របាយការណ៍បូកសរុបការងារប្រចាំឆ្នាំ២០២២ របស់ក្រសួងការបរទេស បញ្ជាក់ថា តំណាងកម្ពុជាប្រចាំនៅបរទេស បានយកចិត្តទុកដាក់ខ្ពស់ក្នុងការទាក់ទងជាពលរដ្ឋខ្មែរ និងជួយសម្របសម្រួលដល់សេចក្ដីត្រូវការរបស់ពួកគេផងដែរ។ ទន្ទឹមនឹងនេះ មានពលរដ្ឋខ្មែរ៧៩៥៣នាក់ ត្រូវបានក្រសួងជួយសម្របសម្រួលឲ្យត្រឡប់មកកម្ពុជាវិញ។ ពួកគេទាំងនោះ គឺបានរងគ្រោះនៅប្រទេសថៃ ឡាវ វៀតណាម ម៉ាឡេស៊ី ចិន ឥណ្ឌូណេស៊ី មីយ៉ាន់ម៉ា សិង្ហបុរី។ 

 

«ក្រសួងការបរទេស និងសហប្រតិបត្តិការអន្តរជាតិ បានផ្ដល់ការគាំទ្រ គាំពារ ជួយសង្គ្រោះ និងសម្របសម្រួលមាតុភូមិនិវត្តន៍ដល់ពលរដ្ឋខ្មែរដែលរងគ្រោះដោយការរំលោភសិទ្ធិសេរីភាពនៅបរទេស និងអំពើជួញដូរមនុស្សចំនួន៧៩៥៣នាក់»។ នេះបើតាមរបាយការណ៍ក្រសួងការបរទេស ចេញថ្ងៃទី១មីនា ២០២៣។ 

 

គួរបញ្ជាក់ថា បច្ចុប្បន្ននេះ ក្រសួងការងារ និងបណ្ដុះបណ្ដាល បានអនុញ្ញាតឲ្យពលរដ្ឋកម្ពុជាជាង១,៣លាននាក់ ទៅធ្វើការស្របច្បាប់។ ក្នុងនោះ មានប្រទេសថៃ មានពលរដ្ឋកម្ពុជាស្នាក់នៅ និងបំពេញការងារច្រើនជាងគេ ដែលមានរហូតដល់១,២លាននាក់។ ចំណែក ប្រទេសកូរ៉េ ត្រឹមតែជាង៤,៩ម៉ឺននាក់, ជប៉ុន១,៦ម៉ឺននាក់,​ ម៉ាឡេស៊ីមានជាង២,២ម៉ឺននាក់ និងសឹង្ហបុរី៨៥១នាក់។ នេះបើតាមរបាយការណ៍របស់ក្រសួងការងារ៕