ជាតិ
ឆ្នាំ២០២២ ទេសចរថៃ ឈរលេខរៀងទី១ ដែលមកកម្សាន្តនៅកម្ពុជាច្រើនជាងគេ រូបភាពពី ក្រសួងទេសចរណ៍៕
×
ដោយ៖ សែម ប្រាក់ដាវ
ភ្នំពេញ៖ របាយការណ៍របស់ក្រសួងទេសចរណ៍ឆ្នាំ ២០២២ បង្ហាញថា ទេសចរជនជាតិថៃ ឈរលេខរៀងទី១ ដែលមានភ្ញៀវជាង ៨៥ម៉ឺននាក់ បានធ្វើដំណើរមកកម្សាន្ដកម្ពុជា។ ចំនួននេះ មានការកើនឡើងប្រមាណ ៩៤២,៧ភាគរយ បើធៀបនឹងរយៈពេលដូចគ្នាកាលពីឆ្នាំ ២០២១។
កម្ពុជា ទទួលបានទេសចរក្នុងស្រុក ចំនួន១៣,៩៣លាននាក់ កើនឡើង១៩៩ភាគរយ ក្នុងឆ្នាំ២០២២ ។ ដោយឡែក ទេសចរអន្តរជាតិដែលមកកម្សាន្តនៅកម្ពុជា មានប្រមាណ ២,២៨លាននាក់ កើនឡើង១០៥៩ភាគរយ និងទេសចរបរទេសផ្ទៃក្នុង ចំនួន ១,៨៨លាននាក់ បើធៀបនឹងរយៈពេលដូចគ្នាកាលពីឆ្នាំទៅ។
យោងតាមរបាយការណ៍របស់ក្រសួងទេសចរណ៍ ចេញផ្សាយនៅថ្ងៃទី ១៩ មករានេះ ក្នុងចំណោមភ្ញៀវអន្តរជាតិជាង២លាននាក់ ភ្ញៀវទេសចរថៃ បានឈរនៅកំពូលតារាង ដែលធ្វើដំណើរមកកម្សាន្តកម្ពុជាច្រើនជាងគេ មានចំនួនសរុប ៨៥៣ ៣៧៦នាក់។
ចំណែកទេសចរជនជាតិវៀតណាមវិញ ឈរនៅលេខរៀងទី២បន្ទាប់ពីថៃ ដែលមានជាង ៤៦ម៉ឺននាក់, ចិន ឈរនៅលេខរៀងទី៣ មានជាង ១០ម៉ឺននាក់។ ចំណែក អាម៉េរិក មានជាង ៩៣ពាន់នាក់, ឡាវ មានជាង ៩២ពាន់នាក់ និងឥណ្ឌូណេស៊ី មានជាង ៧៥ពាន់នាក់។ ក្នុងចំណោមទេសចរទាំងនេះ ទេសចរដែលកើនឡើងគួរឱ្យកត់សម្គាល់ មានដូចជាវៀតណាម កើនឡើងរហូតដល់ ១៩៩៧,៦ភាគរយ និងចិន ១៣៣,៥ ភាគរយ។
គួរបញ្ជាក់ដែរថា ក្នុងឆ្នាំ២០២២ កម្ពុជាទទួលជើងហោះហើរអន្តរជាតិសរុបចំនួន ១០៩ ៣៨ជើង ក្នុងនោះ អាកាសយានដ្ឋានអន្តរជាតិភ្នំពេញ មានចំនួន ៨៧៤០ ជើងហោះហើរ, អាកាសយានដ្ឋានអន្តរជាតិសៀមរាប មាន ១៧៣៨ ជើងហោះហើរ និងអាកាសយានដ្ឋានអន្តរជាតិព្រះសីហនុមាន ៤៦០ ជើងហោះហើរ៕
Tag:
ThmeyThmey25
ទេសចរណ៍
© រក្សាសិទ្ធិដោយ thmeythmey.com