ក្នុងខែមករា កម្ពុជា បាននាំចេញអង្ករចំនួន ៣៦ ៩០០តោន ដែលមានតម្លៃ ២៨,៨៣លានដុល្លារ ទៅកាន់៣៤ ប្រទេស។ ដោយក្នុងនោះ បាននាំទៅសហគមន៍អឺរ៉ុបចំនួន ២០ប្រទេស ស្មើនឹង ៤៨ភាគរយ នៃការនាំចេញសរុប ដែលមានបរិមាណចំនួន ១៧៧៩៥តោន គិតជាទឹកប្រាក់ចំនួន ១៣,៤៤លានដុល្លារ។

 

កម្ពុជា បាននាំចេញអង្ករទៅចិន និងហុងកុង រហូតដល់ ៤១ភាគរយ ដែលមានបរិមាណ ១៥ ០៤៥តោន ស្មើនឹង ១១,៧៧លានដុល្លារ។ ប្រទេសអាស៊ានចំនួន ២ គឺម៉ាឡេស៊ី និងសិង្ហបុរី បានបញ្ជារទិញអង្ករកម្ពុជា ចំនួន ១ ៨៧១តោន ដែលគិតជាទឹកប្រាក់ជាង ១លានដុល្លារ និងគោលដៅ ៧ផ្សេងទៀត រួមមាន ហ្គាប៊ុង អាម៉េរិក កាណាដា អូស្ត្រាលី ញ៉ូហ្សេឡេន រុស្សី និងអារ៉ាប៊ីតសាអូឌីត ចំនួន ២ ១៨៩តោន ដែលគិតជាទឹកប្រាក់ ២,៥៣លានដុល្លារ។

 

សហព័ន្ធស្រូវអង្ករកម្ពុជា បានបញ្ជាក់ថា ក្នុងខែមករា ការនាំចេញអង្ករទៅចិន បានថយចុះ ដោយសារការឈប់សម្រាក់ពិធីបុណ្យចូលឆ្នាំចិន ជិត ២សប្ដាហ៍។ 

 

ចំពោះ ប្រភេទអង្ករដែលត្រូវនាំចេញ រួមមាន អង្ករក្រអូបប្រណិត«ម្លិះអង្គរ» ចំនួន ២២ ៨១០ តោន អង្ករសែនក្រអូប ចំនួន ៩ ៣៥៨ តោន អង្ករស ធម្មតាចំនួន ១ ៧២១ តោន អង្ករចំហុយចំនួន ១ ៨៦៧ តោន អង្ករសរីរាង្គចំនួន ១ ១៤៤ តោន និងបាននាំស្រូវចេញចំនួន ២៥២ ៧១៤តោន។ សរុបតម្លៃនៃការនាំចេញអង្ករ និងស្រូវ បានទឹកប្រាក់ចំនួន ៩២ លានដុល្លារ៕