ប៉ែត នីមល មានឪពុកជាទាហាន រីឯ ជួង រូស្សា ជាចៅរបស់ទាហានការពារព្រំដែនដូចគ្នា។ យុវតីទាំងពីរស្ថិតក្នុងចំណោមជ័យលាភីនិទ្ទេស A ៦នាក់ពីការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២២ ប្រចាំខេត្តឧត្តរមានជ័យ និងស្ថិតក្នុងចំណោមសិស្សស្រី៥នាក់ពីវិទ្យាល័យអន្លង់វែង។
អន្លង់វែងជាមូលដ្ឋានចុងក្រោយបង្អស់របស់ខ្មែរក្រហម មុនសមាហរណកម្ម។ លទ្ធផលនៃការប្រឡងសញ្ញាបត្រមធ្យមសិក្សាទុតិយភូមិកាលពីពេលថ្មីៗកន្លងមក បង្ហាញថាអតីតតំបន់ប្រយុទ្ធមួយនេះ មានសិស្សនិទ្ទេស A ដល់ទៅ៥នាក់ ក្នុងចំណោម៦នាក់ទូទាំងខេត្តឧត្តរមានជ័យ។
ក្នុងចំណោមជ័យលាភី និទ្ទេស A ៥នាក់នៅវិទ្យាល័យអន្លង់វែង សារព័ត៌មានថ្មីៗ បានទាក់ទងសម្ភាសជ័យលាភី២នាក់ ដែលសុទ្ធតែជាកូនចៅទាហានឈរជើងនៅតំបន់ព្រំដែនខ្មែរ-ថៃ។ អ្នកទាំងពីរនាក់នោះ គឺកញ្ញា ប៉ែត នីមល និងកញ្ញា ជួង រូស្សា។
កញ្ញា ប៉ែត នីមល សិស្សជាប់និទ្ទេសA ដែលមានឪពុកជា ទាហាន នៅខេត្តស្រុកត្រពាំងប្រាសាទ។ រូបភាព៖ ប៉ែត នីមល
ប៉ែត នីមល អត់ដាក់អាហារូបករណ៍ ព្រោះចង់ប្រឡងយកជំនាញពេទ្យ
អំឡុងពេលសិក្សា នីមល បានទៅរស់នៅជាមួយជីដូន ដែលមានផ្ទះនៅក្បែរវិទ្យាល័យអន្លង់វែង ខណៈឪពុក និងម្តាយ ព្រមទាំងប្អូនចំនួន ៣នាក់ទៀតរស់នៅឯស្រុកត្រពាំងប្រាសាទ។ មូលហេតុដែល រូបនាងមិនជិត ឪពុក និងម្តាយ ក៏ព្រោះការធ្វើដំណើរពីផ្ទះទៅសាលា មានចម្ងាយឆ្ងាយ។ មួយវិញទៀត ឪពុករបស់នីមល គឺជាទាហានការពារនៅតាមព្រំដែននៅស្រុកត្រពាំងប្រាសាទ។ ចំណែក ម្តាយវិញ គឺជាស្រ្តីមេផ្ទះ។
ជាក្មេងស្រីរស់នៅតាមជនបទ និងមានជីវភាពមធ្យម នីមល ជាក្មេងស្រីមួយរូប ដែលរៀនពូកែក្នុងចំណោមសិស្សដទៃទៀតក្នុងសាលា។
ការសិក្សារបស់ នីមល មានភាពសកម្មខ្លាំង ពោលនៅដើមឆ្នាំនៃថ្នាក់ទី១២ ជាពេលវេលាដែលរូបនាង ប្រឹងសិក្សាខុសពីរាល់ដង។ ការទន្ទេញមេរៀន ធ្វើលំហាត់ និងស្វ័យសិក្សាជាមួយមិត្តភក្តិ គឺជាទម្លាប់ជាប្រចាំអំឡុងពេលមុនការប្រឡងចូលមកដល់។
យុវតីវ័យ១៨ឆ្នាំរូបនេះ រៀបរាប់ថា ចំពោះការប្រឡងបាក់ឌុបនេះ ទាំងសាលា គ្រួសារតែងរំពឹងថា នីមលនឹងទទួលបាននិទ្ទេសA ប៉ុន្តែសម្រាប់យុវតីរូបនេះ ហាក់ធ្លាក់ទឹកចិត្តបន្ទាប់ពីមុខវិជ្ជា គណិតវិទ្យាបានភ្លាត់ស្នៀតត្រង់ចំណុចខ្លះ។ បើទោះជាយ៉ាងណាក្តី នៅតែមិនធ្វើឱ្យមនុស្សនៅជុំវិញខ្លួនខកបំណងនោះឡើយ ពីព្រោះលទ្ធផលបានបង្ហាញថា កញ្ញា ប៉ែត នីមល ទទួលនិទ្ទេស A។
«នៅថ្ងៃប្រកាសលទ្ធផល ខ្ញុំកំពុងស្នាក់នៅ ភ្នំពេញ ជាមួយបងស្រីជីដូនមួយ។ គ្រាន់តែឃើញភ្លាម ខ្ញុំស្រែកចង់បែកបន្ទប់ រួចទូរស័ព្ទទៅម៉ាក់ ប្រាប់គាត់ថា កូនបាន A ហើយ»។ កញ្ញា ប៉ែត នីមល រំលឹកឡើងយ៉ាងដូច្នេះ។
