ភ្នំពេញ៖ វិស័យកសិកម្មកម្ពុជា ជាវិស័យសំខាន់ក្នុងការរួមចំណែកអភិវឌ្ឍសេដ្ឋកិច្ចជាតិ។ ស្រូវអង្ករ ជាកសិផលនាំមុខមួយរបស់កម្ពុជា ក្នុងការនាំចេញទៅក្រៅប្រទេស។ លោក សុខ ទូច បន្តអំពាវនាវឱ្យមានអ្នកជំនាញក្នុងស្រុកកែច្នៃកសិផលជាតិច្រើនជាងបច្ចុប្បន្ន។
លោក សុខ ទូច ប្រធានរាជបណ្ឌិត្យសភាកម្ពុជា ចង់ឃើញការកែច្នៃកសិផលមួយមុខ ឱ្យចេញជាផលិតផលច្រើន ជាងការនាំចេញសុទ្ធសាធ។ លោកយល់ថា ការធ្វើដូច្នេះទើបល្អជាងការពឹងផ្នែកទាំងស្រុងលើការនាំចេញកសិផលទៅទីផ្សារបរទេស។
«កុំអួតលក់អង្ករ ១លានតោនចេញទៅស្រុកគេ! កុំអួតលក់មៀន ពាន់តោនទៅស្រុកគេ! ត្រូវមោទកភាពនៅពេលអ្នកអាចកែច្នៃអង្ករ ឱ្យចេញជាផលិត២០មុខ ដែលមិនមែនជាអង្ករទៀត! នោះ បានជាភាពអស្ចារ្យនៃសង្គមកែច្នៃ»។ នេះជាការថ្លែងរបស់លោក សុខ ទូច នៅក្នុងកិច្ចពិភាក្សាតុមូល ស្ដីពី សារៈសំខាន់នៃការបណ្ដុះបណ្ដាលវិជ្ជាជីវៈ កាលពីថ្ងៃទី ០១ ខែមីនា ឆ្នាំ២០២៣។
លោក សុខ ទូច ផ្ដល់គំនិតបន្ថែមថា៖ «កុំដឹកដំឡូងទៅលក់! (យើង) ត្រូវកែច្នៃដំឡូង មុននឹងលក់! ហេតុអ្វីគេកែច្នៃបាន? ហេតុអ្វីយើងមិន ព្រមធ្វើការកែច្នៃ?»។
ការខ្វះខាតរោងចក្រកែច្នៃនេះ មិនមែនជារឿងថ្មីទេ។ កន្លងមក អ្នកជំនាញកសិកម្ម តែងតែប្រាប់ពីផលលំបាកក្នុងការខ្វះអ្នកជំនាញកែច្នៃកសិផល ដែលកសិករដាំដុះបាន។ នៅពេលដែលកសិផលទាំងនោះ មិនសូវមានទីផ្សារនាំចេញ កសិករត្រូវប្រឈមខាត ឬលក់ចេញក្នុងតម្លៃថោក។
ដោយមើលឃើញពីបញ្ហាក្នុងវិស័យកសិកម្មបែបនេះ រដ្ឋាភិបាលតែងតែអំពាវនាវឱ្យមានអ្នកវិនិយោគផ្នែកកែច្នៃផលិតផល កាន់តែច្រើន។ កម្ពុជា ត្រូវអូសទាញអ្នកវិនិយោគ លើការកែច្នៃកសិកម្មបន្ថែមទៀត ដើម្បីពង្រីកការនាំចេញ បន្ធូយបន្ថយការផលិតលើសតម្រូវការ និងបន្ថែមតម្លៃដល់ផលិតកម្ម ដែលមានស្រាប់។
ជាមួយគ្នានេះ រដ្ឋាភិបាលកម្ពុជា បានដាក់គោលដៅនាំចេញអង្ករឱ្យបាន១លានតោនក្នុងមួយឆ្នាំទៅកាន់ទីផ្សារអន្តរជាតិ។ ប៉ុន្តែគោលដៅនេះ មិនទាន់បានសម្រេចនោះទេ អស់រយៈពេល១៣ឆ្នាំមកហើយ។
«យើងមិនជោគជ័យក្នុងការនាំចេញអង្ករបាន១លានតោន។ យើងនាំចេញ[អង្ករ]បាន៥០-៦០ម៉ឺនតោនប៉ុណ្នឹង! នេះដោយសារយើងខ្វះមូលដ្ឋានអំពីការកែច្នៃ ទាក់ទងនឹងរោងម៉ាស៊ីនកិនស្រូវ ទាក់ទងនឹងឡសម្ងួត និងទាក់ទងនឹងដើមទុនជាដើម[...]» នេះជាការលើកឡើងរបស់សម្តេច ហ៊ុន សែន ក្នុងពិធីប្រគល់សញ្ញាបត្រដល់និស្សិតបច្ចេកវិទ្យា និង គរុនិស្សិតបច្ចេកទេស ជ័យលាភីនៃវិទ្យាស្ថានជាតិបណ្តុះបណ្តាលបច្ចេកទេស (NTTI) នាព្រឹកថ្ងៃទី២៧ ខែកុម្ភៈ។
កៅស៊ូ ដំឡូងមី និងអំពៅ ក៏ជាដំណាំសក្ដានុពលរបស់កម្ពុជាផងដែរ។ ប៉ុន្តែ សុទ្ធសឹងទទួលបាន ការវិនិយោគ និងកែច្នៃ តិចតួច នាពេលបច្ចុប្បន្ន៕