បើតាមរបាយការណ៍របស់ IRNA មូលដ្ឋានយោធាអាកាស Eagle 44 មានសមត្ថភាពផ្ទុក និង​ប្រតិបត្តិ​ការយន្តហោះចម្បាំង និងដ្រូនផងដែរ។ យ៉ាងណាមិញ IRNA មិនបានអធិប្បាយពីទីតាំងនៃមូលដ្ឋាន​យោធានេះលម្អិតឡើយ។
 

«វាគឺជាមូលដ្ឋានទ័ពអាកាសដ៏សំខាន់បំផុតមួយរបស់កងទ័ពជាមួយនឹងយន្តហោះចម្បាំងបំពាក់​ដោយ​មីស៊ីលចម្ងាយឆ្ងាយ និងសាងសង់ជ្រៅក្រោមស្រទាប់ផែនដី»។ ទីភ្នាក់ងារព័ត៌មាន IRNA អះអាង​បែប​នេះ​រួចបន្ថែមថា មូលដ្ឋាននេះមានជម្រៅរាប់រយម៉ែត្រនៅក្រោមភ្នំ និងមាន​សមត្ថភាព​ទប់​ទល់​គ្រាប់​បែករបស់យន្ដហោះទម្លាក់គ្រាប់បែកយុទ្ធសាស្ត្ររបស់អាមេរិក។
 

នៅថ្ងៃដដែល នាយសេនាធិការកងទ័ពអ៊ីរ៉ង់ លោក Mohammad Bagheri បាន​ប្រាប់ទូរទស្សន៍រដ្ឋថា រាល់ការវាយប្រហារលើអ៊ីរ៉ង់ពីសំណាក់សត្រូវរួមទាំងអ៊ីស្រាអែល នឹងទទួលបានការឆ្លើយតបពី​មូលដ្ឋានទ័ពអាកាសជាច្រើនរបស់អ៊ីរ៉ង់ រួមទាំងមូលដ្ឋាន Eagle 44​ ផងដែរ។

 

កាលពីខែឧសភាឆ្នាំមុន កងទ័ពអ៊ីរ៉ង់បានផ្តល់ព័ត៌មានលម្អិតអំពីមូលដ្ឋានក្រោមដីមួយទៀតដែល​ផ្ទុក​ដ្រូន ខណៈដែលប្រទេសនេះស្វែងរកការការពារយុទ្ធោបករណ៍យោធាពីការវាយប្រហារ​តាម​អាកាស​ពី​សំណាក់អ៊ីស្រាអែលដែលជាសត្រូវសួពូជ៕