អតីតអភិបាលខេត្តតាកែវ រូបនេះ កាលពីថ្ងៃទី២ ខែកញ្ញា ឆ្នាំ២០១៩ ត្រូវបានផ្តន្ទាទោសសាលាដំបូងរាជធានីភ្នំពេញ ផ្តន្ទាទោស១៣ឆ្នាំ ក្នុងសំណុំរឿងឃាតកម្មលើស្ត្រីម្នាក់ ហើយតុលាការកំពូល សម្រេចតាមសាលក្រមនេះ កាលពីថ្ងៃទី២៤ ខែធ្នូ ឆ្នាំ២០២១។

 

ក្នុងសំណុំរឿងដដែល លោក ឡាយ ណារិទ្ធ អតីតស្នងការរងខេត្តតាកែវ ដែលជាបងប្រុសរបស់លោក ឡាយ វណ្ណៈ ត្រូវជាប់ពន្ធនាគារ១០ឆ្នាំ។ សំណុំរឿងឃាតកម្មនេះ នៅមានមនុស្សពីរនាក់ផ្សេងទៀត ដែលជាគ្នីគ្នារបស់លោក ឡាយ វណ្ណៈ ក៏ជាប់ពាក់ព័ន្ធដែរ។ មនុស្សពីរនាក់នោះ ត្រូវបានផ្តន្ទាទោសឲ្យជាប់ពន្ធនាគារ២ឆ្នាំក្នុងម្នាក់ៗ ពីបទលាក់បាំងតម្រុយ ក្នុងអំពើឃាតកម្មនេះ។

 

ស្ត្រីម្នាក់ឈ្មោះ ចេវ សុវឌ្ឍនា ដែលគេអះអាងថាជាស្រីកំណាន់របស់លោក ឡាយ វណ្ណៈ ត្រូវបានប្រទះឃើញស្លាប់ ដោយស្ថានភាពចងកក្នុងផ្ទះ ស្ថិតនៅក្រុងដូនកែវ ខេត្តតាកែវ កាលពីអំឡុងខែមករា ឆ្នាំ២០១៨។ ប៉ុន្តែ សមត្ថកិច្ច សន្និដ្ឋានថា មរណភាពរបស់ស្ត្រីរូបនេះ មិនមែនជាការធ្វើអត្តឃាតនោះទេ តែជាអំពើឃាតកម្ម។ ក្រោយមក មនុស្សទាំងបួននាក់ខាងលើ ក៏ត្រូវចាប់ខ្លួន។

 

«លើកលែងទោសឲ្យទណ្ឌិតឈ្មោះ ឡាយ វណ្ណៈ ភេទប្រុស កើតឆ្នាំ១៩៧៣ ដែលត្រូវបានតុលាការសម្រេចផ្ដន្ទាទោសដាក់ពន្ធនាគារកំណត់១៣ឆ្នាំ តាមអំណាចសាលដីកាព្រហ្មទណ្ឌស្ថាពរលេខ ៤៤៥ VI ចុះថ្ងៃទី២៤ ខែធ្នូ ឆ្នាំ២០២១ របស់តុលាការកំពូល»។ នេះបើតាមព្រះរាជក្រឹត្យលើកលែងទោសពីព្រះមហាក្សត្រ៕