ជាតិ
យុវជនសកម្ម សេវាល្អ
កំពង់ធំ៖ យន្តការច្រកចេញចូលតែមួយ នឹងជួយឱ្យការផ្តល់សេវាក្នុងឃុំកំពង់ស្វាយកាន់តែរហ័ស
×
ដោយ៖ ជឿង ស្រីចាន់ (យុវជនឃុំកំពង់ស្វាយ)
ស្រុកកំពង់ស្វាយ, កំពង់ធំ៖ យន្តការច្រកចេញចូលតែមួយរដ្ឋបាលឃុំ មានអត្ថប្រយោជន៍ច្រើនដល់ពលរដ្ឋ ដោយពួកគេមិនចំណាយថវិកាខ្ជះខ្ជាយ នៅពេលទៅធ្វើឯកសារផ្សេងៗ និងជួយបង្កើនការផ្ដល់សេវាក្នុងឃុំកាន់តែល្អប្រសើរជាងមុន។ លោក ជឹម ជឿង ជំទប់ទី១ នៅឃុំកំពង់ស្វាយ លើកឡើងដូច្នេះ រួចលោកបានរៀបរាប់ទៀតថា រដ្ឋបាលឃុំកំពង់ស្វាយ ទើបតែដាក់ដំណើរការយន្តការច្រកចេញចូលនេះ កាលពីដើមឆ្នាំ២០២៣នេះប៉ុណ្ណោះ។
បើតាមជំទប់ទី១ ឃុំកំពង់ស្វាយ នៅពេលដែលមានច្រកចេញចូលតែមួយ ពលរដ្ឋមិនពិបាកតាមរកមេភូមិ ឬមេឃុំ ដើម្បីធ្វើឯកសារទៀតនោះទេ គឺទៅទទួលសេវាតែមួយកន្លែង(ច្រកចេញ-ចូលតែមួយ) បានធ្វើឯកសារគ្រប់ទាំងអស់តែម្ដង។
ការផ្ដល់សេវានៅច្រកចេញ-ចូលតែមួយ មានច្រើនប្រភេទទៅតាមតម្រូវការរបស់ពលរដ្ឋ ដោយមានធ្វើអត្រានុកូលដ្ឋាន សំបុត្រកំណើត និងលិខិតលក់ដូរជាដើម។ លោក ជឿង រៀបរាប់បែបនេះ ហើយបន្តថា ច្រកចេញចូលតែមួយ នឹងដាក់អនុវត្តនៅឆ្នាំ២០២៣ ដោយអាជ្ញាធរបានចុះផ្សព្វផ្សាយឱ្យមេភូមិ នីមួយៗ ជួយប្រាប់ពលរដ្ឋបន្ត ដើម្បីឱ្យពួកគេបានដឹងពីការធ្វើឯកសារនៅច្រកចេញចូលតែមួយ។
លោក ជឹម ជឿង បានបញ្ជាក់ថា៖ «ពន្លឿនការផ្ដល់សេវាលឿនជាងមុន ពលរដ្ឋមិនចាំបាច់ចំណាយថវិកាច្រើនកន្លែង។ បើលក់គោ១ក្បាល ទៅបង់សេវានៅច្រកចេញចូលតែមួយតែ ៣០០០រៀល ជាការស្រេច មិនចាំបាច់ចំណាយច្រើនដងទេ»។
ដោយសារតែយន្តការច្រកចេញចូលរតែមួយរដ្ឋបាលឃុំនេះទើបតែចាប់ផ្តើមដំណើរការ ហេតុនេះអាជ្ញាធរ នឹងបង្កើនការផ្សព្វផ្សាយឱ្យពលរដ្ឋបានយល់ដឹង ពីគោលបំណងនៃការបង្កើតយន្តការនេះ និងពីប្រភេទសេវាដែលពលរដ្ឋអាចទៅស្វែងរកពីមន្ត្រីដែលទទួលខុសត្រូវនៅយន្តការច្រកចេញចូលតែមួយរដ្ឋបាលឃុំ។
លោក ជឿង បានបញ្ជាក់ថា ថវិកាដែលទទួលបានពីថ្លៃសេវារបស់ពលរដ្ឋ នឹងត្រូវប្រើប្រាស់សម្រាប់ការអភិវឌ្ឍហេដ្ឋារចនាសម្ព័ន្ធផ្លូវថ្នល់ក្នុងឃុំ និងទិញសម្ភារប្រើប្រាស់ក្នុងឃុំផ្សេងៗទៀត៕
(អត្ថបទនេះ គឺជាស្នាដៃរបស់ក្រុមយុវជន និងត្រូវបានរៀបរៀងឡើង ក្រោមជំនួយហិរញ្ញវត្ថុរបស់សហភាពអឺរ៉ុប និងទីភ្នាក់ងារសហប្រតិបត្តិការអភិវឌ្ឍអន្តរជាតិស៊ុយអ៊ែត តាមរយៈអង្គការតម្លាភាពកម្ពុជា និងអង្គការអាក់សិនអេតកម្ពុជា។ រាល់ខ្លឹមសារនៅក្នុងអត្ថបទនេះ គឺជាការទទួលខុសត្រូវរបស់ស្មេរ ឬផលិតករ ហើយមិនឆ្លុះបញ្ចាំងអំពីទស្សនៈរបស់សហភាពអឺរ៉ុប និងទីភ្នាក់ងារសហប្រតិបត្តិការ អភិវឌ្ឍអន្តរជាតិស៊ុយអ៊ែតនោះទេ)
Tag:
រដ្ឋបាលឃុំ
ច្រកចេញចូលតែមួយ
សេវាសាធារណៈ
© រក្សាសិទ្ធិដោយ thmeythmey.com