ខេត្តមណ្ឌលគិរីនៅតែជាទិសដៅទេសចរណ៍ពេញនិយម រាល់ឱកាសបុណ្យទាននានា។ ទន្ទឹមនឹងនេះ មណ្ឌលគិរី ជាខេត្តដែលស្ថិតនៅលើខ្ពង់រាប សម្បូរភ្នំ និងព្រៃក្រាស់ ជាប់នឹងព្រំដែនវៀតណាម។ ដោយឡែក ខេត្តមណ្ឌលគិរី ក៏ជាខេត្តមានខ្យល់អាកាសល្អ ទេសភាពស្រស់ត្រកាលផងដែរ។

 

មិនត្រឹមតែសម្បូររមណីយដ្ឋានធម្មជាតិ មណ្ឌលគិរី ក៏មានទឹកជ្រោះស្អាតដាច់គេ គឺទឹកជ្រោះប៊ូស្រា។ ភ្ញៀវទេសចរភាគច្រើននិយម ទៅកម្សាន្តនៅក្រុងសែនមនោរម្យ ទឹកជ្រោះប៊ូស្រា ភ្នំដោះក្រមុំ និងតំបន់ទេសចរណ៍ធម្មជាតិដទៃទៀត។ 
 

ជាមួយគ្នានេះ ខេត្តមណ្ឌលគិរី ជាខេត្តដែលមានអាកាសធាតុត្រជាក់ និងភ្លៀងច្រើន នៅតំបន់ទំនាបកណ្តាល។ ទន្ទឹមនឹងនោះ ភាពសម្បូរនៃព្រៃឈើ បានធ្វើឱ្យមណ្ឌលគិរី ក្លាយជាខេត្តដែលសម្បូរមានរមណីយដ្ឋានទេសចរណ៍ធម្មជាតិជាច្រើនកន្លែងដែរ។ 
  

 

យ៉ាងណាមិញ មណ្ឌលគិរី ក៏មានទឹកជ្រោះជាច្រើនកន្លែងទៀត ដូចជាទឹកជ្រោះជ្រៃធំ សែនមនោរម្យ ដាក់ដាំ ជ្រោះអូតាំងឡាំង ភ្នំដោះក្រមុំ  ភ្នំអណ្ដូងស្នេហ៍ និងទឹកធ្លាក់អូផ្លាយផងដែរ។បច្ចុប្បន្នខេត្តមណ្ឌលគិរី មានកន្លែងស្នាក់នៅសម្រាប់ទទួលភ្ញៀវទេសចរប្រមាណ ១ ៦២៣បន្ទប់។ ជាពិសេស ភ្ញៀវទេសចរ ដែលមានបំណងទៅលេងខេត្តមណ្ឌលគិរី ក៏អាចបោះតង់សម្រាកតាមរីសត និងតំបន់ធម្មជាតិផ្សេងៗដែរ។ នេះបើតាម លោក ស៊ន សារុន អភិបាលខេត្តមណ្ឌលគិរី ក្នុងសន្និសីទសារព័ត៌មាន ស្ដីពី «ភាពជោគជ័យក្នុងរយៈពេល ៥ឆ្នាំកន្លងមក» របស់រដ្ឋបាលខេត្តមណ្ឌលគិរី។ 
 

សូមជម្រាបថា មន្ទីរទេសចរណ៍ខេត្តមណ្ឌលគិរី កំពុងរៀបចំសណ្ដាប់ធ្នាប់ក្នុងខេត្ត ហេដ្ឋារចនាសម្ព័ន្ធ និងពង្រឹងសេវាកម្មបន្ថែម នៅតាមគោលដៅទេសចរណ៍ពេញនិយមទាំងអស់ ដើម្បីទាក់ទាញទេសចរឱ្យមានកំណើនកាន់តែច្រើនពីមួយឆ្នាំទៅមួយឆ្នាំ៕