រោះឆ្អឹងគាត់ពុកច្រើន។ ម៉្យាងគាត់ចាស់ផង។
ស្ថិតក្នុងជន្មាយុ៧៦ឆ្នាំអ្នកគ្រូ ឌួង ម៉ារ៉ី ធ្លាប់បានឆ្លងកាត់ការវះកាត់គីសក្នុងថ្លើមម្ដង កាលពីច្រើនឆ្នាំមុន។ អ្នកគ្រូ ឌួង ម៉ារ៉ី គឺជាគ្រូចម្រៀងមហោរី និងចម្រៀងបុរាណ។ អ្នកគ្រូចូលសិល្បៈ តាំងពីសម័យសង្គមរាស្ត្រនិយម ហើយក្រោយសម័យសង្គ្រាម អ្នកគ្រូបានចូលសិល្បៈជាថ្មីចាប់ពីឆ្នាំ១៩៧៩ រហូតដល់ថ្ងៃដែលអ្នកគ្រូឈឺក្រោកមិនរួច។ ផ្ទះរបស់អ្នកគ្រូសព្វថ្ងៃ ស្ថិតនៅក្រុងតាខ្មៅ។ ចំពោះជីវភាពវិញ លោក ណុប ចំណាប់ អះអាងថា ក៏ជួបការលំបាកដែរ ព្រោះលោកជាប់នៅថែម្ដាយ មិនអាចទៅធ្វើការងារបាន៕
Tag:
សិល្បៈ
វប្បធម៌
ចម្រៀងបុរាណ
ចម្រៀងមហោរី
គ្រូសិល្បៈ
© រក្សាសិទ្ធិដោយ thmeythmey.com