ក្នុងចំណោមព័ត៌មានជាច្រើននៃឯកសារដែលបែកធ្លាយ ឯកសារមួយចំនួនផ្តល់ព័ត៌មានលម្អិតនៃការ ពិភាក្សាផ្ទៃក្នុងរបស់មន្ត្រីកូរ៉េខាងត្បូងអំពីសម្ពាធរបស់អាមេរិកលើទីក្រុងសេអ៊ូល​ដើម្បីជួយផ្គត់ផ្គង់​អាវុធដល់អ៊ុយក្រែន។ ក្រោយការបែកធ្លាយ ទីក្រុងសេអ៊ូល ក៏ទាក់ទងទៅកាន់ទីក្រុងវ៉ាស៊ីនតោនដើម្បីបានព័ត៌មានជាក់លាក់។

 

រដ្ឋមន្រ្តីការពារជាតិប្រទេសទាំង២ ក៏បានជជែកគ្នាតាមទូរស័ព្ទលើបញ្ហានេះដែរ។ ជុំវិញរឿងនេះ ទីប្រឹក្សារងសន្តិសុខជាតិកូរ៉េខាងត្បូង Kim Tae-hyo ប្រាប់អ្នកសារព័ត៌មានមុនចេញ​ដំណើរ​ទៅ​កាន់​ទីក្រុងវ៉ាស៊ីនតោនថា ជំហររបស់រដ្ឋមន្រ្តីទាំង២ ត្រូវគ្នា ហើយប្រទេសទាំង២ មានជំហរដូចគ្នា គឺព័ត៌មានជាច្រើនត្រូវបានប្រឌិត។ 

 

លោក Kim ទៅអាម៉េរិកដើម្បីរៀបចំដំណើរទស្សនកិច្ចរបស់លោកប្រធានាធិបតី យូន សុកយ៉ល​ទៅ​កាន់អាមេរិកនៅថ្ងៃទី ២៦ ខែមេសា។ បើតាមមន្រ្តីដដែល របាយការណ៍ស្តីពីកូរ៉េខាងត្បូងគឺមិនពិត។ យ៉ាងណាមិញ លោកមិនបានបរិយាយ​បន្ថែមផ្នែកណាមួយនៃឯកសារនោះមិនពិតនោះទេ ។

 

ក្នុងឯកសារដែលលេចធ្លាយនេះ កូរ៉េខាងត្បូងបាន យល់ព្រមលក់កាំភ្លើងធំដើម្បីជួយអាមេរិក​បំពេញ​ឃ្លាំងអាវុធរបស់ខ្លួនជាមួយលក្ខខណ្ឌថា អ្នកប្រើប្រាស់ចុងក្រោយគួរតែជាយោធាអាមេរិក។ ប៉ុន្តែមន្ត្រី​កូរ៉េខាងត្បូង​ព្រួយបារម្ភ​ថា អាមេរិក​នឹង​បង្វែរ​អាវុធទាំងនោះ​ទៅ​អ៊ុយក្រែន។

 

សូមបញ្ជាក់ថា ច្បាប់កូរ៉េខាងត្បូងហាមឃាត់ការផ្គត់ផ្គង់អាវុធដល់ប្រទេសដែលមានជម្លោះ ដែលការណ៍នេះមានន័យថា កូរ៉េខាងត្បូងមិនអាចបញ្ជូនអាវុធទៅអ៊ុយក្រែនបាននោះឡើយ។

 

ជុំវិញរឿងនេះដែរ លោក Kim និយាយថា ឯកសារចុងក្រោយនេះនឹងមិនប៉ះពាល់សម្ព័ន្ធ​ភាព​របស់​កូរ៉េ​ខាងត្បូងជាមួយអាមេរិកនោះទេ។ លោកអះអាងថា អាមេរិក ជាប្រទេសដែលមាន​សមត្ថភាព​ស៊ើបការណ៍សម្ងាត់ល្អបំផុតរបស់ពិភពលោកហើយនៅក្រោមរដ្ឋបាលលោក យូន ប្រទេសទាំងពីរ​បាន​ចែករំលែកការស៊ើបការណ៍សម្ងាត់ផ្ទៃក្នុងស្ទើរតែគ្រប់វិស័យទាំងអស់៕