អន្តរជាតិ
ក្រុម G7 ត្រៀមដាក់ទណ្ឌកម្មថ្មីលើរុស្ស៊ី
× ក្រុមប្រទេសសេដ្ឋកិច្ចរីកចម្រើនទាំង៧ (G7) កំពុងតែរៀបចំការដាក់ទណ្ឌកម្មបន្ថែមលើរុស្ស៊ី ស្របគ្នាខួបមួយឆ្នាំបន្ទាប់ពីការលុកលុយលើអ៊ុយក្រែន។ ទណ្ឌកម្មថ្មី នឹងផ្តោតលើវិស័យសេដ្ឋកិច្ចសំខាន់ៗរបស់រុស្ស៊ី និងប្រទេស ឬអង្គការផ្សេងទៀតដែលជួយដល់កិច្ចប្រឹងប្រែងធ្វើសង្គ្រាមរបស់ទីក្រុងមូស្គូ។
មេដឹកនាំនៃប្លុកប្រទេសអភិវឌ្ឍន៍ទាំង៧ (G7) ជួបប្រជុំគ្នាតាមប្រព័ន្ធវីដេអូអនឡាញជាមួយប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី ដើម្បីប្រារព្ធខួបមួយឆ្នាំនៃការឈ្លានពានរបស់រុស្ស៊ី។ នាយករដ្ឋមន្ត្រីជប៉ុនដែលជាប្រធាន G7 និយាយថា ខ្លួនកំពុងពិចារណាវិធានការថ្មី តែមិនបានផ្តល់ព័ត៌មានលម្អិតណាមួយឡើយ ហើយបានអំពាវនាវឱ្យមានជំហររួបរួមឆ្ពោះទៅកាន់ទីក្រុងមូស្កូ។
«រុស្ស៊ីកំពុងបដិសេធក្នុងការផ្លាស់ប្តូរជំហររឹងរូសសរបស់ពួកគេ»។ នាយករដ្ឋមន្ត្រីជប៉ុន គីស៊ីដា ហ្វូមីអូ បានលើកឡើងបែបនេះនៅក្នុងសន្និសីទកាសែតមួយដើម្បីរំលឹកដល់ការឈ្លានពានរបស់រុស្ស៊ី។ នាយករដ្ឋមន្ត្រីជប៉ុន បន្តថា សហគមន៍អន្តរជាតិត្រូវតែរួមគ្នា និងបង្ហាញពីសាមគ្គីភាព និងដាក់ទណ្ឌកម្មខ្លាំងៗប្រឆាំងនឹងរុស្ស៊ី។
អង់គ្លេស និងអាមេរិកដែលជាសមាជិក G7 ដូចគ្នា បានដាក់ទណ្ឌកម្មថ្មីដោយឡែកពីគ្នាលើរុស្ស៊ី រួមទាំងការហាមឃាត់ការនាំចេញ និងពន្ធលើសម្ភារទាំងអស់ដែលប្រើប្រាស់ក្នុងសង្គ្រាម ក៏ដូចជាប្រទេសទីបីដែលគាំទ្រដល់ការបន្តសង្រ្គាមរបស់រុស្ស៊ីនៅទូទាំងអឺរ៉ុប អាស៊ី និងមជ្ឈិមបូព៌ា។
ជាមួយគ្នានេះ រដ្ឋមន្ត្រីហិរញ្ញវត្ថុ G7 នៅឯកិច្ចប្រជុំនៃក្រុមប្រទេសរីកចម្រើនទាំង២០ (G20) ដែលរៀបចំដោយឥណ្ឌា ក៏បានអំពាវនាវឱ្យមានការដាក់ទណ្ឌកម្មកាន់តែតឹងរ៉ឹងលើទីក្រុងមូស្គូ ក៏ដូចជាផ្ដល់ជំនួយហិរញ្ញវត្ថុបន្ថែមទៀតសម្រាប់អ៊ុយក្រែន៕
© រក្សាសិទ្ធិដោយ thmeythmey.com