អន្តរជាតិ
ជប៉ុន ផ្ដល់ប្រាក់៧៥០០ដុល្លារក្នុងកូនម្នាក់សម្រាប់គ្រួសារដែលចាកចេញពីទីក្រុងតូក្យូ
× រដ្ឋាភិបាលជប៉ុន នឹងផ្ដល់ប្រាក់ឧបត្ថម្ភមួយលានយ៉េន ស្មើនឹង៧,៥០០ដុល្លារក្នុងកូនម្នាក់សម្រាប់គ្រួសារដែលចាកចេញពីទីក្រុងតូក្យូ។ ថវិកាលើកទឹកចិត្តនេះ ជាវិធានការដែលរដ្ឋាភិបាលជប៉ុន ព្យាយាមដោះស្រាយបញ្ហាធ្លាក់ចុះនៃចំនួនប្រជាជននៅតំបន់ផ្សេងៗទៀត ស្របពេលដែលរាជធានីតូក្យូមានប្រជាជនខ្នាន់ខ្នាប់។
យោងរបាយការណ៍នៃប្រព័ន្ធផ្សព្វផ្សាយជប៉ុន ការផ្ដល់ថវិកាមួយលានយ៉េនសម្រាប់ក្រុមគ្រួសារដែលសម្រេចចិត្តចេញពីទីក្រុងតូក្យូនឹងប្រកាសជាផ្លូវការក្នុងខែមេសា ហើយនេះជាផ្នែកមួយនៃគោលនយោបាយជំរុញប្រជាជនឱ្យទៅរស់នៅក្រុង និងភូមិនានាដែលធ្លាក់ចុះចំនួនប្រជាជន។
ទោះបីជាចំនួនប្រជាជនបានធ្លាក់ចុះជាលើកដំបូងកាលពីឆ្នាំ២០២២ក្ដី ទីក្រុងតូក្យូនៅតែពោរពេញដោយប្រជាជនជាច្រើន ដែលតម្រូវឱ្យរដ្ឋាភិបាលធ្វើសកម្មភាពបន្ថែមទៀតដើម្បីកាត់បន្ថយដង់ស៊ីតេប្រជាជននៅទីក្រុងមួយនេះ។ រដ្ឋាភិបាលជប៉ុន ក៏ត្រូវលើកទឹកចិត្តប្រជាជនឱ្យប្រជាជនចាប់ផ្ដើមជីវិតក្នុងតំបន់ដែលមិនសូវទាន់សម័យ និងរងដោយផលប៉ះពាល់ដោយការកើនឡើងចំនួនប្រជាជនវ័យចាស់ ការថយចុះនៃកំណើនប្រជាជន និងការធ្វើចំណាកស្រុកនៃប្រជាជនវ័យក្មេងទៅកាន់ទីក្រុងធំៗដូចជាតូក្យូ និងអូសាកា។
ថវិកាជំនួយនេះនឹងផ្ដល់ជូនសម្រាប់ក្រុមគ្រួសារណាដែលកំពុងតែរស់នៅតំបន់ស្នូលចំនួន២៣របស់ទីក្រុងតូក្យូ និងខេត្ត-ក្រុងក្បែរនោះមាន Saitama Chiba និង Kanagawa។ ទីភ្នាក់ងារព័ត៌មាន Kyodo បញ្ជាក់ថា ដើម្បីទទួលបានអត្ថប្រយោជន៍នេះ ក្រុមគ្រួសារ ត្រូវផ្លាស់ប្តូរលំនៅឋានចេញពីទីក្រុងតូក្យូតែម្ដង។
បន្ថែមពីនេះ គ្រួសារទាំងនោះត្រូវរស់នៅក្នុងលំនៅឋានថ្មីយ៉ាងហោចណាស់៥ឆ្នាំ ហើយសមាជិកម្នាក់ត្រូវតែធ្វើការណាមួយ ឬក៏មានគម្រោងចាប់ផ្ដើមអាជីវកម្មនៅទីតាំងថ្មីនោះ។ ប្រសិនជាគ្រួសារណាមួយផ្លាស់ទីលំនៅចេញទៅកន្លែងទីបី ពួកគេត្រូវប្រគល់ប្រាក់ឧបត្ថម្ភវិញ។
ជាគោលការណ៍ ការផ្លាស់ទីលំនៅរបស់គ្រួសារទទួលបាន១ទៅ៣លានយ៉េនក្នុងមួយ គ្រួសារប្រសិនពួកគេបំពេញតាមលក្ខណៈវិនិច្ឆ័យមួយក្នុងចំណោមលក្ខណៈវិនិច្ឆ័យចំនួនបីរួមមាន ការមានការងារនៅក្រុមហ៊ុនតូច ឬមធ្យមនៅក្នុងតំបន់ដែលពួកគេផ្លាស់ទៅ ការបន្តការងារចាស់របស់ពួកគេតាមរយៈការធ្វើការពីចម្ងាយ ឬចាប់ផ្តើមអាជីវកម្មនៅក្នុងផ្ទះថ្មីរបស់ពួកគេ។ នេះបើយោងតាមកាសែត Nikkei ។ គ្រួសារដែលមានកូនពីរនាក់អាចមានសិទ្ធិ ទទួលបានរហូតដល់៥លានយ៉េន។
ចំណែកទីភ្នាក់ងារព័ត៌មាន Kyodo រាយការណ៍ថា សាច់ប្រាក់នេះមកពីថវិការដ្ឋាភិបាលកណ្តាល ហើយពាក់កណ្តាលទៀតបានមកថវិកាពីក្រុងក្នុងស្រុក។ រដ្ឋាភិបាលសង្ឃឹមថា ប្រជាជន១ម៉ឺននាក់នឹងផ្លាស់ទីលំនៅចេញពីទីក្រុងតូក្យូទៅតំបន់ឆ្ងាយពីក្រុងត្រឹមឆ្នាំ ២០២៧៕
© រក្សាសិទ្ធិដោយ thmeythmey.com