អន្តរជាតិ
ចិនប្រតិកម្មនឹងការដាក់ទណ្ឌកម្មរបស់អាម៉េរិកលើក្រុមហ៊ុនចិនដែលរងការចោទប្រកាន់ថាទាក់ទងនឹងរុស្ស៊ី
×![]()
ដោយ: ជា ពេជ្រដាឡែន
អ្នកនាំពាក្យក្រសួងពាណិជ្ជកម្មចិននៅថ្ងៃទី១៥ ខែមេសាបានប្រឆាំងយ៉ាងម៉ឺងម៉ាត់ចំពោះការដាក់ទណ្ឌកម្មរបស់អាម៉េរិកលើក្រុមហ៊ុនចិនក្រោមហេតុផលទាក់ទងនឹងរុស្ស៊ី។ ចិនបានប្រតិកម្មថា ការចោទប្រកាន់របស់អាម៉េរិកនេះ គឺគ្មានមូលដ្ឋាននៅក្នុងច្បាប់អន្តរជាតិ និងមិនត្រូវបានអនុញ្ញាតដោយក្រុមប្រឹក្សាសន្តិសុខអង្គការសហប្រជាជាតិឡើយ។
ក្រសួងពាណិជ្ជកម្មចិននៅក្នុងសេចក្តីថ្លែងការណ៍តាមប្រព័ន្ធអនឡាញ បានរិះគន់ការដាក់ទណ្ឌកម្មរបស់អាម៉េរិកលើក្រុមហ៊ុនចិនថាជាការដាក់ទណ្ឌកម្មដែលគ្មានមូលដ្ឋាននៅក្នុងច្បាប់អន្តរជាតិ និងគ្មានការអនុញ្ញាតពីក្រុមប្រឹក្សាសន្តិសុខអង្គការសហប្រជាជាតិឡើយ។
«ទាំងនេះគឺជាឧទាហរណ៍យ៉ាងសាមញ្ញនៃការដាក់ទណ្ឌកម្មឯកតោភាគី និងយកទណ្ឌកម្មធ្វើជាអាវុធដែលបង្កផលប៉ះពាល់យ៉ាងធ្ងន់ធ្ងរដល់សិទ្ធិ និងផលប្រយោជន៍សាជីវកម្មស្របច្បាប់ ហើយប៉ះពាល់ដល់សន្តិសុខ និងស្ថិរភាពនៃខ្សែសង្វាក់ផ្គត់ផ្គង់សកល»។ នេះបើយោងតាមអ្នកនាំពាក្យក្រសួងពាណិជ្ជកម្មចិនលោក Wang Wentao។
លើសពីនេះ ក្រសួងដដែលក៏បានប្រាប់ឱ្យអាម៉េរិកគួរតែកែកំហុសរបស់ខ្លួនជាបន្ទាន់ ហើយបញ្ឈប់ការគាបសង្កត់ក្រុមហ៊ុនចិនដោយមិនសមហេតុផល។ អ្នកនាំពាក្យរូបនេះក៏បានសង្កត់ធ្ងន់ថាចិននឹងការពារយ៉ាងម៉ឺងម៉ាត់នូវសិទ្ធិ និងផលប្រយោជន៍ស្របច្បាប់របស់ក្រុមហ៊ុនចិន។
គួរបញ្ជាក់ថា កន្លងទៅ អាម៉េរិកបានប្រកាសដាក់ទណ្ឌកម្មលើក្រុមហ៊ុនចិនមួយចំនួនក្រោមហេតុផលថាបានគាំទ្រដល់ការឈ្លានពានរបស់រុស្ស៊ីលើអ៊ុយក្រែន៕
© រក្សាសិទ្ធិដោយ thmeythmey.com
