ការប្រកួតកីឡាទោចក្រយានជ្រើសរើសជើងឯកថ្នាក់ជាតិ ឆ្នាំ២០២២ ទើបតែបញ្ចប់ទៅកាលពីថ្មីៗនេះ ដែលជាការរៀបចំដោយសហព័ន្ធខ្មែរកីឡាទោចក្រយាន ដើម្បីស្វែងរកកីឡាករ-កីឡាការិនី ដែលមានគុណផលខ្ពស់ដើម្បីទៅចូលរួមការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជា នឹងទទួលរៀបចំធ្វើជាម្ចាស់ផ្ទះលើកដំបូង។

 

ទាំងវិញ្ញាសាកង់គក់ និងវិញ្ញាសាកង់ភ្នំ មានយុវជនជាច្រើនដែលស្រលាញ់ និងបានចូលរួមយ៉ាងច្រើនកុះករដោយក្តីស្រលាញ់ និងពេញចិត្តប្រកួតប្រជែងដោយសមត្ថភាព យុត្តិធម៌ និងត្រឹមត្រូវស្របតាមលក្ខន្តិកៈនៃការប្រកួតដែលបានតាមដាន និងត្រួតពិនិត្យដោយគណៈកម្មការជំនាញ។

 

លោក អ៊ុច សុខវិបុល គ្រូជម្រើសជាតិប្រភេទកីឡាកង់ភ្នំ មើលឃើញការចូលរួមរបស់យុវជនជំនាន់ក្រោយជាច្រើននាក់ស្ម័គ្រចិត្ត និងហ៊ានលះបង់ដើម្បីការប្រកួតប្រជែងលើប្រភេទវិញ្ញាសាដ៏លំបាកនេះ ដោយភាពម៉ឺងម៉ាត់ និងមានឆន្ទៈតស៊ូមុះមុតជាខ្លាំង។

 

លោក អ៊ុច សុខវិបុល និយាយថា៖«ថ្មីៗនេះយើងឃើញថាក្មេងៗគាត់ចូលរួមលេងច្រើនមែនទែន ជាពិសេសក្នុងផ្នែកកង់ភ្នំ វិញ្ញាសាយុវជនអាយុក្រោម ១៨ឆ្នាំហ្នឹង ក្មេងៗច្រើនណាស់។ ទាំងអស់នេះ អាចសម្គាល់បានថា ដោយសារអត្តពលិកកង់ភ្នំជម្រើសជាតិកម្ពុជាយើង បានទៅប្រកួតនៅស៊ីហ្គេម ក៏ដូចជាក្រៅស្រុក ទើបបណ្តាលចិត្តឱ្យយុវជននេះគាត់ងាកមកចាប់អារម្មណ៍ច្រើនមែនទែន»។

 

លោក សុខវិបុល បន្តថា៖«ទាំងអស់នេះក៏ជាឱកាសល្អមួយ ដែលក្មេងៗទាំងអស់ចូលរួមលេង យើងត្រូវដឹងដែរថាពេលឥឡូវចលករក្មេងៗ មានការចូលរួមលេងច្រើន តែត្រូវទាមទារឱ្យមានការគ្រប់គ្រង អប់រំ ការណែនាំ ដើម្បីឱ្យក្មួយៗ ប្អូនៗ ជាកីឡាករ-កីឡាការិនី ទាំងអស់គាត់ស្គាល់ពីច្បាប់ទម្លាប់នៃកីឡា»៕