កម្លាំងល្បាតចិន និងហ្វីលីពីន តែងប្រឈមមុខដាក់គ្នានៅក្នុងដែនទឹកជម្លោះ ក្នុងសមុទ្រចិនខាងត្បូង។ នៅថ្ងៃទី៦ ខែកុម្ភៈ កន្លងទៅ នាវាល្បាតចិន បានបាញ់ភ្លើងឡាស៊ែរ ដាក់នាវាល្បាតហ្វីលីពីនក្នុងគោលបំណងរារាំងមិនឱ្យឆ្ពោះទៅតំបន់ Second Thomas Shoal ដើម្បីផ្គត់ផ្គង់កម្លាំងទ័ពហ្វីលីពីននៅទីនោះ។ យ៉ាងណាមិញ អ្នកនាំពាក្យក្រសួងការបរទេសចិន បាននិយាយការពារសកម្មភាពយោធាខ្លួនថា នាវាល្បាតហ្វីលីពីនបានឆ្លងមកក្នុងដែនទឹកចិនដោយគ្មានការអនុញ្ញាត។ 

 

ក្រោយពីហេតុការណ៍នេះ ហ្វីលីពីន បានដាក់ការតវ៉ាទៅស្ថានទូតចិនក្នុងរដ្ឋធានីម៉ានីល និងបានរិះគន់ចំពោះកម្លាំងល្បាតចិនផង។

 

ជុំវិញការបាញ់ភ្លើងឡាស៊ែរនោះ ក្រសួងការបរទេសអាម៉េរិក នៅមិនស្ងៀមឡើយ ដោយ បានប្រកាសចាត់ទុកកាយវិការដ៏គ្រោះថ្នាក់​ ដែលគំរាមកំហែងស្ថិរភាព និងសន្តិភាពក្នុងតំបន់ ហើយថែមទាំងព្រមានចិនថែមទៀត។ 

 

«អាម៉េរិកឈរនៅជាមួយសម្ព័ន្ធមិត្តរបស់ខ្លួន»។ លោក Ned Price អ្នកនាំពាក្យក្រសួងការបរទេសអាម៉េរិក បានសង្កត់ធ្ងន់បែបនេះ នៅក្នុងថ្ងៃទី១៣ ខែកុម្ភៈ ដោយបន្តថា រាល់ការវាយប្រហារលើកម្លាំងទ័ព នាវាសាធារណៈ ឬយន្តហោះរបស់ហ្វីលីពីន រួមទាំងនាវាល្បាតនៅក្នុងសមុទ្រចិនខាងត្បូង នឹងធ្វើឱ្យអាម៉េរិកអនុវត្តការប្តេជ្ញាក្រោមសន្ធិសញ្ញាការពារទៅវិញទៅមកឆ្នាំ១៩៥១។ កិច្ចព្រមព្រៀងនេះ បានចែងថា ភាគីម្ខាងត្រូវជួយភាគីម្ខាងទៀត ក្នុងករណីមានការវាយប្រហារពីសំណាក់ប្រទេសខាងក្រៅ។ 

 

ទន្ទឹមនេះ លោក Price បានបន្ថែមផងថា នាវាល្បាតចិនតែងបង្កសកម្មភាពបង្ករឿង និងមិនសុវត្ថិភាព ជាមួយនាវារបស់ហ្វីលីពីន។ នេះមិនមែនជាលើកទីមួយឡើយ ដែលអាម៉េរិកប្រកាសច្បាស់ៗ ក្នុងការជួយ និងឈរនៅខាងហ្វីលីពីន។

 

គួររំឭកថា នៅក្នុងឆ្នាំ២០២២ប៉ុណ្ណោះ រដ្ឋាភិបាលក្រុងម៉ានីល បានដាក់ការតវ៉ាជាមួយក្រុងប៉េកាំងរហូតដល់ទៅជិត ២០០លើក ពាក់ព័ន្ធនឹងសកម្មភាពចិន នៅក្នុងសមុទ្រចិនខាងត្បូង៕