ការបែកធ្លាយព័ត៌មានសម្ងាត់នៅអាម៉េរិក កំពុងធ្វើឱ្យទីក្រុងវ៉ាស៊ីនតោនវិលមុខខ្លាំង ហើយតាមរកអត្តសញ្ញាណអ្នកនៅពីក្រោយរឿងនេះ។ ការស៊ើបអង្កេតកំពុងធ្វើឡើងដោយក្រសួងយុត្តិធម៌អាម៉េរិក។ អ្នកជំនាញសន្តិសុខខ្លះ និងមន្ត្រីអាម៉េរិក សន្និដ្ឋានថា ជនល្មើសអាចស្ថិតនៅផ្ទៃក្នុងអាម៉េរិកផ្ទាល់ដោយយោងតាមអ្វីដែលបែកធ្លាយ តែក៏មិនច្រានចោលការលូកដៃរបស់បរទេស ដែលនេះទំនងជាសំដៅដល់រុស្ស៊ីតែម្ដង។

 

ឆ្លើយតបរឿងនេះ អ្នកនាំពាក្យវិមានក្រេមឡាំង Dmitry Peskov អះអាងថា៖ «ខ្ញុំមិនអាចអធិប្បាយលើរឿងនេះឡើយ។ អ្នក និងខ្ញុំដឹងថា មាននិន្នាការមួយដែលតែងតែបន្ទោសគ្រប់បញ្ហាលើរុស្ស៊ី។ វាជាជំងឺមួយ។»

 

នៅពេលត្រូវអ្នករាយការណ៍ព័ត៌មានសួរទាក់ទងលទ្ធភាពស៊ើបការណ៍លើប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី ពីសំណាក់អាម៉េរិក លោក Peskov ឆ្លើយទៀតថា រឿងនេះក៏មិនអាចច្រានចោលបានដែរ ដោយលោកក៏ឆ្លៀតរំឭករឿងអាម៉េរិកយកការណ៍ពីមេដឹកនាំជាច្រើន រាប់ទាំងសម្ព័ន្ធមិត្តរបស់ខ្លួននៅអឺរ៉ុបជាច្រើនឆ្នាំមកហើយដែរ។   

 

សូមបញ្ជាក់ថា ឯកសារសម្ងាត់រាប់សិបទំព័រដែលបែកធ្លាយ រៀបរាប់ប្រធានបទជាច្រើនចាប់ពីប្រព័ន្ធការពារមីស៊ីលនៅអ៊ុយក្រែន និងការតវ៉ានៅអ៊ីស្រាអែល ហើយកំពុងតាមរកមុខអ្នកនៅពីក្រោយផង។ ឯកសារខ្លះក៏បង្ហាញពីការការលួចស្ដាប់ការជជែករបស់សម្ព័ន្ធមិត្តអាម៉េរិកខ្លួនឯងតែម្ដង៕