អន្តរជាតិ
អ៊ីតាលី ចង់បានសិទ្ធិស្មើគ្នាក្នុងគម្រោងអភិវឌ្ឍយន្តហោះចម្បាំងជាមួយអង់គ្លេសនិងជប៉ុន រដ្ឋមន្រ្តីការពារជាតិអ៊ីតាលី Guido Crosetto ។ រូបថត AFP
× រដ្ឋមន្ត្រីការពារជាតិអ៊ីតាលី Guido Crosetto លើកឡើងនៅថ្ងៃទី១៩ ខែធ្នូថា អ៊ីតាលីត្រូវតែទទួលបានតួនាទីស្មើគ្នាក្នុងភាពជាដៃគូជាមួយអង់គ្លេសនិងជប៉ុនក្នុងគម្រោងបង្កើតយន្តហោះចម្បាំងរវាងប្រទេសទាំងបី។
នៅដើមខែធ្នូ អ៊ីតាលី អង់គ្លេស និងជប៉ុន ប្រកាសកម្មវិធីប្រយុទ្ធតាមអាកាសជាសកល (GCAP) ដែលគ្រោងអភិវឌ្ឍយន្តហោះជំនាន់ក្រោយ ដោយរួមបញ្ចូលគម្រោងអភិវឌ្ឍយន្តហោះ Tempest របស់អង់គ្លេស និងកម្មវិធី F-X របស់ជប៉ុន។ ភាពជាដៃគូនេះកើតឡើងខណៈដែលបារាំង អាល្លឺម៉ង់ និងអេស្ប៉ាញក៏សហការគ្នាក្នុងផែនការមួយផ្សេងទៀតដែលនឹងបង្កើតយន្តហោះចម្បាំងក្នុងគោលបំណងពង្រឹងសន្តិសុខអឺរ៉ុបខណៈរុស្ស៊ីបន្តឈ្លានពានអ៊ុយក្រែន។
ក្នុងកិច្ចសម្ភាសជាមួយទីភ្នាក់ងារព័ត៌មាន Reuters នៅថ្ងៃទី១៩ ខែធ្នូ រដ្ឋមន្ត្រីការពារជាតិអ៊ីតាលី Crosetto និយាយថា ទីក្រុងរ៉ូមនឹងសម្រេចចិត្តចុងក្រោយអំពីចំនួនថវិកាដែលត្រូវវិនិយោគនៅក្នុងគម្រោងបីប្រទេសនេះដែលនឹងទឹកប្រាក់រាប់ពាន់លានដុល្លារបន្ទាប់ពីព័ត៌មានលម្អិតបន្ថែមត្រូវបានកំណត់រួចរាល់។
«អ៊ីតាលីអាចបន្តក្នុងដំណើរនេះប្រសិនជាខ្លួនមានទម្ងន់ដូចជប៉ុន និងអង់គ្លេសលើផ្នែកបច្ចេកវិទ្យា សិក្សាស្រាវជ្រាវ និងលទ្ធផល»។ លោក Crosetto លើកឡើងបែបនេះរួចបន្តថា លោកចង់បានការបែងចែក៣៣ភាគរយចំពោះប្រទេសនីមួយៗក្នុងគម្រោងមួយនេះ។
ក្រុមហ៊ុន BAE Systems PLC របស់ចក្រភពអង់គ្លេស ក្រុមហ៊ុនឧស្សាហកម្មធុនធ្ងន់ Mitsubishi របស់ជប៉ុន និងក្រុមហ៊ុន Leonardo នឹងដឹកនាំការរចនាយន្តហោះនេះ ខណៈមានក្រុមហ៊ុនផលិតមីស៊ីលអឺរ៉ុប MBDA និងក្រុមហ៊ុនផ្សេងទៀតចូលរួមផងដែរ។ លោក Crosetto បាននិយាយដែរថា មិនគួរមានការរារាំងការរួមកម្លាំងជាមួយកម្មវិធីអឺរ៉ុបនោះទេ ហើយ GCAP ក៏គួរតែមានគោលបំណងស្វែងរកដៃគូថ្មីៗជាពិសេសនៅក្នុងទ្វីបអឺរ៉ុប៕
Tag:
អ៊ីតាលី
អង់គ្លេស
ជប៉ុន
© រក្សាសិទ្ធិដោយ thmeythmey.com