អ៊ីរ៉ង់បានពង្រីកកម្មវិធីមីស៊ីលរបស់ខ្លួន ជាពិសេសមីស៊ីលបាលីស្ទីក ទោះមានការជំទាស់ពីអាមេរិក និងបណ្តាប្រទេសអឺរ៉ុបក្ដី។ ទីក្រុងតេហេរ៉ង់និយាយថា ការពង្រឹងកម្មវិធីមីស៊ីលមានបំណងការពារ ខ្លួន​សុទ្ធសាធ និងមានលក្ខណៈទប់ស្កាត់ការគំរាមកំហែងណាមួយ។ ជាការវិវត្តថ្មីមួយទៀត អ៊ីរ៉ង់ប្រកាសថា ខ្លួនទើបបានអភិវឌ្ឍមីស៊ីលចម្ងាយឆ្ងាយមួយប្រភេទទៀត។

 

«មីស៊ីលចម្ងាយឆ្ងាយរបស់យើងដែលមានចម្ងាយ១,៦៥០គីឡូម៉ែត្រត្រូវបានបញ្ចូលទៅក្នុងឃ្លាំងអាវុធ​សាធារណរដ្ឋអ៊ីស្លាមអ៊ីរ៉ង់»។ ប្រមុខកម្លាំងការពារដែនអាកាសបដិវត្តន៍ឧតម្តសេនីយ៍ Amirali Hajizadeh លើកឡើងបែបនេះ ក្នុងកិច្ចសន្ទនាមួយជាមួយទូរទស្សន៍ជាតិ។ទូរទស្សន៍ជាតិអ៊ីរ៉ង់ក៏​បាន​ផ្សាយ​​វីដេអូ​ដំបូង​ដែល​បង្ហាញ​ពី​មីស៊ីលថ្មី​ឈ្មោះ Paveh ដែរ។

 

ឧតម្តសេនីយ៍ Hajizadeh ក៏បានផ្ញើសារគំរាមម្ដងទៀតចំពោះការសម្លាប់មេបញ្ជាការកំពូលអ៊ីរ៉ង់ Qassem Soleimani កាលពីឆ្នាំ២០២០ ដោយនិយាយថា អ៊ីរ៉ង់កំពុងស្វែងរកពេល​សម្លាប់​អតីត​ប្រធានាធិបតីអាមេរិក ដូណាល់ ត្រាំ អតីតរដ្ឋមន្ត្រីការបរទេស ម៉ៃ ប៉ុមប៉េអូ និង​មេបញ្ជាការយោយោធាដែលពាក់ព័ន្ធ៕