ក្នុងកិច្ចប្រជុំលើកដំបូងតាំងពីសភាម៉ាឡេស៊ីមានរដ្ឋាភិបាលថ្មី លោក Datuk Johari Abdul អតីតសមាជិកសភាមកពីបក្សរបស់នាយករដ្ឋមន្រ្តីម៉ាឡេស៊ីបច្ចុប្បន្នត្រូវបានជ្រើសតាំងជាប្រធានសភាជាន់ទាបម៉ាឡេស៊ី។ បេក្ខភាពរបស់លោក Johari ត្រូវបានស្នើឡើងដោយនាយករដ្ឋមន្រ្តីម៉ាឡេស៊ី អាន់វ៉ា អ៊ីប្រាហ៊ីម និងគាំទ្រដោយឧបនាយករដ្ឋមន្រ្តី Ahmad Zahid Hamidi ដែលជាដៃគូក្នុងរដ្ឋាភិបាលចម្រុះ។ 

 

ជាមួយសំឡេងគាំទ្រចំនួន ១៤៧ ក្នុងចំណោមសមាជិកសភា ២២២ នាក់ លោក Johari ទទួលបានសំឡេងជិត២ភាគ៣។ ការបោះឆ្នោតនេះបង្ហាញពីកម្រិតគាំទ្រដែលលោក អាន់វ៉ា ទទួលបានក្នុងចំណោមសមាជិកសភាម៉ាឡេស៊ី មុនការបោះឆ្នោតទំនុកចិត្តដែលធ្វើឡើងរយៈពេលពីរថ្ងៃចាប់ពីថ្ងៃទី១៩ ខែធ្នូ។ 

 

ជុំវិញរឿងនេះ លោក អាន់វ៉ា​ ដែលត្រូវបានស្តេចម៉ាឡេស៊ីតែងតាំងជានាយករដ្ឋមន្រ្តីកាលពីចុងខែវិច្ឆិកា នៅខ្វះមួយសំឡេងទៀតដើម្បីបង្រ្គប់សំឡេងភាគច្រើន២ភាគ៣ នៅសភា ទើបអាចផ្លាស់ប្តូរច្បាប់មួយចំនួនបានដូចជាច្បាប់បោះឆ្នោត និងធ្វើវិសោធនកម្មរដ្ឋធម្មនុញ្ញជាដើម។ តាំងពីឆ្នាំ២០០៨ មក មិនមាននាយករដ្ឋមន្រ្តីម៉ាឡេស៊ីរូបណាឆ្លងផុតការបោះឆ្នោតទំនុកចិត្តនេះទេ។ 

 

ទោះជាយ៉ាងណា លោក អាន់វ៉ា កន្លងមកអះអាងថា លោកមានសំឡេងគាំទ្រភាគច្រើនដ៏លើសលប់ បន្ទាប់ពីបក្សនយោបាយនានាដែលគាំទ្ររដ្ឋាភិបាលរួបរួមជាតិរបស់លោកនៅថ្ងៃទី១៦ ខែវិច្ឆិកាចុះហត្ថលេខាលើកិច្ចព្រមព្រៀងមួយដោយប្តេជ្ញាចិត្តទៅលើរដ្ឋាភិបាលមួយដែលមានស្ថិរភាពរហូតដល់ផុតអាណត្តិប្រាំឆ្នាំ។ 

 

ក្រៅពីនេះ លោក Ramli Mohd Nor ដែលជាសមាជិកសភាមកពីបក្សសម្ព័ន្ធ Barisan Nasional ទទួលបានសំឡេងគាំទ្រ១៤៨ និង Alice Lau ដែលជាសមាជិកសភាមកពីបក្សសម្ព័ន្ធ Pakatan Harapan ទទួលបានសំឡេងគាំទ្រ១៤៦ ត្រូវបានតែងតាំងជាអនុប្រធានសភា៕