កីឡាករ សៀង ចន្ធា បានបង្ហាញពីការត្រៀមខ្លួន ដោយមិនធ្វេសប្រហែស ចំពោះក្រុមណាមួយឡើយ នៅក្នុងពូល A ។ ប្រធានក្រុមរូបនេះ ឃើញថា ក្រុមទាំងនោះ សុទ្ធតែជាក្រុមមានកម្រិតខ្លាំង។ ទោះជាយ៉ាងនោះក្ដី ចន្ធា បានប្រាប់ថា អ្វី ដែលគួរធ្វើអំឡុងពេលព្រឹត្តិការណ៍នោះ គឺការប្រឹងប្រែងអស់ពីសមត្ថភាព ដើម្បីឆ្លងឲ្យផុតវគ្គចែកពូល។
 

កីឡាករ សៀង ចន្ធា បាននិយាយដូច្នេះថា៖«សម្រាប់ខ្ញុំ នៅក្នុងពូលរបស់យើងក្នុងការប្រកួតហ្នឹង សុទ្ធតែជាក្រុមខ្លាំងទាំងអស់។ យើងមិនអាចមើលងាយគេបាន។ ប៉ុន្ដែ អ្វីដែលយើងត្រូវធ្វើ គឺយើងត្រូវតែឡើងឲ្យផុតពូលឲ្យបាន។»។
 

ឆ្លងកាត់ការប្រកួត Merlion នៅប្រទេសសិង្ហបុរី កាលពីចុងខែមីនា ក្រោយប្រមូលផ្ដុំហ្វឹកហាត់លើកទី១ នៅកោះសាម៉ុយ នៃប្រទេសថៃ ប្រធានក្រុមជម្រើសជាតិរូបនេះ សម្លឹងឃើញថា កម្រិតបច្ចេកទេស នៃការលេងរបស់កម្ពុជា គឺប្រហាក់ប្រហែលគ្នាទៅនិងកីឡាករបរទេស ដែលនៅក្នុងតំបន់អាស៊ានដែរ ប៉ុន្ដែកម្ពុជា នូវមានចំណុចខ្វះខាតបន្ដិចបន្ដួច ដែលត្រូវកែតម្រូវ។ សម្រាប់ព្រឹត្តិការណ៍ស៊ីហ្គេម កីឡាករ សៀង ចន្ធា មានជំនឿចិត្តច្រើនថា ក្រុមខ្លួនអាចធ្វើបានល្អ ក្នុងនាមជាម្ចាស់ផ្ទះ។ 
 

 

«កម្រិតនៃការលេងរបស់យើងជាមួយគេ គឺវាប្រហាក់ប្រហែលគ្នា។ យើង ក៏ធ្វើបានល្អដែរ ប៉ុន្ដែ យើងនៅខ្វះខាតចំណុចមួយចំនួន ដែលយើងត្រូវកែតម្រូវ ដើម្បីត្រៀមស៊ីហ្គេម នៅថ្ងៃខាងមុខ។ សម្រាប់ក្រុមជម្រើសជាតិកម្ពុជា មិនមានឧបសគ្គ ឬការលំបាកអ្វីទេ ក្នុងការហ្វឹកហាត់ ក៏ដូចជាការត្រៀមសម្រាប់ប្រកួតក្នុងព្រឹត្តិការណ៍ស៊ីហ្គេម ដែលកម្ពុជាធ្វើជាម្ចាស់ផ្ទះ។ ក្រុមជម្រើសជាតិទាំងអស់បានហ្វឹកហាត់ ទៅតាមផែនការរបស់គ្រូបង្វឹក បានដោយរលូន។»។ កីឡាករវ័យ២២ឆ្នាំរូបនេះ បានប្រាប់ពីការរំពឹងទាំងវិជ្ជមានបែបនេះ។