អន្តរជាតិ
×![]()
ដោយ: ជា ពេជ្រដាឡែន
នាយករដ្ឋមន្ត្រីឥណ្ឌាលោក នារិន្ទ្រា ម៉ូឌី នៅថ្ងៃទី១៣ ខែកុម្ភៈបានបង្ហាញពីមហិច្ឆតាក្នុងការនាំចេញសម្ភារយោធាច្រើនជាងមុនបីដងក្នុងពីរឆ្នាំខាងមុខ ស្របពេលឥណ្ឌារៀបចំព្រឹត្តិការណ៍បង្ហាញសមត្ថភាពក្រុមហ៊ុនក្នុងស្រុកលើការផលិតសព្វាវុធនានា។
ឥណ្ឌា កំពុងសម្លឹងរកការចុះកិច្ចព្រមព្រៀងការពារជាតិតម្លៃ៩ពាន់លានដុល្លារនៅក្នុងព្រឹត្តិការណ៍ ពិព័រណ៍ Aero India នៅទីក្រុង Bengaluru ។ រៀបចំឡើងប្រាំពីរថ្ងៃ ព្រឹត្តិការណ៍ដ៏ធំមួយនេះ ប្រមូលផ្ដុំក្រុមហ៊ុនអាកាសចរណ៍សម្រាប់បំពេញតម្រូវការស៊ីវិលនិងក្រុមហ៊ុនផលិតសព្វាវុធផងដែរ។
«សព្វថ្ងៃនេះឥណ្ឌាមិនមែនគ្រាន់តែជាទីផ្សារសម្រាប់ក្រុមហ៊ុនការពារជាតិប៉ុណ្ណោះទេ ប៉ុន្តែក៏ជាដៃគូផ្នែកការពារដ៏មានសក្តានុពលផងដែរ។ ខ្ញុំសូមអំពាវនាវដល់វិស័យឯកជនរបស់ឥណ្ឌាឱ្យវិនិយោគបន្ថែមទៀតក្នុងវិស័យការពារជាតិរបស់ប្រទេស»។ នាយករដ្ឋមន្ត្រីឥណ្ឌា ថ្លែងសុន្ទរកថាបែបនេះនាព្រឹត្តិការណ៍តាំងពិព័រណ៍ខាងលើរួចបន្ថែមថា ឥណ្ឌានាំចេញផលិតផលសព្វាវុធទៅប្រទេសចំនួន៧៥ ហើយក្នុងពេលពីរឆ្នាំខាងមុខឥណ្ឌាអាចនឹងបង្កើនចំនួននាំចេញច្រើនជាងបីដងក្នុងមួយឆ្នាំរហូតដល់ទំហំ៥ពាន់លានដុល្លារ។
ការនាំចេញរបស់ឥណ្ឌាកន្លងមករួមមានឧទ្ធម្ភាគចក្រ Dhruv របស់ក្រុមហ៊ុន Hindustan Aeronautics (HAL) ទៅកាន់ហ្វីលីពីន ម៉ូរីស និងអេក្វាឌ័រ និងមីស៊ីលលឿនជាងសំឡេង របស់ក្រុមហ៊ុនរុស្ស៊ី-ឥណ្ឌា BrahMos Aerospace ទៅហ្វីលីពីន។ ក្រុមហ៊ុន HAL ក៏បានលក់យន្តហោះចម្បាំងធុនស្រាល Tejas របស់ខ្លួនទៅឱ្យម៉ាឡេស៊ីផងដែរ។
លើសពីនេះ ឥណ្ឌាក៏បាននាំចេញសព្វាវុធផ្សេងទៀតដូចជា នាវាល្បាត ប្រព័ន្ធឃ្លាំមើលតាមឆ្នេរសមុទ្រ ឧបករណ៍បាញ់គ្រាប់រ៉ុក្កែត និងគ្រឿងបន្លាស់សម្រាប់ប្រព័ន្ធរ៉ាដា។ ឥណ្ឌាក៏ចង់ឱ្យក្រុមហ៊ុនក្នុងស្រុកតូចៗផ្ដើមអាជីវកម្មបង្កើតគ្រឿង បន្លាស់សម្រាប់ផលិតផលការពារជាតិធំៗនៅទូទាំងពិភពលោកក៏ដូចជាទាក់ទាញការវិនិយោគបរទេសសម្រាប់ការអភិវឌ្ឍ និងការផលិតរួមគ្នា។
តាមពិតទៅ ឥណ្ឌាជាប្រទេសមួយដែលនាំចូលសម្ភារយោធាច្រើនជាងអស់ជាច្រើនទស្សវត្សរ៍មកហើយ។ មហិច្ឆតានាំចេញរបស់ទីក្រុងញូដែលីនៅពេលនេះ ជាសញ្ញានៃការបង្កើនឥទ្ធិពលរបស់ឥណ្ឌាទាក់ទាញការវិនិយោគក្នុងឧស្សាហកម្មក្នុងស្រុករបស់ខ្លួន៕
Tag:
ឥណ្ឌា
© រក្សាសិទ្ធិដោយ thmeythmey.com
