អន្តរជាតិ
អាម៉េរិកស្នើឱ្យ UN ជំរុញតាលីបង់ឱ្យលុបចោលច្បាប់ហាមឃាត់ការចូលរួមរបស់ស្ត្រី
× អគ្គរដ្ឋទូតអាម៉េរិកប្រចាំអង្គការសហប្រជាជាតិ (UN) លោកស្រី Linda Thomas-Greenfield នៅថ្ងៃទី១៣ ខែមករា បានជំរុញក្រុមប្រឹក្សាសន្តិសុខអនុវត្តដំណោះស្រាយដែលទទូចឱ្យអាជ្ញាធរតាលីបង់នៅអាហ្វហ្កានីស្ថានលុបចោលការហាមឃាត់ស្ត្រីក្នុងការធ្វើការឱ្យក្រុមអង្គការផ្ដល់ជំនួយ ឬចូលរៀននៅវិទ្យាល័យ ឬសកលវិទ្យាល័យ។
បើតាមតំណាងអាម៉េរិកប្រចាំ UN លោកស្រី Thomas-Greenfield ថ្លែងទៅកាន់ក្រុមប្រឹក្សាសន្តិសុខ ស្ថានការណ៍នៅអាហ្វហ្កានីស្ថានទាមទារឱ្យក្រុមប្រឹក្សាដ៏មានឥទ្ធិពលមួយនេះអនុម័តជាឯកច្ឆ័ន្ទអំពី ដំណោះស្រាយមួយដើម្បីថ្កោលទោសការហាមឃាត់ស្ត្រី ហើយលុបចោលចំណាត់ដែលរឹតត្បិតនេះភ្លាមៗ។
ដើម្បីចេញដំណោះស្រាយមួយ ក្រុមប្រឹក្សាសន្តិសុខត្រូវការគាំទ្រចំនួនប្រាំបួន ហើយមិនមានការបោះឆ្នោតវេតូពីរុស្ស៊ី ចិន អង់គ្លេស បារាំង ឬអាម៉េរិកឡើយ។
«ច្បាស់ណាស់ថា ក្រុមប្រឹក្សាសន្តិសុខមានវិធីសាស្ត្រមួយចំនួន»។ អគ្គរដ្ឋទូតសហភាពអារ៉ាប់រួមប្រចាំ UN លោកស្រី Lana Nusseibeh អះអាងបែបនេះជុំវិញវិធានការណាមួយចំពោះក្រុមតាលីបង់ រួចបន្តថា ក្រុមប្រឹក្សាសន្តិសុខគួរតែផ្ដោតលើជំហានជាក់ស្ដែងដែលអាចជួយស្ថានភាពបច្ចុប្បន្ននៅអាហ្វហ្កានីស្ថាន។
កាលពីខែធ្នូឆ្នាំ២០២២ ក្រុមប្រឹក្សាសន្តិសុខបានយល់ព្រមចំពោះសេចក្តីថ្លែងការណ៍ក្រៅផ្លូវការមួយដោយអំពាវនាវឱ្យមានការចូលរួមពេញលេញស្មើភាព និងមានអត្ថន័យរបស់ស្ត្រី និងក្មេងស្រីនៅអាហ្វហ្កានីស្ថាន ហើយជំទាស់ដាច់ខាតនឹងការហាមឃាត់ស្ត្រី ចូលរៀននៅសកលវិទ្យាល័យ ឬធ្វើការឱ្យក្រុមជំនួយ។
នៅមុនកិច្ចប្រជុំខាងលើ សមាជិកក្រុមប្រឹក្សាសន្តិសុខចំនួន១១ រួមមានអាម៉េរិក អង់គ្លេស និងបារាំងបានចេញសេចក្តីថ្លែងការណ៍រួមមួយដោយជំរុញឱ្យក្រុមតាលីបង់លុបចោលរាល់វិធានការជិះជាន់លើស្ត្រី និងកុមារីដែរ។
ការហាមប្រាមលើបុគ្គលិកជំនួយស្ត្រីត្រូវបានប្រកាសដោយរដ្ឋបាលដឹកនាំដោយក្រុមតាលីបង់កាលពីថ្ងៃទី ២៤ ខែធ្នូ។ បម្រាមនេះត្រូវបានដាក់ក្រោយការហាមឃាត់ស្ត្រីចូលរៀននៅសកលវិទ្យាល័យកាលពីដើមខែធ្នូ។ កុមារីក៏ត្រូវបានបញ្ឈប់ពីការចូលរៀននៅវិទ្យាល័យកាលពីខែមីនា៕
Tag:
អាម៉េរិក
អាហ្វហ្កានីស្ថាន
© រក្សាសិទ្ធិដោយ thmeythmey.com