នីមល មិនបានដាក់ពាក្យស្នើសុំអាហារូបករណ៍ពីគ្រឹះស្ថានអប់រំណាមួយឡើយ ដោយសារ យុវតីរូបនេះ ស្រឡាញ់ខាងពេទ្យ ដែលជាជំនាញតម្រូវឲ្យមានការប្រឡងចូល។ ThmeyThmey ក៏បានចោទសួរថា តើគ្រួសាររបស់ នីមល នឹងផ្គត់ផ្គង់ឱ្យកញ្ញាបន្តការសិក្សានៅភ្នំពេញឬទេ អំឡុងពេលនោះ? កញ្ញាបានតបវិញ ៖«ចាស គ្រួសាររបស់ខ្ញុំ គាត់ឱ្យខ្ញុំមករៀនបន្តនៅភ្នំពេញ។ មួយវិញទៀត ខ្ញុំក៏កំពុងរៀនបន្ថែម ដើម្បីត្រៀមប្រឡងពេទ្យផងដែរ»។
ជួង រូស្សា សម្រេចបានរៀនបង់ថ្លៃនៅដេប៉ាតឺម៉ង់គណិតវិទ្យានៅភ្នំពេញ
ក្រឡេកមកយុវតី ជួង រូស្សា វិញ នាងមានជីតាឈ្មោះ អ៊ុំ ថន ដែលជាអតីតទាហាន។ លោកបានចូលនិវត្តន៍នៅវ័យ ៦៤ឆ្នាំ បច្ចុប្បន្នជីតារបស់ រូស្សាមានវ័យ៦៧ឆ្នាំហើយ។ ឯ ឪពុកម្តាយ គឺជាកសិករធ្វើស្រែចម្ការ និងប្រកបមុខរបរដឹកឥវ៉ាន់បន្តិចបន្តួច។ យុវតីរូបនេះ មានបងប្អូនចំនួន ២នាក់ ដោយ រូស្សាគឺជាកូនច្បង។
កញ្ញា ជួង រូស្សា ជាសិស្សជាប់និទ្ទេស A មកពីវិទ្យាល័យ អន្លង់វែង និងជាចៅស្រី របស់អតីតទាហានការពារព្រំដែន ខេត្តឧត្តរមានជ័យ។ រូបភាព៖ ជួង រូស្សា
មិនមែនគ្រប់គ្នាអាចធ្វើបានឡើយ ប៉ុន្តែយុវតីវ័យ១៧ឆ្នាំរូបនេះ មានក្តីរំពឹងខ្លាំង ទៅនឹងការប្រឡងនេះ។ គ្រួសារ សាលា មិត្តភក្តិជាច្រើន បានដាក់ក្តីសង្ឃឹមពីលទ្ធផលប្រឡងជាប់និទ្ទេស A នេះ។ បើទោះគ្រួសារមានជីវភាពមធ្យម តែ រូស្សា តែងទទួលបានការលើកទឹកចិត្ត និងផ្តល់ក្តីស្រឡាញ់ជានិច្ច។
កញ្ញា ជួង រូស្សា បានរៀបរាប់តាមទូរសព្ទថា៖ «លទ្ធផលដែលខ្ញុំទទួលបាន ធ្វើឱ្យគ្រួសាររបស់ខ្ញុំកាន់តែមានភាពជឿជាក់មកលើខ្ញុំកាន់តែខ្លាំង។ លើសពីនេះ គាត់ក៏បានលើកទឹកចិត្ត ឱ្យខ្ញុំដាក់ពាក្យប្រឡងគ្រូផងដែរ។ ពីព្រោះ ខ្ញុំចង់ក្លាយជាគ្រូបង្រៀនគណិតវិទ្យាមួយរូប។
តាមពិតទៅ រូស្សា បានដាក់អាហារូបករណ៍ពីរកន្លែងលើជំនាញគណិតវិទ្យា។ នាងបានជាប់នៅសាកលវិទ្យាល័យជាតិបាត់ដំបង ប៉ុន្តែធ្លាក់នៅសាកលវិទ្យាល័យភូមិន្ទភ្នំពេញ។ ជម្រើសរបស់ រូស្សា គឺការបង់ថ្លៃសិក្សានៅភ្នំពេញ ដោយសារនៅទីនេះ នាងអាចស្នាក់នៅជាមួយបងប្អូន។
លទ្ធផលបាក់ឌុបដែលប្រកាសដោយក្រសួងអប់រំ យុវជន និងកីឡា កាលពីព្រឹកថ្ងៃទី២៣ ខែធ្នូ នេះ បង្ហាញឲ្យឃើញថា សិស្សស្រីរហូតដល់ទៅ៥នាក់នៅវិទ្យាល័យអន្លង់វែង ទទួលបាននិទ្ទេស A ក្នុងចំណោមជ័យលាភីនិទ្ទេស A ទូទាំងខេត្តឧត្តរមានជ័យ។
សិស្សស្រីពីវិទ្យាល័យអន្លង់វែងទាំង៥នាក់ ដែលទទួលបាននិទ្ទេស A រួមមាន គ្រី កក្កដា, ជួង រូស្សា, ប៉ែត នីមល, ស៊ន សុម៉ាវត្តី និងរតនៈ សុខនាង។ រីឯសិស្សនិទ្ទេស A មួយរូបទៀតប្រចាំខេត្តនេះ គឺសិស្សប្រុសឈ្មោះ ចាយ វារៈ មកពីវិទ្យាល័យ ហ៊ុន សែន ត្រពាំងប្រាសាទ ក្នុងស្រុកត្រពាំងប្រាសាទ៕